6. สีตวนิยตฺเถรคาถา
[6]
‘‘โย สีตวนํ อุปคา ภิกฺขุ, เอโก สนฺตุสิโต สมาหิตตฺโต;
วิชิตาวี อเปตโลมหํโส, รกฺขํ กายคตาสติํ ธิติมา’’ติฯ
อิตฺถํ สุทํ อายสฺมา สีตวนิโย เถโร คาถํ อภาสิตฺถาติฯ
7. ภลฺลิยตฺเถรคาถา
[7]
‘‘โยปานุที มจฺจุราชสฺส เสนํ, นฬเสตุํว สุทุพฺพลํ มโหโฆ;
วิชิตาวี อเปตเภรโว หิ, ทนฺโต โส ปรินิพฺพุโต ฐิตตฺโต’’ติฯ
อิตฺถํ สุทํ อายสฺมา ภลฺลิโย เถโร คาถํ อภาสิตฺถาติฯ
8. วีรตฺเถรคาถา
[8]
‘‘โย ทุทฺทมิโย ทเมน ทนฺโต, วีโร สนฺตุสิโต วิติณฺณกงฺโข;
วิชิตาวี อเปตโลมหํโส, วีโร โส ปรินิพฺพุโต ฐิตตฺโต’’ติฯ
อิตฺถํ สุทํ อายสฺมา วีโร เถโร คาถํ อภาสิตฺถาติฯ
9. ปิลินฺทวจฺฉตฺเถรคาถา
[9]
‘‘สฺวาคตํ น ทุราคตํ [นาปคตํ (สี. สฺยา.)], นยิทํ ทุมนฺติตํ มม;
สํวิภตฺเตสุ ธมฺเมสุ, ยํ เสฏฺฐํ ตทุปาคมิ’’นฺติฯ
อิตฺถํ สุทํ อายสฺมา ปิลินฺทวจฺโฉ [ปิลินฺทิวจฺโฉ (สี.)] เถโร คาถํ อภาสิตฺถาติฯ
10. ปุณฺณมาสตฺเถรคาถา
[10]
‘‘วิหริ อเปกฺขํ อิธ วา หุรํ วา, โย เวทอูอู สมิโต ยตตฺโต;
สพฺเพสุ ธมฺเมสุ อนูปลิตฺโต, โลกสฺส ชญฺญา อุทยพฺพยญฺจา’’ติฯ
อิตฺถํ สุทํ อายสฺมา ปุณฺณมาโส เถโร คาถํ อภาสิตฺถาติฯ
วคฺโค ปฐโม นิฏฺฐิโตฯ
ตสฺสุทฺทานํ –
สุภูติ โกฏฺฐิโก เถโร, กงฺขาเรวตสมฺมโต;
มนฺตาณิปุตฺโต ทพฺโพ จ, สีตวนิโย จ ภลฺลิโย;
วีโร ปิลินฺทวจฺโฉ จ, ปุณฺณมาโส ตโมนุโทติฯ
2. ทุติยวคฺโค
1. จูฬวจฺฉตฺเถรคาถา
[11]
‘‘ปาโมชฺชพหุโล ภิกฺขุ, ธมฺเม พุทฺธปฺปเวทิเต;
อธิคจฺเฉ ปทํ สนฺตํ, สงฺขารูปสมํ สุข’’นฺติฯ
… จูฬวจฺโฉ [จูลควจฺโฉ (สี.)] เถโร…ฯ
2. มหาวจฺฉตฺเถรคาถา
[12]
‘‘ปญฺญาพลี สีลวตูปปนฺโน, สมาหิโต ฌานรโต สตีมา;
ยทตฺถิยํ โภชนํ ภุญฺชมาโน, กงฺเขถ กาลํ อิธ วีตราโค’’ติฯ
… มหาวจฺโฉ [มหาควจฺโฉ (สี.)] เถโร…ฯ