7. ธมฺมสวตฺเถรคาถา
[107]
‘‘ปพฺพชิํ ตุลยิตฺวาน, อคารสฺมานคาริยํ;
ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ
… ธมฺมสโว เถโร…ฯ
8. ธมฺมสวปิตุตฺเถรคาถา
[108]
‘‘ส วีสวสฺสสติโก, ปพฺพชิํ อนคาริยํ;
ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ
… ธมฺมสวปิตุ เถโร…ฯ
9. สงฺฆรกฺขิตตฺเถรคาถา
[109]
‘‘น นูนายํ ปรมหิตานุกมฺปิโน, รโหคโต อนุวิคเณติ สาสนํ;
ตถาหยํ วิหรติ ปากตินฺทฺริโย, มิคี ยถา ตรุณชาติกา วเน’’ติฯ
… สงฺฆรกฺขิโต เถโร…ฯ
10. อุสภตฺเถรคาถา
[110]
‘‘นคา นคคฺเคสุ สุสํวิรูฬฺหา, อุทคฺคเมเฆน นเวน สิตฺตา;
วิเวกกามสฺส อรญฺญสญฺญิโน, ชเนติ ภิยฺโย อุสภสฺส กลฺยต’’นฺติฯ
… อุสโภ เถโร…ฯ
วคฺโค เอกาทสโม นิฏฺฐิโตฯ
ตสฺสุทฺทานํ –
เพลฏฺฐานิโก เสตุจฺโฉ, พนฺธุโร ขิตโก อิสิ;
มลิตวมฺโภ สุเหมนฺโต, ธมฺมสโว ธมฺมสวปิตา;
สงฺฆรกฺขิตตฺเถโร จ, อุสโภ จ มหามุนีติฯ
12. ทฺวาทสมวคฺโค
1. เชนฺตตฺเถรคาถา
[111]
‘‘ทุปฺปพฺพชฺชํ เว ทุรธิวาสา เคหา, ธมฺโม คมฺภีโร ทุรธิคมา โภคา;
กิจฺฉา วุตฺติ โน อิตรีตเรเนว, ยุตฺตํ จินฺเตตุํ สตตมนิจฺจต’’นฺติฯ
… เชนฺโต เถโร…ฯ
2. วจฺฉโคตฺตตฺเถรคาถา
[112]
‘‘เตวิชฺโชหํ มหาฌายี, เจโตสมถโกวิโท;
สทตฺโถ เม อนุปฺปตฺโต, กตํ พุทฺธสฺส สาสน’’นฺติฯ
… วจฺฉโคตฺโต เถโร…ฯ
3. วนวจฺฉตฺเถรคาถา
[113]
‘‘อจฺโฉทิกา ปุถุสิลา,โคนงฺคุลมิคายุตา;
อมฺพุเสวาลสญฺฉนฺนา, เต เสลา รมยนฺติ ม’’นฺติฯ
… วนวจฺโฉ เถโร…ฯ
4. อธิมุตฺตตฺเถรคาถา
[114]
‘‘กายทุฏฺฐุลฺลครุโน, หิยฺยมานมฺหิ [หียมานมฺหิ (สี.)] ชีวิเต;
สรีรสุขคิทฺธสฺส, กุโต สมณสาธุตา’’ติฯ
… อธิมุตฺโต เถโร…ฯ
5. มหานามตฺเถรคาถา
[115]
‘‘เอสาวหิยฺยเส ปพฺพเตน, พหุกุฏชสลฺลกิเกน [สลฺลกิเตน (สี.), สลฺลริเกน (สฺยา.)];
เนสาทเกน คิรินา, ยสสฺสินา ปริจฺฉเทนา’’ติฯ
… มหานาโม เถโร…ฯ