2. วิชยตฺเถรคาถา
[92]
‘‘ยสฺสาสวา ปริกฺขีณา, อาหาเร จ อนิสฺสิโต;
สุญฺญตา อนิมิตฺโต จ, วิโมกฺโข ยสฺส โคจโร;
อากาเสว สกุนฺตานํ, ปทํ ตสฺส ทุรนฺนย’’นฺติฯ
… วิชโย เถโร…ฯ
3. เอรกตฺเถรคาถา
[93]
‘‘ทุกฺขา กามา เอรก, น สุขา กามา เอรก;
โย กาเม กามยติ, ทุกฺขํ โส กามยติ เอรก;
โย กาเม น กามยติ, ทุกฺขํ โส น กามยติ เอรกา’’ติฯ
… เอรโก เถโร…ฯ
4. เมตฺตชิตฺเถรคาถา
[94]
‘‘นโม หิ ตสฺส ภควโต, สกฺยปุตฺตสฺส สิรีมโต;
เตนายํ อคฺคปฺปตฺเตน, อคฺคธมฺโม [อคฺโค ธมฺโม (สี.)] สุเทสิโต’’ติฯ
… เมตฺตชิ เถโร…ฯ
5. จกฺขุปาลตฺเถรคาถา
[95]
‘‘อนฺโธหํ หตเนตฺโตสฺมิ, กนฺตารทฺธานปกฺขนฺโท [ปกฺขนฺโน (สี.), ปกฺกนฺโต (สฺยา. สี. อฏฺฐ.)];
สยมาโนปิ คจฺฉิสฺสํ, น สหาเยน ปาเปนา’’ติฯ
… จกฺขุปาโล เถโร…ฯ
6. ขณฺฑสุมนตฺเถรคาถา
[96]
‘‘เอกปุปฺผํ จชิตฺวาน, อสีติ [อสีติํ (สี.)] วสฺสโกฏิโย;
สคฺเคสุ ปริจาเรตฺวา, เสสเกนมฺหิ นิพฺพุโต’’ติฯ
… ขณฺฑสุมโน เถโร…ฯ
7. ติสฺสตฺเถรคาถา
[97]
‘‘หิตฺวา สตปลํ กํสํ, โสวณฺณํ สตราชิกํ;
อคฺคหิํ มตฺติกาปตฺตํ, อิทํ ทุติยาภิเสจน’’นฺติฯ
… ติสฺโส เถโร…ฯ
8. อภยตฺเถรคาถา
[98]
‘‘รูปํ ทิสฺวา สติ มุฏฺฐา, ปิยํ นิมิตฺตํ มนสิกโรโต;
สารตฺตจิตฺโต เวเทติ, ตญฺจ อชฺโฌส ติฏฺฐติ;
ตสฺส วฑฺฒนฺติ อาสวา, ภวมูโลปคามิโน’’ติ [ภวมูลา ภวคามิโนติ (สี. ก.)]ฯ
… อภโย เถโร…ฯ
9. อุตฺติยตฺเถรคาถา
[99]
‘‘สทฺทํ สุตฺวา สติ มุฏฺฐา, ปิยํ นิมิตฺตํ มนสิกโรโต;
สารตฺตจิตฺโต เวเทติ, ตญฺจ อชฺโฌส ติฏฺฐติ;
ตสฺส วฑฺฒนฺติ อาสวา, สํสารํ อุปคามิโน’’ติฯ
… อุตฺติโย เถโร…ฯ
10. (ทุติย)-เทวสภตฺเถรคาถา
[100]
‘‘สมฺมปฺปธานสมฺปนฺโน, สติปฏฺฐานโคจโร;
วิมุตฺติกุสุมสญฺฉนฺโน, ปรินิพฺพิสฺสตฺยนาสโว’’ติฯ
… เทวสโภ เถโร…ฯ
วคฺโค ทสโม นิฏฺฐิโตฯ
ตสฺสุทฺทานํ –
ปริปุณฺณโก จ วิชโย, เอรโก เมตฺตชี มุนิ;
จกฺขุปาโล ขณฺฑสุมโน, ติสฺโส จ อภโย ตถา;
อุตฺติโย จ มหาปญฺโญ, เถโร เทวสโภปิ จาติฯ
11. เอกาทสมวคฺโค
1. เพลฏฺฐานิกตฺเถรคาถา
[101]
‘‘หิตฺวา คิหิตฺตํ อนโวสิตตฺโต, มุขนงฺคลี โอทริโก กุสีโต;
มหาวราโหว นิวาปปุฏฺโฐ, ปุนปฺปุนํ คพฺภมุเปติ มนฺโท’’ติฯ
… เพลฏฺฐานิโก เถโร…ฯ