7. ปวิฏฺฐตฺเถรคาถา
[87]
‘‘ขนฺธา ทิฏฺฐา ยถาภูตํ, ภวา สพฺเพ ปทาลิตา;
วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ
… ปวิฏฺโฐ เถโร…ฯ
8. อชฺชุนตฺเถรคาถา
[88]
‘‘อสกฺขิํ วต อตฺตานํ, อุทฺธาตุํ อุทกา ถลํ;
วุยฺหมาโน มโหเฆว, สจฺจานิ ปฏิวิชฺฌห’’นฺติฯ
… อชฺชุโน เถโร…ฯ
9. (ปฐม)-เทวสภตฺเถรคาถา
[89]
‘‘อุตฺติณฺณา ปงฺกปลิปา, ปาตาลา ปริวชฺชิตา;
มุตฺโต โอฆา จ คนฺถา จ, สพฺเพ มานา วิสํหตา’’ติฯ
… เทวสโภ เถโร…ฯ
10. สามิทตฺตตฺเถรคาถา
[90]
‘‘ปญฺจกฺขนฺธา ปริญฺญาตา, ติฏฺฐนฺติ ฉินฺนมูลกา;
วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ
… สามิทตฺโต เถโร…ฯ
วคฺโค นวโม นิฏฺฐิโตฯ
ตสฺสุทฺทานํ –
เถโร สมิติคุตฺโต จ, กสฺสโป สีหสวฺหโย;
นีโต สุนาโค นาคิโต, ปวิฏฺโฐ อชฺชุโน อิสิ;
เทวสโภ จ โย เถโร, สามิทตฺโต มหพฺพโลติฯ
10. ทสมวคฺโค
1. ปริปุณฺณกตฺเถรคาถา
[91]
‘‘น ตถา มตํ สตรสํ, สุธนฺนํ ยํ มยชฺช ปริภุตฺตํ;
อปริมิตทสฺสินา โคตเมน, พุทฺเธน เทสิโต ธมฺโม’’ติฯ
… ปริปุณฺณโก เถโร…ฯ
2. วิชยตฺเถรคาถา
[92]
‘‘ยสฺสาสวา ปริกฺขีณา, อาหาเร จ อนิสฺสิโต;
สุญฺญตา อนิมิตฺโต จ, วิโมกฺโข ยสฺส โคจโร;
อากาเสว สกุนฺตานํ, ปทํ ตสฺส ทุรนฺนย’’นฺติฯ
… วิชโย เถโร…ฯ
3. เอรกตฺเถรคาถา
[93]
‘‘ทุกฺขา กามา เอรก, น สุขา กามา เอรก;
โย กาเม กามยติ, ทุกฺขํ โส กามยติ เอรก;
โย กาเม น กามยติ, ทุกฺขํ โส น กามยติ เอรกา’’ติฯ
… เอรโก เถโร…ฯ
4. เมตฺตชิตฺเถรคาถา
[94]
‘‘นโม หิ ตสฺส ภควโต, สกฺยปุตฺตสฺส สิรีมโต;
เตนายํ อคฺคปฺปตฺเตน, อคฺคธมฺโม [อคฺโค ธมฺโม (สี.)] สุเทสิโต’’ติฯ
… เมตฺตชิ เถโร…ฯ
5. จกฺขุปาลตฺเถรคาถา
[95]
‘‘อนฺโธหํ หตเนตฺโตสฺมิ, กนฺตารทฺธานปกฺขนฺโท [ปกฺขนฺโน (สี.), ปกฺกนฺโต (สฺยา. สี. อฏฺฐ.)];
สยมาโนปิ คจฺฉิสฺสํ, น สหาเยน ปาเปนา’’ติฯ
… จกฺขุปาโล เถโร…ฯ
6. ขณฺฑสุมนตฺเถรคาถา
[96]
‘‘เอกปุปฺผํ จชิตฺวาน, อสีติ [อสีติํ (สี.)] วสฺสโกฏิโย;
สคฺเคสุ ปริจาเรตฺวา, เสสเกนมฺหิ นิพฺพุโต’’ติฯ
… ขณฺฑสุมโน เถโร…ฯ
7. ติสฺสตฺเถรคาถา
[97]
‘‘หิตฺวา สตปลํ กํสํ, โสวณฺณํ สตราชิกํ;
อคฺคหิํ มตฺติกาปตฺตํ, อิทํ ทุติยาภิเสจน’’นฺติฯ
… ติสฺโส เถโร…ฯ