7. หตฺถาโรหปุตฺตตฺเถรคาถา
[77]
‘‘อิทํ ปุเร จิตฺตมจาริ จาริกํ, เยนิจฺฉกํ ยตฺถกามํ ยถาสุขํ;
ตทชฺชหํ นิคฺคเหสฺสามิ โยนิโส, หตฺถิปฺปภินฺนํ วิย องฺกุสคฺคโห’’ติฯ
… หตฺถาโรหปุตฺโต เถโร…ฯ
8. เมณฺฑสิรตฺเถรคาถา
[78]
‘‘อเนกชาติสํสารํ , สนฺธาวิสฺสํ อนิพฺพิสํ;
ตสฺส เม ทุกฺขชาตสฺส, ทุกฺขกฺขนฺโธ อปรทฺโธ’’ติฯ
… เมณฺฑสิโร เถโร…ฯ
9. รกฺขิตตฺเถรคาถา
[79]
‘‘สพฺโพ ราโค ปหีโน เม, สพฺโพ โทโส สมูหโต;
สพฺโพ เม วิคโต โมโห, สีติภูโตสฺมิ นิพฺพุโต’’ติฯ
… รกฺขิโต เถโร…ฯ
10. อุคฺคตฺเถรคาถา
[80]
‘‘ยํ มยา ปกตํ กมฺมํ, อปฺปํ วา ยทิ วา พหุํ;
สพฺพเมตํ ปริกฺขีณํ, นตฺถิ ทานิ ปุนพฺภโว’’ติฯ
… อุคฺโค เถโร…ฯ
วคฺโค อฏฺฐโม นิฏฺฐิโตฯ
ตสฺสุทฺทานํ –
วจฺฉปาโล จ โย เถโร, อาตุโม มาณโว อิสิ;
สุยามโน สุสารโท, เถโร โย จ ปิยญฺชโห;
อาโรหปุตฺโต เมณฺฑสิโร, รกฺขิโต อุคฺคสวฺหโยติฯ
9. นวมวคฺโค
1. สมิติคุตฺตตฺเถรคาถา
[81]
‘‘ยํ มยา ปกตํ ปาปํ, ปุพฺเพ อญฺญาสุ ชาติสุ;
อิเธว ตํ เวทนียํ, วตฺถุ อญฺญํ น วิชฺชตี’’ติฯ
… สมิติคุตฺโต เถโร…ฯ
2. กสฺสปตฺเถรคาถา
[82]
‘‘เยน เยน สุภิกฺขานิ, สิวานิ อภยานิ จ;
เตน ปุตฺตก คจฺฉสฺสุ, มา โสกาปหโต ภวา’’ติฯ
… กสฺสโป เถโร…ฯ
3. สีหตฺเถรคาถา
[83]
‘‘สีหปฺปมตฺโต วิหร, รตฺตินฺทิวมตนฺทิโต;
ภาเวหิ กุสลํ ธมฺมํ, ชห สีฆํ สมุสฺสย’’นฺติฯ
… สีโห เถโร…ฯ
4. นีตตฺเถรคาถา
[84]
‘‘สพฺพรตฺติํ สุปิตฺวาน, ทิวา สงฺคณิเก รโต;
กุทาสฺสุ นาม ทุมฺเมโธ, ทุกฺขสฺสนฺตํ กริสฺสตี’’ติฯ
… นีโต เถโร…ฯ
5. สุนาคตฺเถรคาถา
[85]
‘‘จิตฺตนิมิตฺตสฺส โกวิโท, ปวิเวกรสํ วิชานิย;
ฌายํ นิปโก ปติสฺสโต, อธิคจฺเฉยฺย สุขํ นิรามิส’’นฺติฯ
… สุนาโค เถโร…ฯ
6. นาคิตตฺเถรคาถา
[86]
‘‘อิโต พหิทฺธา ปุถุ อญฺญวาทินํ, มคฺโค น นิพฺพานคโม ยถา อยํ;
อิติสฺสุ สงฺฆํ ภควานุสาสติ, สตฺถา สยํ ปาณิตเลว ทสฺสย’’นฺติฯ
… นาคิโต เถโร…ฯ