2. อาตุมตฺเถรคาถา
[72]
‘‘ยถา กฬีโร สุสุ วฑฺฒิตคฺโค, ทุนฺนิกฺขโม โหติ ปสาขชาโต;
เอวํ อหํ ภริยายานิตาย, อนุมญฺญํ มํ ปพฺพชิโตมฺหิ ทานี’’ติฯ
… อาตุโม เถโร…ฯ
3. มาณวตฺเถรคาถา
[73]
‘‘ชิณฺณญฺจ ทิสฺวา ทุขิตญฺจ พฺยาธิตํ, มตญฺจ ทิสฺวา คตมายุสงฺขยํ;
ตโต อหํ นิกฺขมิตูน ปพฺพชิํ, ปหาย กามานิ มโนรมานี’’ติฯ
… มาณโว เถโร…ฯ
4. สุยามนตฺเถรคาถา
[74]
‘‘กามจฺฉนฺโท จ พฺยาปาโท, ถินมิทฺธญฺจ [ถีนมิทฺธญฺจ (สี. สฺยา.)] ภิกฺขุโน;
อุทฺธจฺจํ วิจิกิจฺฉา จ, สพฺพโสว น วิชฺชตี’’ติฯ
… สุยามโน เถโร…ฯ
5. สุสารทตฺเถรคาถา
[75]
‘‘สาธุ สุวิหิตาน ทสฺสนํ, กงฺขา ฉิชฺชติ พุทฺธิ วฑฺฒติ;
พาลมฺปิ กโรนฺติ ปณฺฑิตํ, ตสฺมา สาธุ สตํ สมาคโม’’ติฯ
… สุสารโท เถโร…ฯ
6. ปิยญฺชหตฺเถรคาถา
[76]
‘‘อุปฺปตนฺเตสุ นิปเต, นิปตนฺเตสุ อุปฺปเต;
วเส อวสมาเนสุ, รมมาเนสุ โน รเม’’ติฯ
… ปิยญฺชโห เถโร…ฯ
7. หตฺถาโรหปุตฺตตฺเถรคาถา
[77]
‘‘อิทํ ปุเร จิตฺตมจาริ จาริกํ, เยนิจฺฉกํ ยตฺถกามํ ยถาสุขํ;
ตทชฺชหํ นิคฺคเหสฺสามิ โยนิโส, หตฺถิปฺปภินฺนํ วิย องฺกุสคฺคโห’’ติฯ
… หตฺถาโรหปุตฺโต เถโร…ฯ
8. เมณฺฑสิรตฺเถรคาถา
[78]
‘‘อเนกชาติสํสารํ , สนฺธาวิสฺสํ อนิพฺพิสํ;
ตสฺส เม ทุกฺขชาตสฺส, ทุกฺขกฺขนฺโธ อปรทฺโธ’’ติฯ
… เมณฺฑสิโร เถโร…ฯ
9. รกฺขิตตฺเถรคาถา
[79]
‘‘สพฺโพ ราโค ปหีโน เม, สพฺโพ โทโส สมูหโต;
สพฺโพ เม วิคโต โมโห, สีติภูโตสฺมิ นิพฺพุโต’’ติฯ
… รกฺขิโต เถโร…ฯ