เมนู

9. ฉนฺนตฺเถรคาถา

[69]

‘‘สุตฺวาน ธมฺมํ มหโต มหารสํ, สพฺพญฺญุตญฺญาณวเรน เทสิตํ;

มคฺคํ ปปชฺชิํ [ปปชฺชํ (ก.)] อมตสฺส ปตฺติยา, โส โยคกฺเขมสฺส ปถสฺส โกวิโท’’ติฯ

… ฉนฺโน เถโร…ฯ

10. ปุณฺณตฺเถรคาถา

[70]

‘‘สีลเมว อิธ อคฺคํ, ปญฺญวา ปน อุตฺตโม;

มนุสฺเสสุ จ เทเวสุ, สีลปญฺญาณโต ชย’’นฺติฯ

… ปุณฺโณ เถโร…ฯ

วคฺโค สตฺตโม นิฏฺฐิโตฯ

ตสฺสุทฺทานํ

วปฺโป จ วชฺชิปุตฺโต จ, ปกฺโข วิมลโกณฺฑญฺโญ;

อุกฺเขปกตวจฺโฉ จ, เมฆิโย เอกธมฺมิโก;

เอกุทานิยฉนฺนา จ, ปุณฺณตฺเถโร มหพฺพโลติฯ

8. อฏฺฐมวคฺโค

1. วจฺฉปาลตฺเถรคาถา

[71]

‘‘สุสุขุมนิปุณตฺถทสฺสินา, มติกุสเลน นิวาตวุตฺตินา;

สํเสวิตวุทฺธสีลินา [สํเสวิตพุทฺธสีลินา (ก.)], นิพฺพานํ น หิ เตน ทุลฺลภ’’นฺติฯ

… วจฺฉปาโล เถโร…ฯ