3. ปกฺขตฺเถรคาถา

[63]

‘‘จุตา ปตนฺติ ปติตา, คิทฺธา จ ปุนราคตา;

กตํ กิจฺจํ รตํ รมฺมํ, สุเขนนฺวาคตํ สุข’’นฺติฯ

… ปกฺโข เถโร…ฯ

4. วิมลโกณฺฑญฺญตฺเถรคาถา

[64]

‘‘ทุมวฺหยาย อุปฺปนฺโน, ชาโต ปณฺฑรเกตุนา;

เกตุหา เกตุนาเยว, มหาเกตุํ ปธํสยี’’ติฯ

… วิมลโกณฺฑญฺโญ เถโร…ฯ

5. อุกฺเขปกตวจฺฉตฺเถรคาถา

[65]

‘‘อุกฺเขปกตวจฺฉสฺส, สงฺกลิตํ พหูหิ วสฺเสหิ;

ตํ ภาสติ คหฏฺฐานํ, สุนิสินฺโน อุฬารปาโมชฺโช’’ติฯ

… อุกฺเขปกตวจฺโฉ เถโร…ฯ

6. เมฆิยตฺเถรคาถา

[66]

‘‘อนุสาสิ มหาวีโร, สพฺพธมฺมาน ปารคู;

ตสฺสาหํ ธมฺมํ สุตฺวาน, วิหาสิํ สนฺติเก สโต;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ

… เมฆิโย เถโร…ฯ

7. เอกธมฺมสวนียตฺเถรคาถา

[67]

‘‘กิเลสา ฌาปิตา มยฺหํ, ภวา สพฺเพ สมูหตา;

วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ

… เอกธมฺมสวนีโย เถโร…ฯ

8. เอกุทานิยตฺเถรคาถา

[68]

[อุทา. 37; ปาจิ. 153] ‘‘อธิเจตโส อปฺปมชฺชโต, มุนิโน โมนปเถสุ สิกฺขโต;

โสกา น ภวนฺติ ตาทิโน, อุปสนฺตสฺส สทา สตีมโต’’ติฯ

… เอกุทานิโย เถโร…ฯ

9. ฉนฺนตฺเถรคาถา

[69]

‘‘สุตฺวาน ธมฺมํ มหโต มหารสํ, สพฺพญฺญุตญฺญาณวเรน เทสิตํ;

มคฺคํ ปปชฺชิํ [ปปชฺชํ (ก.)] อมตสฺส ปตฺติยา, โส โยคกฺเขมสฺส ปถสฺส โกวิโท’’ติฯ

… ฉนฺโน เถโร…ฯ

10. ปุณฺณตฺเถรคาถา

[70]

‘‘สีลเมว อิธ อคฺคํ, ปญฺญวา ปน อุตฺตโม;

มนุสฺเสสุ จ เทเวสุ, สีลปญฺญาณโต ชย’’นฺติฯ

… ปุณฺโณ เถโร…ฯ

วคฺโค สตฺตโม นิฏฺฐิโตฯ

ตสฺสุทฺทานํ –

วปฺโป จ วชฺชิปุตฺโต จ, ปกฺโข วิมลโกณฺฑญฺโญ;

อุกฺเขปกตวจฺโฉ จ, เมฆิโย เอกธมฺมิโก;

เอกุทานิยฉนฺนา จ, ปุณฺณตฺเถโร มหพฺพโลติฯ

8. อฏฺฐมวคฺโค

1. วจฺฉปาลตฺเถรคาถา

[71]

‘‘สุสุขุมนิปุณตฺถทสฺสินา, มติกุสเลน นิวาตวุตฺตินา;

สํเสวิตวุทฺธสีลินา [สํเสวิตพุทฺธสีลินา (ก.)], นิพฺพานํ น หิ เตน ทุลฺลภ’’นฺติฯ

… วจฺฉปาโล เถโร…ฯ