9. โกสลวิหาริตฺเถรคาถา
[59]
‘‘สทฺธายาหํ ปพฺพชิโต, อรญฺเญ เม กุฏิกา กตา;
อปฺปมตฺโต จ อาตาปี, สมฺปชาโน ปติสฺสโต’’ติ [ปฏิสฺสโตติ (ก.)]ฯ
… โกสลวิหาริตฺเถโร…ฯ
10. สีวลิตฺเถรคาถา
[60]
‘‘เต เม อิชฺฌิํสุ สงฺกปฺปา, ยทตฺโถ ปาวิสิํ กุฏิํ;
วิชฺชาวิมุตฺติํ ปจฺเจสํ, มานานุสยมุชฺชห’’นฺติฯ
… สีวลิตฺเถโร…ฯ
วคฺโค ฉฏฺโฐ นิฏฺฐิโตฯ
ตสฺสุทฺทานํ –
โคธิโก จ สุพาหุ จ, วลฺลิโย อุตฺติโย อิสิ;
อญฺชนวนิโย เถโร, ทุเว กุฏิวิหาริโน;
รมณียกุฏิโก จ, โกสลวฺหยสีวลีติฯ
7. สตฺตมวคฺโค
1. วปฺปตฺเถรคาถา
[61]
‘‘ปสฺสติ ปสฺโส ปสฺสนฺตํ, อปสฺสนฺตญฺจ ปสฺสติ;
อปสฺสนฺโต อปสฺสนฺตํ, ปสฺสนฺตญฺจ น ปสฺสตี’’ติฯ
… วปฺโป เถโร…ฯ
2. วชฺชิปุตฺตตฺเถรคาถา
[62]
‘‘เอกกา มยํ อรญฺเญ วิหราม, อปวิทฺธํว วนสฺมิํ ทารุกํ;
ตสฺส เม พหุกา ปิหยนฺติ, เนรยิกา วิย สคฺคคามิน’’นฺติฯ
… วชฺชิปุตฺโต เถโร…ฯ
3. ปกฺขตฺเถรคาถา
[63]
‘‘จุตา ปตนฺติ ปติตา, คิทฺธา จ ปุนราคตา;
กตํ กิจฺจํ รตํ รมฺมํ, สุเขนนฺวาคตํ สุข’’นฺติฯ
… ปกฺโข เถโร…ฯ
4. วิมลโกณฺฑญฺญตฺเถรคาถา
[64]
‘‘ทุมวฺหยาย อุปฺปนฺโน, ชาโต ปณฺฑรเกตุนา;
เกตุหา เกตุนาเยว, มหาเกตุํ ปธํสยี’’ติฯ
… วิมลโกณฺฑญฺโญ เถโร…ฯ
5. อุกฺเขปกตวจฺฉตฺเถรคาถา
[65]
‘‘อุกฺเขปกตวจฺฉสฺส, สงฺกลิตํ พหูหิ วสฺเสหิ;
ตํ ภาสติ คหฏฺฐานํ, สุนิสินฺโน อุฬารปาโมชฺโช’’ติฯ
… อุกฺเขปกตวจฺโฉ เถโร…ฯ
6. เมฆิยตฺเถรคาถา
[66]
‘‘อนุสาสิ มหาวีโร, สพฺพธมฺมาน ปารคู;
ตสฺสาหํ ธมฺมํ สุตฺวาน, วิหาสิํ สนฺติเก สโต;
ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ
… เมฆิโย เถโร…ฯ
7. เอกธมฺมสวนียตฺเถรคาถา
[67]
‘‘กิเลสา ฌาปิตา มยฺหํ, ภวา สพฺเพ สมูหตา;
วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ
… เอกธมฺมสวนีโย เถโร…ฯ
8. เอกุทานิยตฺเถรคาถา
[68]
[อุทา. 37; ปาจิ. 153] ‘‘อธิเจตโส อปฺปมชฺชโต, มุนิโน โมนปเถสุ สิกฺขโต;
โสกา น ภวนฺติ ตาทิโน, อุปสนฺตสฺส สทา สตีมโต’’ติฯ
… เอกุทานิโย เถโร…ฯ