เมนู

4. อุตฺติยตฺเถรคาถา

[54]

‘‘วสฺสติ เทโว ยถา สุคีตํ, ฉนฺนา เม กุฏิกา สุขา นิวาตา;

ตสฺสํ วิหรามิ อทุติโย, อถ เจ ปตฺถยสิ ปวสฺส เทวา’’ติฯ

… อุตฺติโย เถโร…ฯ

5. อญฺชนวนิยตฺเถรคาถา

[55]

‘‘อาสนฺทิํ กุฏิกํ กตฺวา, โอคยฺห อญฺชนํ วนํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ

… อญฺชนวนิโย เถโร…ฯ

6. กุฏิวิหาริตฺเถรคาถา

[56]

‘‘โก กุฏิกายํ ภิกฺขุ กุฏิกายํ, วีตราโค สุสมาหิตจิตฺโต;

เอวํ ชานาหิ อาวุโส, อโมฆา เต กุฏิกา กตา’’ติฯ

… กุฏิวิหาริตฺเถโร…ฯ

7. ทุติยกุฏิวิหาริตฺเถรคาถา

[57]

‘‘อยมาหุ ปุราณิยา กุฏิ, อญฺญํ ปตฺถยเส นวํ กุฏิํ;

อาสํ กุฏิยา วิราชย, ทุกฺขา ภิกฺขุ ปุน นวา กุฏี’’ติฯ

… ทุติยกุฏิวิหาริตฺเถโร…ฯ

8. รมณียกุฏิกตฺเถรคาถา

[58]

‘‘รมณียา เม กุฏิกา, สทฺธาเทยฺยา มโนรมา;

น เม อตฺโถ กุมารีหิ, เยสํ อตฺโถ ตหิํ คจฺฉถ นาริโย’’ติฯ

… รมณียกุฏิโก เถโร…ฯ

9. โกสลวิหาริตฺเถรคาถา

[59]

‘‘สทฺธายาหํ ปพฺพชิโต, อรญฺเญ เม กุฏิกา กตา;

อปฺปมตฺโต จ อาตาปี, สมฺปชาโน ปติสฺสโต’’ติ [ปฏิสฺสโตติ (ก.)]

… โกสลวิหาริตฺเถโร…ฯ

10. สีวลิตฺเถรคาถา

[60]

‘‘เต เม อิชฺฌิํสุ สงฺกปฺปา, ยทตฺโถ ปาวิสิํ กุฏิํ;

วิชฺชาวิมุตฺติํ ปจฺเจสํ, มานานุสยมุชฺชห’’นฺติฯ

… สีวลิตฺเถโร…ฯ

วคฺโค ฉฏฺโฐ นิฏฺฐิโตฯ

ตสฺสุทฺทานํ –

โคธิโก จ สุพาหุ จ, วลฺลิโย อุตฺติโย อิสิ;

อญฺชนวนิโย เถโร, ทุเว กุฏิวิหาริโน;

รมณียกุฏิโก จ, โกสลวฺหยสีวลีติฯ

7. สตฺตมวคฺโค

1. วปฺปตฺเถรคาถา

[61]

‘‘ปสฺสติ ปสฺโส ปสฺสนฺตํ, อปสฺสนฺตญฺจ ปสฺสติ;

อปสฺสนฺโต อปสฺสนฺตํ, ปสฺสนฺตญฺจ น ปสฺสตี’’ติฯ

… วปฺโป เถโร…ฯ

2. วชฺชิปุตฺตตฺเถรคาถา

[62]

‘‘เอกกา มยํ อรญฺเญ วิหราม, อปวิทฺธํว วนสฺมิํ ทารุกํ;

ตสฺส เม พหุกา ปิหยนฺติ, เนรยิกา วิย สคฺคคามิน’’นฺติฯ

… วชฺชิปุตฺโต เถโร…ฯ