10. วิมลตฺเถรคาถา

[50]

‘‘ธรณี จ สิญฺจติ วาติ, มาลุโต วิชฺชุตา จรติ นเภ;

อุปสมนฺติ วิตกฺกา, จิตฺตํ สุสมาหิตํ มมา’’ติฯ

… วิมโล เถโร…ฯ

วคฺโค ปญฺจโม นิฏฺฐิโตฯ

ตสฺสุทฺทานํ –

สิรีวฑฺโฒ เรวโต เถโร, สุมงฺคโล สานุสวฺหโย ;

รมณียวิหารี จ, สมิทฺธิอุชฺชยสญฺชยา;

รามเณยฺโย จ โส เถโร, วิมโล จ รณญฺชโหติฯ

6. ฉฏฺฐวคฺโค

1. โคธิกตฺเถรคาถา

[51]

‘‘วสฺสติ เทโว ยถา สุคีตํ, ฉนฺนา เม กุฏิกา สุขา นิวาตา;

จิตฺตํ สุสมาหิตญฺจ มยฺหํ, อถ เจ ปตฺถยสิ ปวสฺส เทวา’’ติฯ

… โคธิโก เถโร…ฯ

2. สุพาหุตฺเถรคาถา

[52]

‘‘วสฺสติ เทโว ยถา สุคีตํ, ฉนฺนา เม กุฏิกา สุขา นิวาตา;

จิตฺตํ สุสมาหิตญฺจ กาเย, อถ เจ ปตฺถยสิ ปวสฺส เทวา’’ติฯ

… สุพาหุตฺเถโร…ฯ

3. วลฺลิยตฺเถรคาถา

[53]

‘‘วสฺสติ เทโว ยถา สุคีตํ, ฉนฺนา เม กุฏิกา สุขา นิวาตา;

ตสฺสํ วิหรามิ อปฺปมตฺโต, อถ เจ ปตฺถยสิ ปวสฺส เทวา’’ติฯ

… วลฺลิโย เถโร…ฯ

4. อุตฺติยตฺเถรคาถา

[54]

‘‘วสฺสติ เทโว ยถา สุคีตํ, ฉนฺนา เม กุฏิกา สุขา นิวาตา;

ตสฺสํ วิหรามิ อทุติโย, อถ เจ ปตฺถยสิ ปวสฺส เทวา’’ติฯ

… อุตฺติโย เถโร…ฯ

5. อญฺชนวนิยตฺเถรคาถา

[55]

‘‘อาสนฺทิํ กุฏิกํ กตฺวา, โอคยฺห อญฺชนํ วนํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติฯ

… อญฺชนวนิโย เถโร…ฯ

6. กุฏิวิหาริตฺเถรคาถา

[56]

‘‘โก กุฏิกายํ ภิกฺขุ กุฏิกายํ, วีตราโค สุสมาหิตจิตฺโต;

เอวํ ชานาหิ อาวุโส, อโมฆา เต กุฏิกา กตา’’ติฯ

… กุฏิวิหาริตฺเถโร…ฯ

7. ทุติยกุฏิวิหาริตฺเถรคาถา

[57]

‘‘อยมาหุ ปุราณิยา กุฏิ, อญฺญํ ปตฺถยเส นวํ กุฏิํ;

อาสํ กุฏิยา วิราชย, ทุกฺขา ภิกฺขุ ปุน นวา กุฏี’’ติฯ

… ทุติยกุฏิวิหาริตฺเถโร…ฯ

8. รมณียกุฏิกตฺเถรคาถา

[58]

‘‘รมณียา เม กุฏิกา, สทฺธาเทยฺยา มโนรมา;

น เม อตฺโถ กุมารีหิ, เยสํ อตฺโถ ตหิํ คจฺฉถ นาริโย’’ติฯ

… รมณียกุฏิโก เถโร…ฯ