‘‘เนสชฺชิโก สาตติโก…เป.…ฯ
[857]
‘‘อปฺปิจฺโฉ สาตติโก…เป.…ฯ
[858]
‘‘สนฺตุฏฺโฐ สาตติโก…เป.…ฯ
[859]
‘‘ปวิวิตฺโต สาตติโก…เป.…ฯ
[860]
‘‘อสํสฏฺโฐ สาตติโก…เป.…ฯ
[861]
‘‘อารทฺธวีริโย สาตติโก…เป.…ฯ
[862]
‘‘หิตฺวา สตปลํ กํสํ, โสวณฺณํ สตราชิกํ;
อคฺคหิํ มตฺติกาปตฺตํ, อิทํ ทุติยาภิเสจนํฯ
[863]
‘‘อุจฺเจ มณฺฑลิปากาเร, ทฬฺหมฏฺฏาลโกฏฺฐเก;
รกฺขิโต ขคฺคหตฺเถหิ, อุตฺตสํ วิหริํ ปุเรฯ
[864]
‘‘โสชฺช ภทฺโท อนุตฺราสี, ปหีนภยเภรโว;
ฌายติ วนโมคยฺห, ปุตฺโต โคธาย ภทฺทิโยฯ
[865]
‘‘สีลกฺขนฺเธ ปติฏฺฐาย, สติํ ปญฺญญฺจ ภาวยํ;
ปาปุณิํ อนุปุพฺเพน, สพฺพสํโยชนกฺขย’’นฺติฯ
… ภทฺทิโย กาฬิโคธาย ปุตฺโต เถโร…ฯ
8. องฺคุลิมาลตฺเถรคาถา
[866]
‘‘คจฺฉํ วเทสิ สมณ ‘ฏฺฐิโตมฺหิ’, มมญฺจ พฺรูสิ ฐิตมฏฺฐิโตติ;
ปุจฺฉามิ ตํ สมณ เอตมตฺถํ, ‘กถํ ฐิโต ตฺวํ อหมฏฺฐิโตมฺหิ’’’ฯ
[867]
‘‘ฐิโต อหํ องฺคุลิมาล สพฺพทา, สพฺเพสุ ภูเตสุ นิธาย ทณฺฑํ;
ตุวญฺจ ปาเณสุ อสญฺญโตสิ, ตสฺมา ฐิโตหํ ตุวมฏฺฐิโตสิ’’ฯ
[868]
‘‘จิรสฺสํ วต เม มหิโต มเหสี, มหาวนํ สมโณ ปจฺจปาทิ [ปจฺจุปาทิ (สพฺพตฺถ)];
โสหํ จชิสฺสามิ สหสฺสปาปํ, สุตฺวาน คาถํ ตว ธมฺมยุตฺตํ’’ฯ
[869]
อิจฺเจว โจโร อสิมาวุธญฺจ, โสพฺเภ ปปาเต นรเก อนฺวกาสิ [อกิริ (ม. นิ. 2.349)];
อวนฺทิ โจโร สุคตสฺส ปาเท, ตตฺเถว ปพฺพชฺชมยาจิ พุทฺธํฯ
[870]
พุทฺโธ จ โข การุณิโก มเหสิ, โย สตฺถา โลกสฺส สเทวกสฺส;
‘ตเมหิ ภิกฺขู’ติ ตทา อโวจ, เอเสว ตสฺส อหุ ภิกฺขุภาโวฯ
[871]
‘‘โย จ ปุพฺเพ ปมชฺชิตฺวา, ปจฺฉา โส นปฺปมชฺชติ;
โสมํ โลกํ ปภาเสติ, อพฺภา มุตฺโตว จนฺทิมาฯ
[872]
‘‘ยสฺส ปาปํ กตํ กมฺมํ, กุสเลน ปิธียติ [ปิถียติ (สี. สฺยา.)];
โสมํ โลกํ ปภาเสติ, อพฺภา มุตฺโตว จนฺทิมาฯ
[873]
‘‘โย หเว ทหโร ภิกฺขุ, ยุญฺชติ พุทฺธสาสเน;
โสมํ โลกํ ปภาเสติ, อพฺภา มุตฺโตว จนฺทิมาฯ
[874]
[ทิสา หิ (สฺยา. ก., ม. นิ. 2.352)] ‘‘ทิสาปิ เม ธมฺมกถํ สุณนฺตุ, ทิสาปิ เม ยุญฺชนฺตุ พุทฺธสาสเน;
ทิสาปิ เม เต มนุเช ภชนฺตุ, เย ธมฺมเมวาทปยนฺติ สนฺโตฯ
[875]
‘‘ทิสา หิ เม ขนฺติวาทานํ, อวิโรธปฺปสํสินํ;
สุณนฺตุ ธมฺมํ กาเลน, ตญฺจ อนุวิธียนฺตุฯ
[876]
‘‘น หิ ชาตุ โส มมํ หิํเส, อญฺญํ วา ปน กิญฺจนํ [กญฺจินํ (สี. สฺยา.), กญฺจนํ (?)];
ปปฺปุยฺย ปรมํ สนฺติํ, รกฺเขยฺย ตสถาวเรฯ
[877]
[เถรคา. 19] ‘‘อุทกญฺหิ นยนฺติ เนตฺติกา, อุสุการา นมยนฺติ [ทมยนฺติ (ก.)] เตชนํ;
ทารุํ นมยนฺติ [ทมยนฺติ (ก.)] ตจฺฉกา, อตฺตานํ ทมยนฺติ ปณฺฑิตาฯ
[878]
‘‘ทณฺเฑเนเก ทมยนฺติ, องฺกุเสภิ กสาหิ จ;
อทณฺเฑน อสตฺเถน, อหํ ทนฺโตมฺหิ ตาทินาฯ
[879]
‘‘‘อหิํสโก’ติ เม นามํ, หิํสกสฺส ปุเร สโต;
อชฺชาหํ สจฺจนาโมมฺหิ, น นํ หิํสามิ กิญฺจนํ [กญฺจินํ (สี. สฺยา.), กญฺจนํ (?)]ฯ
[880]
‘‘โจโร อหํ ปุเร อาสิํ, องฺคุลิมาโลติ วิสฺสุโต;
วุยฺหมาโน มโหเฆน, พุทฺธํ สรณมาคมํฯ
[881]
‘‘โลหิตปาณิ ปุเร อาสิํ, องฺคุลิมาโลติ วิสฺสุโต;
สรณคมนํ ปสฺส, ภวเนตฺติ สมูหตาฯ
[882]
‘‘ตาทิสํ กมฺมํ กตฺวาน, พหุํ ทุคฺคติคามินํ;
ผุฏฺโฐ กมฺมวิปาเกน, อนโณ ภุญฺชามิ โภชนํฯ
[883]
‘‘ปมาทมนุยุญฺชนฺติ, พาลา ทุมฺเมธิโน ชนา;
อปฺปมาทญฺจ เมธาวี, ธนํ เสฏฺฐํว รกฺขติฯ
[884]
‘‘มา ปมาทมนุยุญฺเชถ, มา กามรติสนฺถวํ [สนฺธวํ (ก.)];
อปฺปมตฺโต หิ ฌายนฺโต, ปปฺโปติ ปรมํ สุขํฯ
[885]
‘‘สฺวาคตํ นาปคตํ, เนตํ ทุมฺมนฺติตํ มม;
สวิภตฺเตสุ ธมฺเมสุ, ยํ เสฏฺฐํ ตทุปาคมํฯ
[886]
‘‘สฺวาคตํ นาปคตํ, เนตํ ทุมฺมนฺติตํ มม;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[887]
‘‘อรญฺเญ รุกฺขมูเล วา, ปพฺพเตสุ คุหาสุ วา;
ตตฺถ ตตฺเถว อฏฺฐาสิํ, อุพฺพิคฺคมนโส ตทาฯ
[888]
‘‘สุขํ สยามิ ฐายามิ, สุขํ กปฺเปมิ ชีวิตํ;
อหตฺถปาโส มารสฺส, อโห สตฺถานุกมฺปิโตฯ
[889]
‘‘พฺรหฺมชจฺโจ ปุเร อาสิํ, อุทิจฺโจ อุภโต อหุ;
โสชฺช ปุตฺโต สุคตสฺส, ธมฺมราชสฺส สตฺถุโนฯ
[890]
‘‘วีตตณฺโห อนาทาโน, คุตฺตทฺวาโร สุสํวุโต;
อฆมูลํ วธิตฺวาน, ปตฺโต เม อาสวกฺขโยฯ
[891]
‘‘ปริจิณฺโณ มยา สตฺถา, กตํ พุทฺธสฺส สาสนํ;
โอหิโต ครุโก ภาโร, ภวเนตฺติ สมูหตา’’ติฯ
… องฺคุลิมาโล เถโร…ฯ
9. อนุรุทฺธตฺเถรคาถา
[892]
‘‘ปหาย มาตาปิตโร, ภคินี ญาติภาตโร;
ปญฺจ กามคุเณ หิตฺวา, อนุรุทฺโธว ฌายตุฯ
[893]
‘‘สเมโต นจฺจคีเตหิ, สมฺมตาฬปฺปโพธโน;
น เตน สุทฺธิมชฺฌคํ [สุทฺธมชฺฌคา (สี. ก.), สุทฺธิมชฺฌคมา (สฺยา.)], มารสฺส วิสเย รโตฯ
[894]
‘‘เอตญฺจ สมติกฺกมฺม, รโต พุทฺธสฺส สาสเน;
สพฺโพฆํ สมติกฺกมฺม, อนุรุทฺโธว ฌายติฯ
[895]
‘‘รูปา สทฺทา รสา คนฺธา, โผฏฺฐพฺพา จ มโนรมา;
เอเต จ สมติกฺกมฺม, อนุรุทฺโธว ฌายติฯ
[896]
‘‘ปิณฺฑปาตปฏิกฺกนฺโต, เอโก อทุติโย มุนิ;
เอสติ ปํสุกูลานิ, อนุรุทฺโธ อนาสโวฯ
[897]
‘‘วิจินี อคฺคหี โธวิ, รชยี ธารยี มุนิ;
ปํสุกูลานิ มติมา, อนุรุทฺโธ อนาสโวฯ
[898]
‘‘มหิจฺโฉ จ อสนฺตุฏฺโฐ, สํสฏฺโฐ โย จ อุทฺธโต;
ตสฺส ธมฺมา อิเม โหนฺติ, ปาปกา สํกิเลสิกาฯ
[899]
‘‘สโต จ โหติ อปฺปิจฺโฉ, สนฺตุฏฺโฐ อวิฆาตวา;
ปวิเวกรโต วิตฺโต, นิจฺจมารทฺธวีริโยฯ
[900]
‘‘ตสฺส ธมฺมา อิเม โหนฺติ, กุสลา โพธิปกฺขิกา;
อนาสโว จ โส โหติ, อิติ วุตฺตํ มเหสินาฯ
[901]
‘‘มม สงฺกปฺปมญฺญาย, สตฺถา โลเก อนุตฺตโร;
มโนมเยน กาเยน, อิทฺธิยา อุปสงฺกมิฯ
[902]
‘‘ยทา เม อหุ สงฺกปฺโป, ตโต อุตฺตริ เทสยิ;
นิปฺปปญฺจรโต พุทฺโธ, นิปฺปปญฺจมเทสยิฯ
[903]
‘‘ตสฺสาหํ ธมฺมมญฺญาย, วิหาสิํ สาสเน รโต;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[904]