‘‘ยถาสฺส วิชานโต ธมฺมํ, เสวโต จาปิ เวทนํ;
ขียติ โนปจียติ, เอวํ โส จรตี สโต;
เอวํ อปจินโต ทุกฺขํ, สนฺติเก นิพฺพาน วุจฺจติ’’ฯ
… มาลุกฺยปุตฺโต เถโร…ฯ
6. เสลตฺเถรคาถา
[818]
‘‘ปริปุณฺณกาโย สุรุจิ, สุชาโต จารุทสฺสโน;
สุวณฺณวณฺโณสิ ภควา, สุสุกฺกทาโฐสิ วีริยวา [สุสุกฺกทาโฐ วิรียวา (สี.)]ฯ
[819]
‘‘นรสฺส หิ สุชาตสฺส, เย ภวนฺติ วิยญฺชนา;
สพฺเพ เต ตว กายสฺมิํ, มหาปุริสลกฺขณาฯ
[820]
‘‘ปสนฺนเนตฺโต สุมุโข, พฺรหา อุชุ ปตาปวา;
มชฺเฌ สมณสงฺฆสฺส, อาทิจฺโจว วิโรจสิฯ
[821]
‘‘กลฺยาณทสฺสโน ภิกฺขุ, กญฺจนสนฺนิภตฺตโจ;
กิํ เต สมณภาเวน, เอวํ อุตฺตมวณฺณิโนฯ
[822]
‘‘ราชา อรหสิ ภวิตุํ, จกฺกวตฺตี รเถสโภ;
จาตุรนฺโต วิชิตาวี, ชมฺพุสณฺฑสฺส [ชมฺพุมณฺฑสฺส (ก.)] อิสฺสโรฯ
[823]
‘‘ขตฺติยา โภคี ราชาโน [โภคา ราชาโน (สี. ก.), โภชราชาโน (สฺยา.)], อนุยนฺตา ภวนฺติ เต;
ราชาภิราชา [ราชาธิราชา (สี. ก.)] มนุชินฺโท, รชฺชํ กาเรหิ โคตม’’ฯ
[824]
‘‘ราชาหมสฺมิ เสล, (เสลาติ ภควา) ธมฺมราชา อนุตฺตโร;
ธมฺเมน จกฺกํ วตฺเตมิ, จกฺกํ อปฺปฏิวตฺติยํ’’ฯ
[825]
‘‘สมฺพุทฺโธ ปฏิชานาสิ, (อิติ เสโล พฺราหฺมโณ) ธมฺมราชา อนุตฺตโร;
‘ธมฺเมน จกฺกํ วตฺเตมิ’, อิติ ภาสถ โคตมฯ
[826]
‘‘โก นุ เสนาปติ โภโต, สาวโก สตฺถุรนฺวโย [อนฺวโย (สี.)];
โก เตตมนุวตฺเตติ, ธมฺมจกฺกํ ปวตฺติตํ’’ฯ
[827]
‘‘มยา ปวตฺติตํ จกฺกํ, (เสลาติ ภควา) ธมฺมจกฺกํ อนุตฺตรํ;
สาริปุตฺโต อนุวตฺเตติ, อนุชาโต ตถาคตํฯ
[828]
‘‘อภิญฺเญยฺยํ อภิญฺญาตํ, ภาเวตพฺพญฺจ ภาวิตํ;
ปหาตพฺพํ ปหีนํ เม, ตสฺมา พุทฺโธสฺมิ พฺราหฺมณฯ
[829]
‘‘วินยสฺสุ มยิ กงฺขํ, อธิมุญฺจสฺสุ พฺราหฺมณ;
ทุลฺลภํ ทสฺสนํ โหติ, สมฺพุทฺธานํ อภิณฺหโสฯ
[830]
‘‘เยสํ เว ทุลฺลโภ โลเก, ปาตุภาโว อภิณฺหโส;
โสหํ พฺราหฺมณ พุทฺโธสฺมิ, สลฺลกตฺโต [สลฺลกนฺโต (สี.)] อนุตฺตโรฯ
[831]
‘‘พฺรหฺมภูโต อติตุโล, มารเสนปฺปมทฺทโน;
สพฺพามิตฺเต วเส [วสี (สฺยา. ก., ม. นิ. 2.399; สุ. นิ. 966)] กตฺวา, โมทามิ อกุโตภโย’’ฯ
[832]
‘‘อิทํ โภนฺโต นิสาเมถ, ยถา ภาสติ จกฺขุมา;
สลฺลกตฺโต มหาวีโร, สีโหว นทตี วเนฯ
[833]
‘‘พฺรหฺมภูตํ อติตุลํ, มารเสนปฺปมทฺทนํ;
โก ทิสฺวา นปฺปสีเทยฺย, อปิ กณฺหาภิชาติโกฯ
[834]
‘‘โย มํ อิจฺฉติ อนฺเวตุ, โย วา นิจฺฉติ คจฺฉตุ;
อิธาหํ ปพฺพชิสฺสามิ, วรปญฺญสฺส สนฺติเก’’ฯ
[835]
‘‘เอตํ เจ รุจฺจติ โภโต, สมฺมาสมฺพุทฺธสาสนํ;
มยมฺปิ ปพฺพชิสฺสาม, วรปญฺญสฺส สนฺติเกฯ
[836]
‘‘พฺราหฺมณา ติสตา อิเม, ยาจนฺติ ปญฺชลีกตา;
‘พฺรหฺมจริยํ จริสฺสาม, ภควา ตว สนฺติเก’’’ฯ
[837]
‘‘สฺวาขาตํ พฺรหฺมจริยํ, (เสลาติ ภควา) สนฺทิฏฺฐิกมกาลิกํ;
ยตฺถ อโมฆา ปพฺพชฺชา, อปฺปมตฺตสฺส สิกฺขโต’’ฯ
[838]
‘‘ยํ ตํ สรณมาคมฺห [สรณมาคมฺม (สพฺพตฺถ)], อิโต อฏฺฐเม [อฏฺฐมิ (สฺยา. ก.)] จกฺขุม;
สตฺตรตฺเตน ภควา, ทนฺตามฺห ตว สาสเนฯ
[839]
‘‘ตุวํ พุทฺโธ ตุวํ สตฺถา, ตุวํ มาราภิภู มุนิ;
ตุวํ อนุสเย เฉตฺวา, ติณฺโณ ตาเรสิมํ ปชํฯ
[840]
‘‘อุปธี เต สมติกฺกนฺตา, อาสวา เต ปทาลิตา;
สีโหว อนุปาทาโน, ปหีนภยเภรโวฯ
[841]
‘‘ภิกฺขโว ติสตา อิเม, ติฏฺฐนฺติ ปญฺชลีกตา;
ปาเท วีร ปสาเรหิ, นาคา วนฺทนฺตุ สตฺถุโน’’ติฯ
… เสโล เถโร…ฯ
7. กาฬิโคธาปุตฺตภทฺทิยตฺเถรคาถา
[842]
‘‘ยาตํ เม หตฺถิคีวาย, สุขุมา วตฺถา ปธาริตา;
สาลีนํ โอทโน ภุตฺโต, สุจิมํสูปเสจโนฯ
[843]
‘‘โสชฺช ภทฺโท สาตติโก, อุญฺฉาปตฺตาคเต รโต;
ฌายติ อนุปาทาโน, ปุตฺโต โคธาย ภทฺทิโยฯ
[844]
‘‘ปํสุกูลี สาตติโก, อุญฺฉาปตฺตาคเต รโต;
ฌายติ อนุปาทาโน, ปุตฺโต โคธาย ภทฺทิโยฯ
[845]
‘‘ปิณฺฑปาตี สาตติโก…เป.…ฯ
[846]
‘‘เตจีวรี สาตติโก…เป.…ฯ
[847]
‘‘สปทานจารี สาตติโก…เป.…ฯ
[848]
‘‘เอกาสนี สาตติโก…เป.…ฯ
[849]
‘‘ปตฺตปิณฺฑี สาตติโก…เป.…ฯ
[850]
‘‘ขลุปจฺฉาภตฺตี สาตติโก…เป.…ฯ
[851]
‘‘อารญฺญิโก สาตติโก…เป.…ฯ
[852]
‘‘รุกฺขมูลิโก สาตติโก…เป.…ฯ
[853]
‘‘อพฺโภกาสี สาตติโก…เป.…ฯ
[854]
‘‘โสสานิโก สาตติโก…เป.…ฯ
[855]
‘‘ยถาสนฺถติโก สาตติโก…เป.…ฯ
[856]