คหฺวรตีริโย สุปฺปิโย, โสปาโก เจว โปสิโย;
สามญฺญกานิ กุมาปุตฺโต, กุมาปุตฺตสหายโก;
ควมฺปติ ติสฺสตฺเถโร, วฑฺฒมาโน มหายโสติฯ
5. ปญฺจมวคฺโค
1. สิริวฑฺฒตฺเถรคาถา
[41]
‘‘วิวรมนุปตนฺติ วิชฺชุตา, เวภารสฺส จ ปณฺฑวสฺส จ;
นควิวรคโต จ ฌายติ, ปุตฺโต อปฺปฏิมสฺส ตาทิโน’’ติฯ
… สิริวฑฺโฒ เถโร…ฯ
2. ขทิรวนิยตฺเถรคาถา
[42]
‘‘จาเล อุปจาเล สีสูปจาเล ( ) [(จาลา อุปจาลา, สีสูปจาลา) (ก.)] ปติสฺสตา [ปฏิสฺสติกา (สฺยา. ก.)] นุ โข วิหรถ;
อาคโต โว วาลํ วิย เวธี’’ติฯ
… ขทิรวนิโย เถโร…ฯ
3. สุมงฺคลตฺเถรคาถา
[43]
‘‘สุมุตฺติโก สุมุตฺติโก สาหุ, สุมุตฺติโกมฺหิ ตีหิ ขุชฺชเกหิ;
อสิตาสุ มยา นงฺคลาสุ, มยา ขุทฺทกุทฺทาลาสุ มยาฯ
ยทิปิ อิธเมว อิธเมว, อถ วาปิ อลเมว อลเมว;
ฌาย สุมงฺคล ฌาย สุมงฺคล, อปฺปมตฺโต วิหร สุมงฺคลา’’ติฯ
… สุมงฺคโล เถโร…ฯ
4. สานุตฺเถรคาถา
[44]
[สํ. นิ. 1.239] ‘‘มตํ วา อมฺม โรทนฺติ, โย วา ชีวํ น ทิสฺสติ;
ชีวนฺตํ มํ อมฺม ปสฺสนฺตี, กสฺมา มํ อมฺม โรทสี’’ติฯ
… สานุตฺเถโร…ฯ
5. รมณียวิหาริตฺเถรคาถา
[45]
‘‘ยถาปิ ภทฺโท อาชญฺโญ, ขลิตฺวา ปติติฏฺฐติ;
เอวํ ทสฺสนสมฺปนฺนํ, สมฺมาสมฺพุทฺธสาวก’’นฺติฯ
… รมณียวิหาริตฺเถโร…ฯ
6. สมิทฺธิตฺเถรคาถา
[46]
‘‘สทฺธายาหํ ปพฺพชิโต, อคารสฺมานคาริยํ;
สติ ปญฺญา จ เม วุฑฺฒา, จิตฺตญฺจ สุสมาหิตํ;
กามํ กรสฺสุ รูปานิ, เนว มํ พฺยาธยิสฺสสี’’ติ [พาธยิสฺสสีติ (สี.), พฺยาถยิสฺสสีติ (?)]ฯ
… สมิทฺธิตฺเถโร…ฯ
7. อุชฺชยตฺเถรคาถา
[47]
‘‘นโม เต พุทฺธ วีรตฺถุ, วิปฺปมุตฺโตสิ สพฺพธิ;
ตุยฺหาปทาเน วิหรํ, วิหรามิ อนาสโว’’ติฯ
… อุชฺชโย เถโร…ฯ
8. สญฺชยตฺเถรคาถา
[48]
‘‘ยโต อหํ ปพฺพชิโต, อคารสฺมานคาริยํ;
นาภิชานามิ สงฺกปฺปํ, อนริยํ โทสสํหิต’’นฺติฯ
… สญฺชโย เถโร…ฯ
9. รามเณยฺยกตฺเถรคาถา
[49]
‘‘จิหจิหาภินทิเต [วิหวิหาภินทิเต (สี. สฺยา.)], สิปฺปิกาภิรุเตหิ จ;
น เม ตํ ผนฺทติ จิตฺตํ, เอกตฺตนิรตํ หิ เม’’ติฯ
… รามเณยฺยโก เถโร…ฯ