6. กุมาปุตฺตตฺเถรคาถา

[36]

‘‘สาธุ สุตํ สาธุ จริตกํ, สาธุ สทา อนิเกตวิหาโร;

อตฺถปุจฺฉนํ ปทกฺขิณกมฺมํ, เอตํ สามญฺญมกิญฺจนสฺสา’’ติฯ

… กุมาปุตฺโต เถโร…ฯ

7. กุมาปุตฺตสหายกตฺเถรคาถา

[37]

‘‘นานาชนปทํ ยนฺติ, วิจรนฺตา อสญฺญตา;

สมาธิญฺจ วิราเธนฺติ, กิํสุ รฏฺฐจริยา กริสฺสติ;

ตสฺมา วิเนยฺย สารมฺภํ, ฌาเยยฺย อปุรกฺขโต’’ติฯ

… กุมาปุตฺตตฺเถรสฺส สหายโก เถโร…ฯ

8. ควมฺปติตฺเถรคาถา

[38]

‘‘โย อิทฺธิยา สรภุํ อฏฺฐเปสิ, โส ควมฺปติ อสิโต อเนโช;

ตํ สพฺพสงฺคาติคตํ มหามุนิํ, เทวา นมสฺสนฺติ ภวสฺส ปารคุ’’นฺติฯ

… ควมฺปติตฺเถโร…ฯ

9. ติสฺสตฺเถรคาถา

[39]

[สํ. นิ. 1.21, 97]‘‘สตฺติยา วิย โอมฏฺโฐ, ฑยฺหมาโนว [ฑยฺหมาเนว (สพฺพตฺถ)] มตฺถเก;

กามราคปฺปหานาย, สโต ภิกฺขุ ปริพฺพเช’’ติฯ

… ติสฺโส เถโร…ฯ

10. วฑฺฒมานตฺเถรคาถา

[40]

‘‘สตฺติยา วิย โอมฏฺโฐ, ฑยฺหมาโนว มตฺถเก;

ภวราคปฺปหานาย, สโต ภิกฺขุ ปริพฺพเช’’ติฯ

… วฑฺฒมาโน เถโร…ฯ

วคฺโค จตุตฺโถ นิฏฺฐิโตฯ

ตสฺสุทฺทานํ –

คหฺวรตีริโย สุปฺปิโย, โสปาโก เจว โปสิโย;

สามญฺญกานิ กุมาปุตฺโต, กุมาปุตฺตสหายโก;

ควมฺปติ ติสฺสตฺเถโร, วฑฺฒมาโน มหายโสติฯ

5. ปญฺจมวคฺโค

1. สิริวฑฺฒตฺเถรคาถา

[41]

‘‘วิวรมนุปตนฺติ วิชฺชุตา, เวภารสฺส จ ปณฺฑวสฺส จ;

นควิวรคโต จ ฌายติ, ปุตฺโต อปฺปฏิมสฺส ตาทิโน’’ติฯ

… สิริวฑฺโฒ เถโร…ฯ

2. ขทิรวนิยตฺเถรคาถา

[42]

‘‘จาเล อุปจาเล สีสูปจาเล ( ) [(จาลา อุปจาลา, สีสูปจาลา) (ก.)] ปติสฺสตา [ปฏิสฺสติกา (สฺยา. ก.)] นุ โข วิหรถ;

อาคโต โว วาลํ วิย เวธี’’ติฯ

… ขทิรวนิโย เถโร…ฯ

3. สุมงฺคลตฺเถรคาถา

[43]

‘‘สุมุตฺติโก สุมุตฺติโก สาหุ, สุมุตฺติโกมฺหิ ตีหิ ขุชฺชเกหิ;

อสิตาสุ มยา นงฺคลาสุ, มยา ขุทฺทกุทฺทาลาสุ มยาฯ

ยทิปิ อิธเมว อิธเมว, อถ วาปิ อลเมว อลเมว;

ฌาย สุมงฺคล ฌาย สุมงฺคล, อปฺปมตฺโต วิหร สุมงฺคลา’’ติฯ

… สุมงฺคโล เถโร…ฯ

4. สานุตฺเถรคาถา

[44]

[สํ. นิ. 1.239] ‘‘มตํ วา อมฺม โรทนฺติ, โย วา ชีวํ น ทิสฺสติ;

ชีวนฺตํ มํ อมฺม ปสฺสนฺตี, กสฺมา มํ อมฺม โรทสี’’ติฯ

… สานุตฺเถโร…ฯ