6. กุมาปุตฺตตฺเถรคาถา

[36]

‘‘สาธุ สุตํ สาธุ จริตกํ, สาธุ สทา อนิเกตวิหาโร;

อตฺถปุจฺฉนํ ปทกฺขิณกมฺมํ, เอตํ สามญฺญมกิญฺจนสฺสา’’ติฯ

… กุมาปุตฺโต เถโร…ฯ

7. กุมาปุตฺตสหายกตฺเถรคาถา

[37]

‘‘นานาชนปทํ ยนฺติ, วิจรนฺตา อสญฺญตา;

สมาธิญฺจ วิราเธนฺติ, กิํสุ รฏฺฐจริยา กริสฺสติ;

ตสฺมา วิเนยฺย สารมฺภํ, ฌาเยยฺย อปุรกฺขโต’’ติฯ

… กุมาปุตฺตตฺเถรสฺส สหายโก เถโร…ฯ

8. ควมฺปติตฺเถรคาถา

[38]

‘‘โย อิทฺธิยา สรภุํ อฏฺฐเปสิ, โส ควมฺปติ อสิโต อเนโช;

ตํ สพฺพสงฺคาติคตํ มหามุนิํ, เทวา นมสฺสนฺติ ภวสฺส ปารคุ’’นฺติฯ

… ควมฺปติตฺเถโร…ฯ

9. ติสฺสตฺเถรคาถา

[39]

[สํ. นิ. 1.21, 97]‘‘สตฺติยา วิย โอมฏฺโฐ, ฑยฺหมาโนว [ฑยฺหมาเนว (สพฺพตฺถ)] มตฺถเก;

กามราคปฺปหานาย, สโต ภิกฺขุ ปริพฺพเช’’ติฯ

… ติสฺโส เถโร…ฯ

10. วฑฺฒมานตฺเถรคาถา

[40]

‘‘สตฺติยา วิย โอมฏฺโฐ, ฑยฺหมาโนว มตฺถเก;

ภวราคปฺปหานาย, สโต ภิกฺขุ ปริพฺพเช’’ติฯ

… วฑฺฒมาโน เถโร…ฯ

วคฺโค จตุตฺโถ นิฏฺฐิโตฯ

ตสฺสุทฺทานํ –