เมนู

ฯ นโม ตสฺส ภควโต อรหโต สมฺมาสมฺพุทฺธสฺสฯ

ขุทฺทกนิกาเย

เถรคาถาปาฬิ

นิทานคาถา

สีหานํว นทนฺตานํ, ทาฐีนํ คิริคพฺภเร;

สุณาถ ภาวิตตฺตานํ, คาถา อตฺถูปนายิกา [อตฺตูปนายิกา (สี. ก.)]

ยถานามา ยถาโคตฺตา, ยถาธมฺมวิหาริโน;

ยถาธิมุตฺตา สปฺปญฺญา, วิหริํสุ อตนฺทิตาฯ

ตตฺถ ตตฺถ วิปสฺสิตฺวา, ผุสิตฺวา อจฺจุตํ ปทํ;

กตนฺตํ ปจฺจเวกฺขนฺตา, อิมมตฺถมภาสิสุํฯ

1. เอกกนิปาโต

1. ปฐมวคฺโค

1. สุภูติตฺเถรคาถา

[1]

‘‘ฉนฺนา เม กุฏิกา สุขา นิวาตา, วสฺส เทว ยถาสุขํ;

จิตฺตํ เม สุสมาหิตํ วิมุตฺตํ, อาตาปี วิหรามิ วสฺส เทวา’’ติฯ

อิตฺถํ สุทํ [อิตฺถํ สุมํ (ก. อฏฺฐ.)] อายสฺมา สุภูติตฺเถโร คาถํ อภาสิตฺถาติฯ

2. มหาโกฏฺฐิกตฺเถรคาถา

[2]

‘‘อุปสนฺโต อุปรโต, มนฺตภาณี อนุทฺธโต;

ธุนาติ ปาปเก ธมฺเม, ทุมปตฺตํว มาลุโต’’ติฯ

อิตฺถํ สุทํ อายสฺมา มหาโกฏฺฐิโก [มหาโกฏฺฐิโต (สี. สฺยา.)] เถโร คาถํ อภาสิตฺถาติฯ

3. กงฺขาเรวตตฺเถรคาถา

[3]

‘‘ปญฺญํ อิมํ ปสฺส ตถาคตานํ, อคฺคิ ยถา ปชฺชลิโต นิสีเถ;

อาโลกทา จกฺขุททา ภวนฺติ, เย อาคตานํ วินยนฺติ กงฺข’’นฺติฯ

อิตฺถํ สุทํ อายสฺมา กงฺขาเรวโต เถโร คาถํ อภาสิตฺถาติฯ

4. ปุณฺณตฺเถรคาถา

[4]

‘‘สมฺภิเรว สมาเสถ, ปณฺฑิเตหตฺถทสฺสิภิ;

อตฺถํ มหนฺตํ คมฺภีรํ, ทุทฺทสํ นิปุณํ อณุํ;

ธีรา สมธิคจฺฉนฺติ, อปฺปมตฺตา วิจกฺขณา’’ติฯ

อิตฺถํ สุทํ อายสฺมา ปุณฺโณ มนฺตาณิปุตฺโต [มนฺตานิปุตฺโต (สฺยา. ก.)] เถโร คาถํ อภาสิตฺถาติฯ

5. ทพฺพตฺเถรคาถา

[5]

‘‘โย ทุทฺทมิโย ทเมน ทนฺโต, ทพฺโพ สนฺตุสิโต วิติณฺณกงฺโข;

วิชิตาวี อเปตเภรโว หิ, ทพฺโพ โส ปรินิพฺพุโต ฐิตตฺโต’’ติฯ

อิตฺถํ สุทํ อายสฺมา ทพฺโพ เถโร คาถํ อภาสิตฺถาติฯ