11. ปาฏลิปุตฺตเปตวตฺถุ
[793]
‘‘ทิฏฺฐา ตยา นิรยา ติรจฺฉานโยนิ,
เปตา อสุรา อถวาปิ มานุสา เทวา; สยมทฺทส กมฺมวิปากมตฺตโน,
เนสฺสามิ ตํ ปาฏลิปุตฺตมกฺขตํ; ตตฺถ คนฺตฺวา กุสลํ กโรหิ กมฺมํ’’ฯ
[794]
‘‘อตฺถกาโมสิ เม ยกฺข, หิตกาโมสิ เทวเต;
กโรมิ ตุยฺหํ วจนํ, ตฺวํสิ อาจริโย มมฯ
[795]
‘‘ทิฏฺฐา มยา นิรยา ติรจฺฉานโยนิ, เปตา อสุรา อถวาปิ มานุสา เทวา;
สยมทฺทสํ กมฺมวิปากมตฺตโน, กาหามิ ปุญฺญานิ อนปฺปกานี’’ติฯ
ปาฏลิปุตฺตเปตวตฺถุ เอกาทสมํฯ
12. อมฺพวนเปตวตฺถุ
[796]
‘‘อยญฺจ เต โปกฺขรณี สุรมฺมา, สมา สุติตฺถา จ มโหทกา จ;
สุปุปฺผิตา ภมรคณานุกิณฺณา, กถํ ตยา ลทฺธา อยํ มนุญฺญาฯ
[797]
‘‘อิทญฺจ เต อมฺพวนํ สุรมฺมํ, สพฺโพตุกํ ธารยเต [ธารยติ (สฺยา. ก.)] ผลานิ;
สุปุปฺผิตํ ภมรคณานุกิณฺณํ, กถํ ตยา ลทฺธมิทํ วิมานํ’’ฯ
[798]
‘‘อมฺพปกฺกํ ทกํ [อมฺพปกฺโกทกํ (สี. สฺยา. ปี.), อมฺพปกฺกูทกํ (ก.)] ยาคุ, สีตจฺฉายา มโนรมา;
ธีตาย ทินฺนทาเนน, เตน เม อิธ ลพฺภติ’’ฯ
[799]
‘‘สนฺทิฏฺฐิกํ กมฺมํ เอวํ [สนฺทิฏฺฐิกํ เอว (สฺยา.)] ปสฺสถ, ทานสฺส ทมสฺส สํยมสฺส วิปากํ;
ทาสี อหํ อยฺยกุเลสุ หุตฺวา, สุณิสา โหมิ อคารสฺส อิสฺสรา’’ติฯ
อมฺพวนเปตวตฺถุ ทฺวาทสมํฯ
13. อกฺขรุกฺขเปตวตฺถุ
[800]
‘‘ยํ ททาติ น ตํ โหติ, เทเถว ทานํ ทตฺวา อุภยํ ตรติ;
อุภยํ เตน ทาเนน [เตน (ก.)] คจฺฉติ, ชาครถ มาปมชฺชถา’’ติฯ
อกฺขรุกฺขเปตวตฺถุ เตรสมํฯ
14. โภคสํหรเปตวตฺถุ
[801]
‘‘มยํ โภเค สํหริมฺห, สเมน วิสเมน จ;
เต อญฺเญ ปริภุญฺชนฺติ, มยํ ทุกฺขสฺส ภาคินี’’ติฯ
โภคสํหรเปตวตฺถุ จุทฺทสมํฯ
15. เสฏฺฐิปุตฺตเปตวตฺถุ
[802]
[ชา. 1.4.54 ชาตเกปิ] ‘‘สฏฺฐิวสฺสสหสฺสานิ, ปริปุณฺณานิ สพฺพโส;
นิรเย ปจฺจมานานํ, กทา อนฺโต ภวิสฺสติ’’ฯ
[803]
[ชา. 1.4.55 ชาตเกปิ] ‘‘นตฺถิ อนฺโต กุโต อนฺโต, น อนฺโต ปฏิทิสฺสติ;
ตถา หิ ปกตํ ปาปํ, ตุยฺหํ มยฺหญฺจ มาริสา [มม ตุยฺหญฺจ มาริส (สี. สฺยา. ปี.)]ฯ
[804]
[ชา. 1.4.53 ชาตเกปิ] ‘‘ทุชฺชีวิตมชีวมฺห , เย สนฺเต น ททมฺหเส;
สนฺเตสุ เทยฺยธมฺเมสุ, ทีปํ นากมฺห อตฺตโนฯ
[805]
[ชา. 1.4.56 ชาตเกปิ] ‘‘โสหํ นูน อิโต คนฺตฺวา, โยนิํ ลทฺธาน มานุสิํ;
วทญฺญู สีลสมฺปนฺโน, กาหามิ กุสลํ พหุ’’นฺติฯ
เสฏฺฐิปุตฺตเปตวตฺถุ ปนฺนรสมํฯ