11. ทุติยนาควิมานวตฺถุ
[968]
‘‘มหนฺตํ นาคํ อภิรุยฺห, สพฺพเสตํ คชุตฺตมํ;
วนา วนํ อนุปริยาสิ, นารีคณปุรกฺขโต;
โอภาเสนฺโต ทิสา สพฺพา, โอสธี วิย ตารกาฯ
[969]
‘‘เกน เตตาทิโส วณฺโณ…เป.…วณฺโณ จ เต สพฺพทิสา ปภาสตี’’ติฯ
[971]
โส เทวปุตฺโต อตฺตมโน, วงฺคีเสเนว ปุจฺฉิโต;
ปญฺหํ ปุฏฺโฐ วิยากาสิ, ยสฺส กมฺมสฺสิทํ ผลํฯ
[972]
‘‘อหํ มนุสฺเสสุ มนุสฺสภูโต, อุปาสโก จกฺขุมโต อโหสิํ;
ปาณาติปาตา วิรโต อโหสิํ, โลเก อทินฺนํ ปริวชฺชยิสฺสํฯ
[973]
‘‘อมชฺชโป โน จ มุสา อภาณิํ [อภาสิํ (สี. ก.)], สเกน ทาเรน จ ตุฏฺโฐ อโหสิํ;
อนฺนญฺจ ปานญฺจ ปสนฺนจิตฺโต, สกฺกจฺจ ทานํ วิปุลํ อทาสิํฯ
[974]
‘‘เตน เมตาทิโส วณฺโณ…เป.…วณฺโณ จ เม สพฺพทิสา ปภาสตี’’ติฯ
ทุติยนาควิมานํ เอกาทสมํฯ
12. ตติยนาควิมานวตฺถุ
[976]
‘‘โก นุ ทิพฺเพน ยาเนน, สพฺพเสเตน หตฺถินา;
ตุริยตาฬิตนิคฺโฆโส, อนฺตลิกฺเข มหียติฯ
[977]
‘‘เทวตา นุสิ คนฺธพฺโพ, อทุ [อาทุ (สี. สฺยา.)] สกฺโก ปุรินฺทโท;
อชานนฺตา ตํ ปุจฺฉาม, กถํ ชาเนมุ ตํ มย’’นฺติฯ
[978]
‘‘นมฺหิ เทโว น คนฺธพฺโพ, นาปิ [นามฺหิ (ก.)] สกฺโก ปุรินฺทโท;
สุธมฺมา นาม เย เทวา, เตสํ อญฺญตโร อห’’นฺติฯ
[979]
‘‘ปุจฺฉาม เทวํ สุธมฺมํ [เทว สุธมฺม (สฺยา.), เทว สุธมฺมํ (ก.)], ปุถุํ กตฺวาน อญฺชลิํ;
กิํ กตฺวา มานุเส กมฺมํ, สุธมฺมํ อุปปชฺชตี’’ติฯ
[980]
‘‘อุจฺฉาคารํ ติณาคารํ, วตฺถาคารญฺจ โย ทเท;
ติณฺณํ อญฺญตรํ ทตฺวา, สุธมฺมํ อุปปชฺชตี’’ติฯ
ตติยนาควิมานํ ทฺวาทสมํฯ
13. จูฬรถวิมานวตฺถุ
[981]
‘‘ทฬฺหธมฺมา นิสารสฺส, ธนุํ โอลุพฺภ ติฏฺฐสิ;
ขตฺติโย นุสิ ราชญฺโญ, อทุ ลุทฺโท วเนจโร’’ติ [วนาจโรติ (สฺยา. ก.)]ฯ
[982]
‘‘อสฺสกาธิปติสฺสาหํ , ภนฺเต ปุตฺโต วเนจโร;
นามํ เม ภิกฺขุ เต พฺรูมิ, สุชาโต อิติ มํ วิทู [วิทุํ (สี.)]ฯ
[983]
‘‘มิเค คเวสมาโนหํ, โอคาหนฺโต พฺรหาวนํ;
มิคํ ตญฺเจว [มิคํ คนฺเตฺวว (สฺยา.), มิควธญฺจ (ก.)] นาทฺทกฺขิํ, ตญฺจ ทิสฺวา ฐิโต อห’’นฺติฯ
[984]
‘‘สฺวาคตํ เต มหาปุญฺญ, อโถ เต อทุราคตํ;
เอตฺโต อุทกมาทาย, ปาเท ปกฺขาลยสฺสุ เตฯ
[985]
‘‘อิทมฺปิ ปานียํ สีตํ, อาภตํ คิริคพฺภรา;
ราชปุตฺต ตโต ปิตฺวา [ปีตฺวา (สี. สฺยา.)], สนฺถตสฺมิํ อุปาวิสา’’ติฯ
[986]
‘‘กลฺยาณี วต เต วาจา, สวนียา มหามุนิ;
เนลา อตฺถวตี [จตฺถวตี (สี.)] วคฺคุ, มนฺตฺวา [มนฺตา (สฺยา. ปี. ก.)] อตฺถญฺจ ภาสสิ [ภาสเส (สี.)]ฯ
[987]
‘‘กา เต รติ วเน วิหรโต, อิสินิสภ วเทหิ ปุฏฺโฐ;
ตว วจนปถํ นิสามยิตฺวา, อตฺถธมฺมปทํ สมาจเรมเส’’ติฯ
[988]