‘‘อิมาสาหํ [ตาสาหํ (สฺยา. ก.)] ธมฺมํ สุตฺวา [สุตฺวาน (สฺยา. ก.)], กาหามิ กุสลํ พหุํฯ
ทาเนน สมจริยาย, สญฺญเมน ทเมน จ;
สฺวาหํ ตตฺถ คมิสฺสามิ [ตตฺเถว คจฺฉามิ (ก.)], ยตฺถ คนฺตฺวา น โสจเร’’ติฯ
คุตฺติลวิมานํ ปญฺจมํฯ
6. ททฺทลฺลวิมานวตฺถุ
[619]
‘‘ททฺทลฺลมานา [ททฺทฬฺหมานา (ก.)] วณฺเณน, ยสสา จ ยสสฺสินี;
สพฺเพ เทเว ตาวติํเส, วณฺเณน อติโรจสิฯ
[620]
‘‘ทสฺสนํ นาภิชานามิ, อิทํ ปฐมทสฺสนํ;
กสฺมา กายา นุ อาคมฺม, นาเมน ภาสเส มม’’นฺติฯ
[621]
‘‘อหํ ภทฺเท สุภทฺทาสิํ, ปุพฺเพ มานุสเก ภเว;
สหภริยา จ เต อาสิํ, ภคินี จ กนิฏฺฐิกาฯ
[622]
‘‘สา อหํ กายสฺส เภทา, วิปฺปมุตฺตา ตโต จุตา;
นิมฺมานรตีนํ เทวานํ, อุปปนฺนา สหพฺยต’’นฺติฯ
[623]
‘‘ปหูตกตกลฺยาณา, เต เทเว ยนฺติ ปาณิโน;
เยสํ ตฺวํ กิตฺตยิสฺสสิ, สุภทฺเท ชาติมตฺตโนฯ
[624]
‘‘อถ [กถํ (สี. สฺยา.)] ตฺวํ เกน วณฺเณน, เกน วา อนุสาสิตา;
กีทิเสเนว ทาเนน, สุพฺพเตน ยสสฺสินีฯ
[625]
‘‘ยสํ เอตาทิสํ ปตฺตา, วิเสสํ วิปุลมชฺฌคา;
เทวเต ปุจฺฉิตาจิกฺข, กิสฺส กมฺมสฺสิทํ ผล’’นฺติฯ
[626]
‘‘อฏฺเฐว ปิณฺฑปาตานิ, ยํ ทานํ อททํ ปุเร;
ทกฺขิเณยฺยสฺส สงฺฆสฺส, ปสนฺนา เสหิ ปาณิภิฯ
[627]
‘‘เตน เมตาทิโส วณฺโณ…เป.…วณฺโณ จ เม สพฺพทิสา ปภาสตี’’ติฯ
[629]
‘‘อหํ ตยา พหุตเร ภิกฺขู, สญฺญเต พฺรหฺมจารโย [พฺรหฺมจริโน (สฺยา.), พฺรหฺมจาริเย (ปี. ก.)];
ตปฺเปสิํ อนฺนปาเนน, ปสนฺนา เสหิ ปาณิภิฯ
[630]
‘‘ตยา พหุตรํ ทตฺวา, หีนกายูปคา อหํ [อหุํ (ก. สี.)];
กถํ ตฺวํ อปฺปตรํ ทตฺวา, วิเสสํ วิปุลมชฺฌคา;
เทวเต ปุจฺฉิตาจิกฺข, กิสฺส กมฺมสฺสิทํ ผล’’นฺติฯ
[631]
‘‘มโนภาวนีโย ภิกฺขุ, สนฺทิฏฺโฐ เม ปุเร อหุ;
ตาหํ ภตฺเตน [ภทฺเท (ก.)] นิมนฺเตสิํ, เรวตํ อตฺตนฏฺฐมํฯ
[632]
‘‘โส เม อตฺถปุเรกฺขาโร, อนุกมฺปาย เรวโต;
สงฺเฆ เทหีติ มํโวจ, ตสฺสาหํ วจนํ กริํฯ
[633]
‘‘สา ทกฺขิณา สงฺฆคตา, อปฺปเมยฺเย ปติฏฺฐิตา;
ปุคฺคเลสุ ตยา ทินฺนํ, น ตํ ตว มหปฺผล’’นฺติฯ
[634]
‘‘อิทาเนวาหํ ชานามิ, สงฺเฆ ทินฺนํ มหปฺผลํ;
สาหํ คนฺตฺวา มนุสฺสตฺตํ, วทญฺญู วีตมจฺฉรา;
สงฺเฆ ทานานิ ทสฺสามิ [สงฺเฆ ทานํ ทสฺสามิหํ (สฺยา.)], อปฺปมตฺตา ปุนปฺปุน’’นฺติฯ
[635]
‘‘กา เอสา เทวตา ภทฺเท, ตยา มนฺตยเต สห;
สพฺเพ เทเว ตาวติํเส, วณฺเณน อติโรจตี’’ติฯ
[636]
‘‘มนุสฺสภูตา เทวินฺท, ปุพฺเพ มานุสเก ภเว;
สหภริยา จ เม อาสิ, ภคินี จ กนิฏฺฐิกา;
สงฺเฆ ทานานิ ทตฺวาน, กตปุญฺญา วิโรจตี’’ติฯ
[637]
‘‘ธมฺเมน ปุพฺเพ ภคินี, ตยา ภทฺเท วิโรจติ;
ยํ สงฺฆมฺหิ อปฺปเมยฺเย, ปติฏฺฐาเปสิ ทกฺขิณํฯ
[638]
‘‘ปุจฺฉิโต หิ มยา พุทฺโธ, คิชฺฌกูฏมฺหิ ปพฺพเต;
วิปากํ สํวิภาคสฺส, ยตฺถ ทินฺนํ มหปฺผลํฯ
[639]
‘‘ยชมานานํ มนุสฺสานํ, ปุญฺญเปกฺขาน ปาณินํ;
กโรตํ โอปธิกํ ปุญฺญํ, ยตฺถ ทินฺนํ มหปฺผลํฯ
[640]
‘‘ตํ เม พุทฺโธ วิยากาสิ, ชานํ กมฺมผลํ สกํ;
วิปากํ สํวิภาคสฺส, ยตฺถ ทินฺนํ มหปฺผลํฯ
[641]
[วิ. ว. 750; กถา. 798] ‘‘จตฺตาโร จ ปฏิปนฺนา, จตฺตาโร จ ผเล ฐิตา;
เอส สงฺโฆ อุชุภูโต, ปญฺญาสีลสมาหิโตฯ
[642]
[วิ. ว. 751; กถา. 798] ‘‘ยชมานานํ มนุสฺสานํ, ปุญฺญเปกฺขาน ปาณินํ;
กโรตํ โอปธิกํ ปุญฺญํ, สงฺเฆ ทินฺนํ มหปฺผลํฯ
[643]
[วิ. ว. 752; กถา. 798] ‘‘เอโส หิ สงฺโฆ วิปุโล มหคฺคโต, เอสปฺปเมยฺโย อุทธีว สาคโร;
เอเต หิ เสฏฺฐา นรวีรสาวกา, ปภงฺกรา ธมฺมมุทีรยนฺติ [ธมฺมกถํ อุทีรยนฺติ (สฺยา.)]ฯ
[644]
[วิ. ว. 753; กถา. 798] ‘‘เตสํ สุทินฺนํ สุหุตํ สุยิฏฺฐํ, เย สงฺฆมุทฺทิสฺส ททนฺติ ทานํ;
สา ทกฺขิณา สงฺฆคตา ปติฏฺฐิตา, มหปฺผลา โลกวิทูน [โลกวิทูหิ (สฺยา. ก.)] วณฺณิตาฯ
[645]
[วิ. ว. 754; กถา. 798] ‘‘เอตาทิสํ ยญฺญมนุสฺสรนฺตา [ปุญฺญมนุสฺสรนฺตา (สฺยา. ก.)], เย เวทชาตา วิจรนฺติ โลเก;
วิเนยฺย มจฺเฉรมลํ สมูลํ, อนินฺทิตา สคฺคมุเปนฺติ ฐาน’’นฺติฯ
ททฺทลฺลวิมานํ [ททฺทฬฺหวิมานํ (ก.)] ฉฏฺฐํฯ
7. เปสวตีวิมานวตฺถุ
[646]
‘‘ผลิกรชตเหมชาลฉนฺนํ , วิวิธจิตฺรตลมทฺทสํ สุรมฺมํ;
พฺยมฺหํ สุนิมฺมิตํ โตรณูปปนฺนํ, รุจกุปกิณฺณมิทํ สุภํ วิมานํฯ
[647]