‘‘สฏฺฐิวสฺสสหสฺสานิ [สฏฺฐิ สตสหสฺสานิ (?)], ติสฺโส จ วสฺสโกฏิโย;
อิธ ฐตฺวา มหามุนิ, อิโต จุตา คมิสฺสามิ;
มนุสฺสานํ สหพฺยต’’นฺติฯ
[245]
‘‘มา ตฺวํ อุโปสเถ ภายิ, สมฺพุทฺเธนาสิ พฺยากตา;
โสตาปนฺนา วิเสสยิ, ปหีนา ตว ทุคฺคตี’’ติฯ
อุโปสถาวิมานํ สตฺตมํฯ
8. นิทฺทาวิมานวตฺถุ
[246]
‘‘อภิกฺกนฺเตน วณฺเณน, ยา ตฺวํ ติฏฺฐสิ เทวเต;
โอภาเสนฺตี ทิสา สพฺพา, โอสธี วิย ตารกาฯ
[247]
‘‘เกน เตตาทิโส วณฺโณ…เป.…
วณฺโณ จ เต สพฺพทิสา ปภาสตี’’ติฯ
[249]
สา เทวตา อตฺตมนา…เป.… ยสฺส กมฺมสฺสิทํ ผลํฯ
[250]
‘‘นิทฺทาติ [สทฺธาติ (สี.)] มมํ อญฺญํสุ, ราชคหสฺมิํ อุปาสิกา;
สทฺธา สีเลน สมฺปนฺนา, สํวิภาครตา สทาฯ
[251]
‘‘อจฺฉาทนญฺจ ภตฺตญฺจ, เสนาสนํ ปทีปิยํ;
อทาสิํ อุชุภูเตสุ, วิปฺปสนฺเนน เจตสาฯ
[252]
‘‘จาตุทฺทสิํ ปญฺจทสิํ, ยา จ ปกฺขสฺส อฏฺฐมี;
ปาฏิหาริยปกฺขญฺจ, อฏฺฐงฺคสุสมาคตํฯ
[253]
‘‘อุโปสถํ อุปวสิสฺสํ, สทา สีเลสุ สํวุตา;
สญฺญมา สํวิภาคา จ, วิมานํ อาวสามหํฯ
[254]
‘‘ปาณาติปาตา วิรตา, มุสาวาทา จ สญฺญตา;
เถยฺยา จ อติจารา จ, มชฺชปานา จ อารกาฯ
[255]
‘‘ปญฺจสิกฺขาปเท รตา, อริยสจฺจาน โกวิทา;
อุปาสิกา จกฺขุมโต, โคตมสฺส ยสสฺสิโนฯ
[256]