‘‘ขีณาสวํ วิคตรชํ อเนชํ, เอกํ อรญฺญมฺหิ รโห นิสินฺนํ;
เทวิทฺธิปตฺตา อุปสงฺกมิตฺวา, วนฺทามิ ตํ วีร มหานุภาว’’นฺติฯ
[200]
‘‘สุวณฺณวณฺณา ชลิตา มหายสา, วิมานโมรุยฺห อเนกจิตฺตา;
ปริวาริตา อจฺฉราสงฺคเณน [อจฺฉรานํ คเณน (สี.)], กา ตฺวํ สุเภ เทวเต วนฺทเส มม’’นฺติฯ
[201]
‘‘อหํ ภทฺทนฺเต จณฺฑาลี, ตยา วีเรน [เถเรน (ก.)] เปสิตา;
วนฺทิํ อรหโต ปาเท, โคตมสฺส ยสสฺสิโนฯ
[202]
‘‘สาหํ วนฺทิตฺวา [วนฺทิตฺว (สี.)] ปาทานิ, จุตา จณฺฑาลโยนิยา;
วิมานํ สพฺพโต ภทฺทํ, อุปปนฺนมฺหิ นนฺทเนฯ
[203]
‘‘อจฺฉรานํ สตสหสฺสํ, ปุรกฺขตฺวาน [ปุรกฺขิตฺวา มํ (สฺยา. ก.)] ติฏฺฐติ;
ตาสาหํ ปวรา เสฏฺฐา, วณฺเณน ยสสายุนาฯ
[204]
‘‘ปหูตกตกลฺยาณา, สมฺปชานา ปฏิสฺสตา [ปติสฺสตา (สี. สฺยา.)];
มุนิํ การุณิกํ โลเก, ตํ ภนฺเต วนฺทิตุมาคตา’’ติฯ
[205]
อิทํ วตฺวาน จณฺฑาลี, กตญฺญู กตเวทินี;
วนฺทิตฺวา อรหโต ปาเท, ตตฺเถวนฺตรธายถาติ [ตตฺเถวนฺตรธายตีติ (สฺยา. ก.)]ฯ
จณฺฑาลิวิมานํ จตุตฺถํฯ
5. ภทฺทิตฺถิวิมานวตฺถุ
[206]
‘‘นีลา ปีตา จ กาฬา จ, มญฺชิฏฺฐา [มญฺเชฏฺฐา (สี.), มญฺชฏฺฐา (ปี.)] อถ โลหิตา;
อุจฺจาวจานํ วณฺณานํ, กิญฺชกฺขปริวาริตาฯ
[207]
‘‘มนฺทารวานํ ปุปฺผานํ, มาลํ ธาเรสิ มุทฺธนิ;
นยิเม อญฺเญสุ กาเยสุ, รุกฺขา สนฺติ สุเมธเสฯ
[208]
‘‘เกน กายํ อุปปนฺนา, ตาวติํสํ ยสสฺสินี;
เทวเต ปุจฺฉิตาจิกฺข, กิสฺส กมฺมสฺสิทํ ผล’’นฺติฯ
[209]
‘‘ภทฺทิตฺถิกาติ [ภทฺทิตฺถีติ (สี.)] มํ อญฺญํสุ, กิมิลายํ อุปาสิกา;
สทฺธา สีเลน สมฺปนฺนา, สํวิภาครตา สทาฯ
[210]
‘‘อจฺฉาทนญฺจ ภตฺตญฺจ, เสนาสนํ ปทีปิยํ;
อทาสิํ อุชุภูเตสุ, วิปฺปสนฺเนน เจตสาฯ
[211]
‘‘จาตุทฺทสิํ ปญฺจทสิํ, ยา จ ปกฺขสฺส อฏฺฐมี;
ปาฏิหาริยปกฺขญฺจ, อฏฺฐงฺคสุสมาคตํฯ
[212]
‘‘อุโปสถํ อุปวสิสฺสํ, สทา สีเลสุ สํวุตา;
สญฺญมา สํวิภาคา จ, วิมานํ อาวสามหํฯ
[213]
‘‘ปาณาติปาตา วิรตา, มุสาวาทา จ สญฺญตา;
เถยฺยา จ อติจารา จ, มชฺชปานา จ อารกาฯ
[214]
‘‘ปญฺจสิกฺขาปเท รตา, อริยสจฺจาน โกวิทา;
อุปาสิกา จกฺขุมโต, อปฺปมาทวิหารินีฯ
กตาวาสา กตกุสลา ตโต จุตา [กตาวกาสา กตกุสลา (ก.)],
สยํ ปภา อนุวิจรามิ นนฺทนํฯ
[215]
‘‘ภิกฺขู จาหํ ปรมหิตานุกมฺปเก, อโภชยิํ ตปสฺสิยุคํ มหามุนิํ;
กตาวาสา กตกุสลา ตโต จุตา [กตาวกาสา กตกุสลา (ก.)], สยํ ปภา อนุวิจรามิ นนฺทนํฯ
[216]
‘‘อฏฺฐงฺคิกํ อปริมิตํ สุขาวหํ, อุโปสถํ สตตมุปาวสิํ อหํ;
กตาวาสา กตกุสลา ตโต จุตา [กตาวกาสา กตกุสลา (ก.)], สยํ ปภา อนุวิจรามิ นนฺทน’’นฺติฯ
ภทฺทิตฺถิวิมานํ [ภทฺทิตฺถิกาวิมานํ (สฺยา.)] ปญฺจมํฯ
6. โสณทินฺนาวิมานวตฺถุ
[217]
‘‘อภิกฺกนฺเตน วณฺเณน, ยา ตฺวํ ติฏฺฐสิ เทวเต;
โอภาเสนฺตี ทิสา สพฺพา, โอสธี วิย ตารกาฯ
[218]
‘‘เกน เตตาทิโส วณฺโณ, เกน เต อิธ มิชฺฌติ;
อุปฺปชฺชนฺติ จ เต โภคา, เย เกจิ มนโส ปิยาฯ
[219]
‘‘ปุจฺฉามิ ตํ เทวิ มหานุภาเว, มนุสฺสภูตา กิมกาสิ ปุญฺญํ;
เกนาสิ เอวํ ชลิตานุภาวา, วณฺโณ จ เต สพฺพทิสา ปภาสตี’’ติฯ
[220]
สา เทวตา อตฺตมนา, โมคฺคลฺลาเนน ปุจฺฉิตา;
ปญฺหํ ปุฏฺฐา วิยากาสิ, ยสฺส กมฺมสฺสิทํ ผลํฯ
[221]
‘‘โสณทินฺนาติ มํ อญฺญํสุ, นาฬนฺทายํ อุปาสิกา;
สทฺธา สีเลน สมฺปนฺนา, สํวิภาครตา สทาฯ
[222]
‘‘อจฺฉาทนญฺจ ภตฺตญฺจ, เสนาสนํ ปทีปิยํ;
อทาสิํ อุชุภูเตสุ, วิปฺปสนฺเนน เจตสาฯ
[223]
‘‘จาตุทฺทสิํ ปญฺจทสิํ, ยา จ ปกฺขสฺส อฏฺฐมี;
ปาฏิหาริยปกฺขญฺจ, อฏฺฐงฺคสุสมาคตํฯ
[224]
‘‘อุโปสถํ อุปวสิสฺสํ, สทา สีเลสุ สํวุตา;
สญฺญมา สํวิภาคา จ, วิมานํ อาวสามหํฯ
[225]
‘‘ปาณาติปาตา วิรตา, มุสาวาทา จ สญฺญตา;
เถยฺยา จ อติจารา จ, มชฺชปานา จ อารกาฯ
[226]
‘‘ปญฺจสิกฺขาปเท รตา, อริยสจฺจาน โกวิทา;
อุปาสิกา จกฺขุมโต, โคตมสฺส ยสสฺสิโนฯ
[227]
‘‘เตน เมตาทิโส วณฺโณ…เป.…
วณฺโณ จ เม สพฺพทิสา ปภาสตี’’ติฯ
โสณทินฺนาวิมานํ ฉฏฺฐํฯ