‘‘คนฺตฺวาน เต สินฺธุโสวีรภูมิํ, ธนตฺถิกา อุทฺทยํ [อุทย (ปี. ก.)] ปตฺถยานา;

ยถาปโยคา ปริปุณฺณลาภา, ปจฺจาคมุํ ปาฏลิปุตฺตมกฺขตํฯ

[1280]

‘‘คนฺตฺวาน เต สงฺฆรํ โสตฺถิวนฺโต,

ปุตฺเตหิ ทาเรหิ สมงฺคิภูตา;

อานนฺที วิตฺตา [อานนฺทจิตฺตา (สฺยา.), อานนฺทีจิตฺตา (ก.)] สุมนา ปตีตา,

อกํสุ เสรีสมหํ อุฬารํ;

เสรีสกํ เต ปริเวณํ มาปยิํสุฯ

[1281]

เอตาทิสา สปฺปุริสาน เสวนา,

มหตฺถิกา ธมฺมคุณาน เสวนา;

เอกสฺส อตฺถาย อุปาสกสฺส,

สพฺเพว สตฺตา สุขิตา [สุขิโน (ปี. ก.)] อเหสุนฺติฯ

เสรีสกวิมานํ ทสมํฯ

11. สุนิกฺขิตฺตวิมานวตฺถุ

[1282]

‘‘อุจฺจมิทํ มณิถูณํ วิมานํ, สมนฺตโต ทฺวาทส โยชนานิ;

กูฏาคารา สตฺตสตา อุฬารา, เวฬุริยถมฺภา รุจกตฺถตา สุภาฯ

[1283]

‘‘ตตฺถจฺฉสิ ปิวสิ ขาทสิ จ, ทิพฺพา จ วีณา ปวทนฺติ วคฺคุํ;

ทิพฺพา รสา กามคุเณตฺถ ปญฺจ, นาริโย จ นจฺจนฺติ สุวณฺณฉนฺนาฯ

[1284]

‘‘เกน เตตาทิโส วณฺโณ, เกน เต อิธ มิชฺฌติ;

อุปฺปชฺชนฺติ จ เต โภคา, เย เกจิ มนโส ปิยาฯ

[1285]

‘‘ปุจฺฉามิ ‘ตํ เทว มหานุภาว, มนุสฺสภูโต กิมกาสิ ปุญฺญํ;

เกนาสิ เอวํ ชลิตานุภาโว, วณฺโณ จ เต สพฺพทิสา ปภาสตี’’ติฯ

[1286]

โส เทวปุตฺโต อตฺตมโน, โมคฺคลฺลาเนน ปุจฺฉิโต;

ปญฺหํ ปุฏฺโฐ วิยากาสิ, ยสฺส กมฺมสฺสิทํ ผลํฯ

[1287]

‘‘ทุนฺนิกฺขิตฺตํ มาลํ สุนิกฺขิปิตฺวา, ปติฏฺฐเปตฺวา สุคตสฺส ถูเป;

มหิทฺธิโก จมฺหิ มหานุภาโว, ทิพฺเพหิ กาเมหิ สมงฺคิภูโตฯ

[1288]

‘‘เตน เมตาทิโส วณฺโณ,

เตน เม อิธ มิชฺฌติ;

อุปฺปชฺชนฺติ จ เม โภคา,

เย เกจิ มนโส ปิยาฯ

[1289]

‘‘อกฺขามิ เต ภิกฺขุ มหานุภาว,

มนุสฺสภูโต ยมหํ อกาสิํ;

เตนมฺหิ เอวํ ชลิตานุภาโว,

วณฺโณ จ เม สพฺพทิสา ปภาสตี’’ติฯ

สุนิกฺขิตฺตวิมานํ เอกาทสมํฯ

สุนิกฺขิตฺตวคฺโค สตฺตโม นิฏฺฐิโตฯ

ตสฺสุทฺทานํ –

ทฺเว ทลิทฺทา วนวิหารา, ภตโก โคปาลกณฺฑกา;

อเนกวณฺณมฏฺฐกุณฺฑลี, เสรีสโก สุนิกฺขิตฺตํ;

ปุริสานํ ตติโย วคฺโค ปวุจฺจตีติฯ

ภาณวารํ จตุตฺถํ นิฏฺฐิตํฯ

วิมานวตฺถุปาฬิ นิฏฺฐิตาฯ