‘‘อหํ มนุสฺเสสุ มนุสฺสภูโต, วิวเน ปเถ สงฺกมนํ [จงฺกมนํ (สี.), จงฺกมํ (สฺยา.), สมกํ (ก. สี.)] อกาสิํ;
อารามรุกฺขานิ จ โรปยิสฺสํ, ปิยา จ เม สีลวนฺโต อเหสุํ;
อนฺนญฺจ ปานญฺจ ปสนฺนจิตฺโต, สกฺกจฺจ ทานํ วิปุลํ อทาสิํฯ
[1132]
‘‘เตน เมตาทิโส วณฺโณ…เป.… วณฺโณ จ เม สพฺพทิสา ปภาสตี’’ติฯ
มณิถูณวิมานํ ตติยํฯ
4. สุวณฺณวิมานวตฺถุ
[1134]
‘‘โสวณฺณมเย ปพฺพตสฺมิํ, วิมานํ สพฺพโตปภํ;
เหมชาลปฏิจฺฉนฺนํ [เหมชาลกปจฺฉนฺนํ (สี.)], กิงฺกิณิ [กิงฺกณิก (สฺยา. ก.), กิงฺกิณิก (ปี.)] ชาลกปฺปิตํฯ
[1135]
‘‘อฏฺฐํสา สุกตา ถมฺภา, สพฺเพ เวฬุริยามยา;
เอกเมกาย อํสิยา, รตนา สตฺต นิมฺมิตาฯ
[1136]
‘‘เวฬุริยสุวณฺณสฺส, ผลิกา รูปิยสฺส จ;
มสารคลฺลมุตฺตาหิ, โลหิตงฺคมณีหิ จฯ
[1137]
‘‘จิตฺรา มโนรมา ภูมิ, น ตตฺถุทฺธํสตี รโช;
โคปาณสีคณา ปีตา, กูฏํ ธาเรนฺติ นิมฺมิตาฯ
[1138]
‘‘โสปาณานิ จ จตฺตาริ, นิมฺมิตา จตุโร ทิสา;
นานารตนคพฺเภหิ , อาทิจฺโจว วิโรจติฯ
[1139]
‘‘เวทิยา จตสฺโส ตตฺถ, วิภตฺตา ภาคโส มิตา;
ททฺทลฺลมานา อาภนฺติ, สมนฺตา จตุโร ทิสาฯ
[1140]
‘‘ตสฺมิํ วิมาเน ปวเร, เทวปุตฺโต มหปฺปโภ;
อติโรจสิ วณฺเณน, อุทยนฺโตว ภาณุมาฯ
[1141]
‘‘ทานสฺส เต อิทํ ผลํ, อโถ สีลสฺส วา ปน;
อโถ อญฺชลิกมฺมสฺส, ตํ เม อกฺขาหิ ปุจฺฉิโต’’ฯ
[1142]
โส เทวปุตฺโต อตฺตมโน…เป.… ยสฺส กมฺมสฺสิทํ ผลํฯ
[1143]
‘‘อหํ อนฺธกวินฺทสฺมิํ, พุทฺธสฺสาทิจฺจพนฺธุโน;
วิหารํ สตฺถุ กาเรสิํ, ปสนฺโน เสหิ ปาณิภิฯ
[1144]
‘‘ตตฺถ คนฺธญฺจ มาลญฺจ, ปจฺจยญฺจ [ปจฺจคฺคญฺจ (สี.), ปจฺจคฺฆญฺจ (?)] วิเลปนํ;
วิหารํ สตฺถุ อทาสิํ, วิปฺปสนฺเนน เจตสา;
เตน มยฺหํ อิทํ ลทฺธํ, วสํ วตฺเตมิ นนฺทเนฯ
[1145]
‘‘นนฺทเน จ วเน [นนฺทเน ปวเน (สี. สฺยา.)] รมฺเม, นานาทิชคณายุเต;
รมามิ นจฺจคีเตหิ, อจฺฉราหิ ปุรกฺขโต’’ติฯ
สุวณฺณวิมานํ จตุตฺถํฯ
5. อมฺพวิมานวตฺถุ
[1146]
‘‘อุจฺจมิทํ มณิถูณํ วิมานํ, สมนฺตโต ทฺวาทส โยชนานิ;
กูฏาคารา สตฺตสตา อุฬารา, เวฬุริยถมฺภา รุจกตฺถตา สุภาฯ
[1147]
‘‘ตตฺถจฺฉสิ ปิวสิ ขาทสิ จ, ทิพฺพา จ วีณา ปวทนฺติ วคฺคุํ;
ทิพฺพา รสา กามคุเณตฺถ ปญฺจ, นาริโย จ นจฺจนฺติ สุวณฺณฉนฺนาฯ
[1148]
‘‘เกน เตตาทิโส วณฺโณ…เป.… วณฺโณ จ เต สพฺพทิสา ปภาสตี’’ติฯ
[1150]
โส เทวปุตฺโต อตฺตมโน…เป.… ยสฺส กมฺมสฺสิทํ ผลํฯ
[1151]