‘‘มาลํ น ธาเร น จ คนฺธมาจเร, มญฺเจ ฉมายํ ว สเยถ สนฺถเต;
เอตญฺหิ อฏฺฐงฺคิกมาหุโปสถํ, พุทฺเธน ทุกฺขนฺตคุนา ปกาสิตํฯ
[404]
‘‘ตโต จ ปกฺขสฺสุปวสฺสุโปสถํ, จาตุทฺทสิํ ปญฺจทสิญฺจ อฏฺฐมิํ;
ปาฏิหาริยปกฺขญฺจ ปสนฺนมานโส, อฏฺฐงฺคุเปตํ สุสมตฺตรูปํฯ
[405]
‘‘ตโต จ ปาโต อุปวุตฺถุโปสโถ, อนฺเนน ปาเนน จ ภิกฺขุสงฺฆํ;
ปสนฺนจิตฺโต อนุโมทมาโน, ยถารหํ สํวิภเชถ วิญฺญูฯ
[406]
‘‘ธมฺเมน มาตาปิตโร ภเรยฺย, ปโยชเย ธมฺมิกํ โส วณิชฺชํ;
เอตํ คิหี วตฺตยมปฺปมตฺโต, สยมฺปเภ นาม อุเปติ เทเว’’ติฯ
ธมฺมิกสุตฺตํ จุทฺทสมํ นิฏฺฐิตํฯ
จูฬวคฺโค ทุติโย นิฏฺฐิโตฯ
ตสฺสุทฺทานํ –
รตนามคนฺโธ หิริ จ, มงฺคลํ สูจิโลเมน;
ธมฺมจริยญฺจ พฺราหฺมโณ [กปิโล พฺราหฺมโณปิ จ (สฺยา. ก.)], นาวา กิํสีลมุฏฺฐานํฯ
ราหุโล ปุน กปฺโป จ, ปริพฺพาชนิยํ ตถา;
ธมฺมิกญฺจ วิทุโน อาหุ, จูฬวคฺคนฺติ จุทฺทสาติฯ
3. มหาวคฺโค
1. ปพฺพชฺชาสุตฺตํ
[407]
ปพฺพชฺชํ กิตฺตยิสฺสามิ, ยถา ปพฺพชิ จกฺขุมา;
ยถา วีมํสมาโน โส, ปพฺพชฺชํ สมโรจยิฯ
[408]
สมฺพาโธยํ ฆราวาโส, รชสฺสายตนํ อิติ;
อพฺโภกาโสว ปพฺพชฺชา, อิติ ทิสฺวาน ปพฺพชิฯ
[409]
ปพฺพชิตฺวาน กาเยน, ปาปกมฺมํ วิวชฺชยิ;
วจีทุจฺจริตํ หิตฺวา, อาชีวํ ปริโสธยิฯ
[410]
อคมา ราชคหํ พุทฺโธ, มคธานํ คิริพฺพชํ;
ปิณฺฑาย อภิหาเรสิ, อากิณฺณวรลกฺขโณฯ
[411]
ตมทฺทสา พิมฺพิสาโร, ปาสาทสฺมิํ ปติฏฺฐิโต;
ทิสฺวา ลกฺขณสมฺปนฺนํ, อิมมตฺถํ อภาสถฯ
[412]
‘‘อิมํ โภนฺโต นิสาเมถ, อภิรูโป พฺรหา สุจิ;
จรเณน จ สมฺปนฺโน, ยุคมตฺตญฺจ เปกฺขติฯ
[413]
‘‘โอกฺขิตฺตจกฺขุ สติมา, นายํ นีจกุลามิว;
ราชทูตาภิธาวนฺตุ, กุหิํ ภิกฺขุ คมิสฺสติ’’ฯ
[414]
เต เปสิตา ราชทูตา, ปิฏฺฐิโต อนุพนฺธิสุํ;
กุหิํ คมิสฺสติ ภิกฺขุ, กตฺถ วาโส ภวิสฺสติฯ
[415]
สปทานํ จรมาโน, คุตฺตทฺวาโร สุสํวุโต;
ขิปฺปํ ปตฺตํ อปูเรสิ, สมฺปชาโน ปฏิสฺสโตฯ
[416]
ปิณฺฑจารํ จริตฺวาน, นิกฺขมฺม นครา มุนิ;
ปณฺฑวํ อภิหาเรสิ, เอตฺถ วาโส ภวิสฺสติฯ
[417]
ทิสฺวาน วาสูปคตํ, ตโย [ตโต (สี. ปี.)] ทูตา อุปาวิสุํ;
เตสุ เอโกว [เอโก จ ทูโต (สี. สฺยา. ปี.)] อาคนฺตฺวา, ราชิโน ปฏิเวทยิฯ
[418]