230. สงฺเฆ ภินฺเน จีวรุปฺปาทกถา

[376] อิธ ปน, ภิกฺขเว, วสฺสํวุฏฺฐานํ ภิกฺขูนํ อนุปฺปนฺเน จีวเร สงฺโฆ ภิชฺชติฯ ตตฺถ มนุสฺสา เอกสฺมิํ ปกฺเข อุทกํ เทนฺติ, เอกสฺมิํ ปกฺเข จีวรํ เทนฺติ – สงฺฆสฺส เทมาติฯ สงฺฆสฺเสเวตํฯ

อิธ ปน, ภิกฺขเว, วสฺสํวุฏฺฐานํ ภิกฺขูนํ อนุปฺปนฺเน จีวเร สงฺโฆ ภิชฺชติฯ ตตฺถ มนุสฺสา เอกสฺมิํ ปกฺเข อุทกํ เทนฺติ, ตสฺมิํเยว ปกฺเข จีวรํ เทนฺติ – สงฺฆสฺส เทมาติฯ สงฺฆสฺเสเวตํฯ

อิธ ปน, ภิกฺขเว, วสฺสํวุฏฺฐานํ ภิกฺขูนํ อนุปฺปนฺเน จีวเร สงฺโฆ ภิชฺชติฯ ตตฺถ มนุสฺสา เอกสฺมิํ ปกฺเข อุทกํ เทนฺติ, เอกสฺมิํ ปกฺเข จีวรํ เทนฺติ – ปกฺขสฺส เทมาติฯ ปกฺขสฺเสเวตํฯ

อิธ ปน, ภิกฺขเว, วสฺสํวุฏฺฐานํ ภิกฺขูนํ อนุปฺปนฺเน จีวเร สงฺโฆ ภิชฺชติฯ ตตฺถ มนุสฺสา เอกสฺมิํ ปกฺเข อุทกํ เทนฺติ, ตสฺมิํเยว ปกฺเข จีวรํ เทนฺติ – ปกฺขสฺส เทมาติฯ ปกฺขสฺเสเวตํฯ

อิธ ปน, ภิกฺขเว, วสฺสํวุฏฺฐานํ ภิกฺขูนํ อุปฺปนฺเน จีวเร อภาชิเต สงฺโฆ ภิชฺชติฯ สพฺเพสํ สมกํ ภาเชตพฺพนฺติฯ

สงฺเฆ ภินฺเน จีวรุปฺปาทกถา นิฏฺฐิตาฯ

231. ทุคฺคหิตสุคฺคหิตาทิกถา

[377] เตน โข ปน สมเยน อายสฺมา เรวโต อญฺญตรสฺส ภิกฺขุโน หตฺเถ อายสฺมโต สาริปุตฺตสฺส จีวรํ ปาเหสิ – ‘‘อิมํ จีวรํ เถรสฺส เทหี’’ติฯ อถ โข โส ภิกฺขุ อนฺตรามคฺเค อายสฺมโต เรวตสฺส วิสฺสาสา ตํ จีวรํ อคฺคเหสิฯ อถ โข อายสฺมา เรวโต อายสฺมตา สาริปุตฺเตน สมาคนฺตฺวา ปุจฺฉิ – ‘‘อหํ, ภนฺเต, เถรสฺส จีวรํ ปาเหสิํฯ สมฺปตฺตํ ตํ จีวร’’นฺติ? ‘‘นาหํ ตํ, อาวุโส, จีวรํ ปสฺสามี’’ติฯ อถ โข อายสฺมา เรวโต ตํ ภิกฺขุํ เอตทโวจ – ‘‘อหํ, อาวุโส , อายสฺมโต หตฺเถ เถรสฺส จีวรํ ปาเหสิํฯ กหํ ตํ จีวร’’นฺติ? ‘‘อหํ, ภนฺเต, อายสฺมโต วิสฺสาสา ตํ จีวรํ อคฺคเหสิ’’นฺติฯ ภควโต เอตมตฺถํ อาโรเจสุํฯ

[378] อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติฯ โส อนฺตรามคฺเค โย ปหิณติ ตสฺส วิสฺสาสา คณฺหาติฯ สุคฺคหิตํฯ ยสฺส ปหิยฺยติ ตสฺส วิสฺสาสา คณฺหาติฯ ทุคฺคหิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติฯ โส อนฺตรามคฺเค ยสฺส ปหิยฺยติ ตสฺส วิสฺสาสา คณฺหาติฯ ทุคฺคหิตํฯ โย ปหิณติ ตสฺส วิสฺสาสา คณฺหาติฯ สุคฺคหิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติฯ โส อนฺตรามคฺเค สุณาติ – โย ปหิณติ โส กาลงฺกโตติฯ ตสฺส มตกจีวรํ อธิฏฺฐาติฯ สฺวาธิฏฺฐิตํฯ ยสฺส ปหิยฺยติ ตสฺส วิสฺสาสา คณฺหาติฯ ทุคฺคหิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติฯ โส อนฺตรามคฺเค สุณาติ – ยสฺส ปหิยฺยติ โส กาลงฺกโตติฯ ตสฺส มตกจีวรํ อธิฏฺฐาติฯ ทฺวาธิฏฺฐิตํฯ โย ปหิณติ ตสฺส วิสฺสาสา คณฺหาติฯ สุคฺคหิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติฯ โส อนฺตรามคฺเค สุณาติ – อุโภ กาลงฺกตาติฯ โย ปหิณติ ตสฺส มตกจีวรํ อธิฏฺฐาติฯ สฺวาธิฏฺฐิตํฯ ยสฺส ปหิยฺยติ ตสฺส มตกจีวรํ อธิฏฺฐาติฯ ทฺวาธิฏฺฐิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติฯ โส อนฺตรามคฺเค โย ปหิณติ ตสฺส วิสฺสาสา คณฺหาติฯ ทุคฺคหิตํฯ ยสฺส ปหิยฺยติ ตสฺส วิสฺสาสา คณฺหาติฯ สุคฺคหิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติฯ โส อนฺตรามคฺเค ยสฺส ปหิยฺยติ ตสฺส วิสฺสาสา คณฺหาติฯ สุคฺคหิตํฯ โย ปหิณติ ตสฺส วิสฺสาสา คณฺหาติฯ ทุคฺคหิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติฯ

โส อนฺตรามคฺเค สุณาติ – ‘‘โย ปหิณติ โส กาลงฺกโต’’ติฯ ตสฺส มตกจีวรํ อธิฏฺฐาติฯ ทฺวาธิฏฺฐิตํฯ ยสฺส ปหิยฺยติ ตสฺส วิสฺสาสา คณฺหาติฯ สุคฺคหิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติฯ โส อนฺตรามคฺเค สุณาติ – ‘‘ยสฺส ปหิยฺยติ โส กาลงฺกโต’’ติฯ ตสฺส มตกจีวรํ อธิฏฺฐาติฯ สฺวาธิฏฺฐิตํฯ โย ปหิณติ ตสฺส วิสฺสาสา คณฺหาติฯ ทุคฺคหิตํฯ

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติฯ โส อนฺตรามคฺเค สุณาติ ‘‘อุโภ กาลงฺกตา’’ติฯ โย ปหิณติ ตสฺส มตกจีวรํ อธิฏฺฐาติฯ ทฺวาธิฏฺฐิตํฯ ยสฺส ปหิยฺยติ ตสฺส มตกจีวรํ อธิฏฺฐาติฯ สฺวาธิฏฺฐิตํฯ

ทุคฺคหิตสุคฺคหิตาทิกถา นิฏฺฐิตาฯ

232. อฏฺฐจีวรมาติกา

[379] อฏฺฐิมา , ภิกฺขเว, มาติกา จีวรสฺส อุปฺปาทาย – สีมาย เทติ , กติกาย เทติ, ภิกฺขาปญฺญตฺติยา เทติ, สงฺฆสฺส เทติ, อุภโตสงฺฆสฺส เทติ, วสฺสํวุฏฺฐสงฺฆสฺส เทติ, อาทิสฺส เทติ, ปุคฺคลสฺส เทติฯ

สีมาย เทติ – ยาวติกา ภิกฺขู อนฺโตสีมคตา เตหิ ภาเชตพฺพํฯ กติกาย เทติ – สมฺพหุลา อาวาสา สมานลาภา โหนฺติ เอกสฺมิํ อาวาเส ทินฺเน สพฺพตฺถ ทินฺนํ โหติฯ ภิกฺขาปญฺญตฺติยา เทติ, ยตฺถ สงฺฆสฺส ธุวการา กริยฺยนฺติ, ตตฺถ เทติฯ สงฺฆสฺส เทติ, สมฺมุขีภูเตน สงฺเฆน ภาเชตพฺพํฯ อุภโตสงฺฆสฺส เทติ, พหุกาปิ ภิกฺขู โหนฺติ, เอกา ภิกฺขุนี โหติ, อุปฑฺฒํ ทาตพฺพํ, พหุกาปิ ภิกฺขุนิโย โหนฺติ, เอโก ภิกฺขุ โหติ, อุปฑฺฒํ ทาตพฺพํฯ วสฺสํวุฏฺฐสงฺฆสฺส เทติ, ยาวติกา ภิกฺขู ตสฺมิํ อาวาเส วสฺสํวุฏฺฐา, เตหิ ภาเชตพฺพํฯ อาทิสฺส เทติ, ยาคุยา วา ภตฺเต วา ขาทนีเย วา จีวเร วา เสนาสเน วา เภสชฺเช วา ฯ ปุคฺคลสฺส เทติ, ‘‘อิมํ จีวรํ อิตฺถนฺนามสฺส ทมฺมี’’ติฯ

อฏฺฐจีวรมาติกา นิฏฺฐิตาฯ

จีวรกฺขนฺธโก อฏฺฐโมฯ