ภิกฺขุ อตฺถตกถิโน ผาสุวิหาริโก จีวรํ อาทาย ปกฺกมติ – ‘‘อมุกํ นาม อาวาสํ คมิสฺสามิ; ตตฺถ เม ผาสุ ภวิสฺสติ วสิสฺสามิ, โน เจ เม ผาสุ ภวิสฺสติ, อมุกํ นาม อาวาสํ คมิสฺสามิ; ตตฺถ เม ผาสุ ภวิสฺสติ วสิสฺสามิ, โน เจ เม ผาสุ ภวิสฺสติ, อมุกํ นาม อาวาสํ คมิสฺสามิ; ตตฺถ เม ผาสุ ภวิสฺสติ วสิสฺสามิ, โน เจ เม ผาสุ ภวิสฺสติ, ปจฺเจสฺส’’นฺติฯ โส พหิสีมคโต ตํ จีวรํ กาเรติฯ โส กตจีวโร ‘‘ปจฺเจสฺสํ ปจฺเจสฺส’’นฺติ สมฺภุณาติ กถินุทฺธารํฯ ตสฺส ภิกฺขุโน สห ภิกฺขูหิ กถินุทฺธาโรฯ
ผาสุวิหารปญฺจกํ นิฏฺฐิตํฯ
200. ปลิโพธาปลิโพธกถา
[325] ทฺเวเม , ภิกฺขเว, กถินสฺส ปลิโพธา, ทฺเว อปลิโพธาฯ กตเม จ, ภิกฺขเว, ทฺเว กถินสฺส ปลิโพธา? อาวาสปลิโพโธ จ จีวรปลิโพโธ จฯ กถญฺจ, ภิกฺขเว, อาวาสปลิโพโธ โหติ? อิธ, ภิกฺขเว, ภิกฺขุ วสติ วา ตสฺมิํ อาวาเส, สาเปกฺโข วา ปกฺกมติ ‘‘ปจฺเจสฺส’’นฺติฯ เอวํ โข, ภิกฺขเว, อาวาสปลิโพโธ โหติฯ กถญฺจ, ภิกฺขเว, จีวรปลิโพโธ โหติ? อิธ, ภิกฺขเว, ภิกฺขุโน จีวรํ อกตํ วา โหติ วิปฺปกตํ วา, จีวราสา วา อนุปจฺฉินฺนาฯ เอวํ โข, ภิกฺขเว, จีวรปลิโพโธ โหติฯ อิเม โข, ภิกฺขเว, ทฺเว กถินสฺส ปลิโพธาฯ
กตเม จ, ภิกฺขเว, ทฺเว กถินสฺส อปลิโพธา? อาวาสอปลิโพโธ จ จีวรอปลิโพโธ จฯ กถญฺจ, ภิกฺขเว, อาวาสอปลิโพโธ โหติ? อิธ, ภิกฺขเว, ภิกฺขุ ปกฺกมติ ตมฺหา อาวาสา จตฺเตน วนฺเตน มุตฺเตน อนเปกฺโข [อนเปกฺเขน (ก.)] ‘‘น ปจฺเจสฺส’’นฺติฯ เอวํ โข, ภิกฺขเว, อาวาสอปลิโพโธ โหติฯ
กถญฺจ, ภิกฺขเว, จีวรอปลิโพโธ โหติ? อิธ, ภิกฺขเว, ภิกฺขุโน จีวรํ กตํ วา โหติ, นฏฺฐํ วา วินฏฺฐํ วา ทฑฺฒํ วา, จีวราสา วา อุปจฺฉินฺนาฯ เอวํ โข, ภิกฺขเว, จีวรอปลิโพโธ โหติฯ อิเม โข, ภิกฺขเว, ทฺเว กถินสฺส อปลิโพธาติฯ
ปลิโพธาปลิโพธกถา นิฏฺฐิตาฯ
กถินกฺขนฺธโก นิฏฺฐิโต สตฺตโมฯ
201. ตสฺสุทฺทานํ
ติํส ปาเวยฺยกา ภิกฺขู, สาเกตุกฺกณฺฐิตา วสุํ;
วสฺสํวุฏฺโฐกปุณฺเณหิ, อคมุํ ชินทสฺสนํฯ
อิทํ วตฺถุ กถินสฺส, กปฺปิสฺสนฺติ จ ปญฺจกา;
อนามนฺตา อสมาจารา, ตเถว คณโภชนํฯ
ยาวทตฺถญฺจ อุปฺปาโท, อตฺถตานํ ภวิสฺสติ;
ญตฺติ เอวตฺถตญฺเจว, เอวญฺเจว อนตฺถตํฯ
อุลฺลิขิ โธวนา เจว, วิจารณญฺจ เฉทนํ;
พนฺธโน วฏฺฏิ กณฺฑุส, ทฬฺหีกมฺมานุวาติกาฯ
ปริภณฺฑํ โอวทฺเธยฺยํ, มทฺทนา นิมิตฺตํ กถา;
กุกฺกุ สนฺนิธิ นิสฺสคฺคิ, น กปฺปญฺญตฺร เต ตโยฯ
อญฺญตฺร ปญฺจาติเรเก, สญฺฉินฺเนน สมณฺฑลี;
นาญฺญตฺร ปุคฺคลา สมฺมา, นิสฺสีมฏฺโฐนุโมทติฯ
กถินานตฺถตํ โหติ, เอวํ พุทฺเธน เทสิตํ;
อหตากปฺปปิโลติ, ปํสุ ปาปณิกาย จฯ
อนิมิตฺตาปริกถา, อกุกฺกุ จ อสนฺนิธิ;
อนิสฺสคฺคิ กปฺปกเต, ตถา ติจีวเรน จฯ
ปญฺจเก วาติเรเก วา, ฉินฺเน สมณฺฑลีกเต;
ปุคฺคลสฺสตฺถารา สมฺมา, สีมฏฺโฐ อนุโมทติฯ
เอวํ กถินตฺถรณํ, อุพฺภารสฺสฏฺฐมาติกา;
ปกฺกมนนฺติ นิฏฺฐานํ, สนฺนิฏฺฐานญฺจ นาสนํฯ
