57. นปพฺพาเชตพฺพทฺวตฺติํสวาโร

[119] เตน โข ปน สมเยน ภิกฺขู หตฺถจฺฉินฺนํ ปพฺพาเชนฺติ…เป.… ปาทจฺฉินฺนํ ปพฺพาเชนฺติ…เป.… หตฺถปาทจฺฉินฺนํ ปพฺพาเชนฺติ…เป.… กณฺณจฺฉินฺนํ ปพฺพาเชนฺติ…เป.… นาสจฺฉินฺนํ ปพฺพาเชนฺติ…เป.… กณฺณนาสจฺฉินฺนํ ปพฺพาเชนฺติ…เป.… องฺคุลิจฺฉินฺนํ ปพฺพาเชนฺติ…เป.… อฬจฺฉินฺนํ ปพฺพาเชนฺติ…เป.… กณฺฑรจฺฉินฺนํ ปพฺพาเชนฺติ…เป.… ผณหตฺถกํ ปพฺพาเชนฺติ…เป.… ขุชฺชํ ปพฺพาเชนฺติ…เป.… วามนํ ปพฺพาเชนฺติ…เป.… คลคณฺฑิํ ปพฺพาเชนฺติ…เป.… ลกฺขณาหตํ ปพฺพาเชนฺติ…เป.… กสาหตํ ปพฺพาเชนฺติ…เป.… ลิขิตกํ ปพฺพาเชนฺติ…เป.… สีปทิํ ปพฺพาเชนฺติ…เป.… ปาปโรคิํ ปพฺพาเชนฺติ…เป.… ปริสทูสกํ ปพฺพาเชนฺติ…เป.… กาณํ ปพฺพาเชนฺติ…เป.… กุณิํ ปพฺพาเชนฺติ…เป.… ขญฺชํ ปพฺพาเชนฺติ…เป.… ปกฺขหตํ ปพฺพาเชนฺติ…เป.… ฉินฺนิริยาปถํ ปพฺพาเชนฺติ…เป.… ชราทุพฺพลํ ปพฺพาเชนฺติ…เป.… อนฺธํ ปพฺพาเชนฺติ…เป.… มูคํ ปพฺพาเชนฺติ…เป.… พธิรํ ปพฺพาเชนฺติ…เป.… อนฺธมูคํ ปพฺพาเชนฺติ…เป.… อนฺธพธิรํ ปพฺพาเชนฺติ…เป.… มูคพธิรํ ปพฺพาเชนฺติ…เป.… อนฺธมูคพธิรํ ปพฺพาเชนฺติฯ ภควโต เอตมตฺถํ อาโรเจสุํ…เป.… น, ภิกฺขเว, หตฺถจฺฉินฺโน ปพฺพาเชตพฺโพ…เป.… น, ภิกฺขเว, ปาทจฺฉินฺโน ปพฺพาเชตพฺโพ…เป.… น, ภิกฺขเว, หตฺถปาทจฺฉินฺโน ปพฺพาเชตพฺโพ…เป.… น, ภิกฺขเว, กณฺณจฺฉินฺโน ปพฺพาเชตพฺโพ…เป.… น, ภิกฺขเว, นาสจฺฉินฺโน ปพฺพาเชตพฺโพ…เป.… น, ภิกฺขเว, กณฺณนาสจฺฉินฺโน ปพฺพาเชตพฺโพ…เป.… น, ภิกฺขเว, องฺคุลิจฺฉินฺโน ปพฺพาเชตพฺโพ…เป.… น, ภิกฺขเว, อฬจฺฉินฺโน ปพฺพาเชตพฺโพ…เป.… น, ภิกฺขเว, กณฺฑรจฺฉินฺโน ปพฺพาเชตพฺโพ…เป.… น, ภิกฺขเว, ผณหตฺถโก ปพฺพาเชตพฺโพ…เป.… น, ภิกฺขเว, ขุชฺโช ปพฺพาเชตพฺโพ…เป.… น, ภิกฺขเว, วามโน ปพฺพาเชตพฺโพ…เป.… น, ภิกฺขเว, คลคณฺฑี ปพฺพาเชตพฺโพ…เป.… น, ภิกฺขเว, ลกฺขณาหโต ปพฺพาเชตพฺโพ…เป.… น, ภิกฺขเว, กสาหโต ปพฺพาเชตพฺโพ…เป.… น, ภิกฺขเว, ลิขิตโก ปพฺพาเชตพฺโพ…เป.… น, ภิกฺขเว, สีปที ปพฺพาเชตพฺโพ…เป.… น, ภิกฺขเว, ปาปโรคี ปพฺพาเชตพฺโพ…เป.… น, ภิกฺขเว, ปริสทูสโก ปพฺพาเชตพฺโพ…เป.… น, ภิกฺขเว, กาโณ ปพฺพาเชตพฺโพ…เป.… น , ภิกฺขเว, กุณี ปพฺพาเชตพฺโพ…เป.… น, ภิกฺขเว, ขญฺโช ปพฺพาเชตพฺโพ…เป.… น, ภิกฺขเว, ปกฺขหโต ปพฺพาเชตพฺโพ…เป.… น, ภิกฺขเว, ฉินฺนิริยาปโถ ปพฺพาเชตพฺโพ…เป.… น, ภิกฺขเว, ชราทุพฺพโล ปพฺพาเชตพฺโพ…เป.… น, ภิกฺขเว, อนฺโธ ปพฺพาเชตพฺโพ…เป.… น, ภิกฺขเว, มูโค ปพฺพาเชตพฺโพ…เป.… น, ภิกฺขเว, พธิโร ปพฺพาเชตพฺโพ…เป.… น, ภิกฺขเว, อนฺธมูโค ปพฺพาเชตพฺโพ…เป.… น, ภิกฺขเว, อนฺธพธิโร ปพฺพาเชตพฺโพ…เป.… น, ภิกฺขเว, มูคพธิโร ปพฺพาเชตพฺโพ…เป.… น, ภิกฺขเว, อนฺธมูคพธิโร ปพฺพาเชตพฺโพฯ โย ปพฺพาเชยฺย, อาปตฺติ ทุกฺกฏสฺสาติฯ

นปพฺพาเชตพฺพทฺวตฺติํสวาโร นิฏฺฐิโตฯ

ทายชฺชภาณวาโร นิฏฺฐิโต นวโมฯ

58. อลชฺชีนิสฺสยวตฺถูนิ

[120] เตน โข ปน สมเยน ฉพฺพคฺคิยา ภิกฺขู อลชฺชีนํ นิสฺสยํ เทนฺติฯ ภควโต เอตมตฺถํ อาโรเจสุํฯ น, ภิกฺขเว, อลชฺชีนํ นิสฺสโย ทาตพฺโพฯ โย ทเทยฺย, อาปตฺติ ทุกฺกฏสฺสาติฯ

เตน โข ปน สมเยน ภิกฺขู อลชฺชีนํ นิสฺสาย วสนฺติฯ เตปิ นจิรสฺเสว อลชฺชิโน โหนฺติ ปาปกาภิกฺขูฯ ภควโต เอตมตฺถํ อาโรเจสุํฯ น, ภิกฺขเว, อลชฺชีนํ นิสฺสาย วตฺถพฺพํฯ โย วเสยฺย, อาปตฺติ ทุกฺกฏสฺสาติฯ

อถ โข ภิกฺขูนํ เอตทโหสิ – ‘‘ภควตา ปญฺญตฺตํ ‘น อลชฺชีนํ นิสฺสโย ทาตพฺโพ, น อลชฺชีนํ นิสฺสาย วตฺถพฺพ’นฺติฯ กถํ นุ โข มยํ ชาเนยฺยาม ลชฺชิํ วา อลชฺชิํ วา’’ติ? ภควโต เอตมตฺถํ อาโรเจสุํฯ อนุชานามิ, ภิกฺขเว, จตูหปญฺจาหํ อาคเมตุํ ยาว ภิกฺขุสภาคตํ ชานามีติฯ

59. คมิกาทินิสฺสยวตฺถูนิ

[121] เตน โข ปน สมเยน อญฺญตโร ภิกฺขุ โกสเลสุ ชนปเท อทฺธานมคฺคปฺปฏิปนฺโน โหติฯ อถ โข ตสฺส ภิกฺขุโน เอตทโหสิ – ‘‘ภควตา ปญฺญตฺตํ ‘น อนิสฺสิเตน วตฺถพฺพ’นฺติฯ อหญฺจมฺหิ นิสฺสยกรณีโย อทฺธานมคฺคปฺปฏิปนฺโน, กถํ นุ โข มยา ปฏิปชฺชิตพฺพ’’นฺติ? ภควโต เอตมตฺถํ อาโรเจสุํฯ อนุชานามิ, ภิกฺขเว, อทฺธานมคฺคปฺปฏิปนฺเนน ภิกฺขุนา นิสฺสยํ อลภมาเนน อนิสฺสิเตน วตฺถุนฺติฯ

เตน โข ปน สมเยน ทฺเว ภิกฺขู โกสเลสุ ชนปเท อทฺธานมคฺคปฺปฏิปนฺนา โหนฺติฯ เต อญฺญตรํ อาวาสํ อุปคจฺฉิํสุฯ ตตฺถ เอโก ภิกฺขุ คิลาโน โหติฯ อถ โข ตสฺส คิลานสฺส ภิกฺขุโน เอตทโหสิ – ‘‘ภควตา ปญฺญตฺตํ ‘น อนิสฺสิเตน วตฺถพฺพ’นฺติฯ อหญฺจมฺหิ นิสฺสยกรณีโย คิลาโน, กถํ นุ โข มยา ปฏิปชฺชิตพฺพ’’นฺติ? ภควโต เอตมตฺถํ อาโรเจสุํฯ อนุชานามิ, ภิกฺขเว, คิลาเนน ภิกฺขุนา นิสฺสยํ อลภมาเนน อนิสฺสิเตน วตฺถุนฺติฯ

อถ โข ตสฺส คิลานุปฏฺฐากสฺส ภิกฺขุโน เอตทโหสิ – ‘‘ภควตา ปญฺญตฺตํ ‘น อนิสฺสิเตน วตฺถพฺพ’นฺติฯ อหญฺจมฺหิ นิสฺสยกรณีโย, อยญฺจ ภิกฺขุ คิลาโน, กถํ นุ โข มยา ปฏิปชฺชิตพฺพ’’นฺติ? ภควโต เอตมตฺถํ อาโรเจสุํฯ อนุชานามิ, ภิกฺขเว, คิลานุปฏฺฐาเกน ภิกฺขุนา นิสฺสยํ อลภมาเนน ยาจิยมาเนน อนิสฺสิเตน วตฺถุนฺติฯ

เตน โข ปน สมเยน อญฺญตโร ภิกฺขุ อรญฺเญ วิหรติฯ ตสฺส จ ตสฺมิํ เสนาสเน ผาสุ โหติฯ อถ โข ตสฺส ภิกฺขุโน เอตทโหสิ – ‘‘ภควตา ปญฺญตฺตํ ‘น อนิสฺสิเตน วตฺถพฺพ’นฺติฯ อหญฺจมฺหิ นิสฺสยกรณีโย อรญฺเญ วิหรามิ, มยฺหญฺจ อิมสฺมิํ เสนาสเน ผาสุ โหติ, กถํ นุ โข มยา ปฏิปชฺชิตพฺพ’’นฺติ? ภควโต เอตมตฺถํ อาโรเจสุํฯ อนุชานามิ, ภิกฺขเว, อารญฺญิเกน ภิกฺขุนา ผาสุวิหารํ สลฺลกฺเขนฺเตน นิสฺสยํ อลภมาเนน อนิสฺสิเตน วตฺถุํ – ยทา ปติรูโป นิสฺสยทายโก อาคจฺฉิสฺสติ, ตทา ตสฺส นิสฺสาย วสิสฺสามีติฯ