เมนู

3. จิตฺตวคฺโค

[33]

ผนฺทนํ จปลํ จิตฺตํ, ทูรกฺขํ [ทุรกฺขํ (สพฺพตฺถ)] ทุนฺนิวารยํ;

อุชุํ กโรติ เมธาวี, อุสุกาโรว เตชนํฯ

[34]

วาริโชว ถเล ขิตฺโต, โอกโมกตอุพฺภโต;

ปริผนฺทติทํ จิตฺตํ, มารเธยฺยํ ปหาตเวฯ

[35]

ทุนฺนิคฺคหสฺส ลหุโน, ยตฺถกามนิปาติโน;

จิตฺตสฺส ทมโถ สาธุ, จิตฺตํ ทนฺตํ สุขาวหํฯ

[36]

สุทุทฺทสํ สุนิปุณํ, ยตฺถกามนิปาตินํ;

จิตฺตํ รกฺเขถ เมธาวี, จิตฺตํ คุตฺตํ สุขาวหํฯ

[37]

ทูรงฺคมํ เอกจรํ [เอกจารํ (ก.)], อสรีรํ คุหาสยํ;

เย จิตฺตํ สํยเมสฺสนฺติ, โมกฺขนฺติ มารพนฺธนาฯ

[38]

อนวฏฺฐิตจิตฺตสฺส, สทฺธมฺมํ อวิชานโต;

ปริปฺลวปสาทสฺส, ปญฺญา น ปริปูรติฯ

[39]

อนวสฺสุตจิตฺตสฺส, อนนฺวาหตเจตโส;

ปุญฺญปาปปหีนสฺส, นตฺถิ ชาครโต ภยํฯ

[40]

กุมฺภูปมํ กายมิมํ วิทิตฺวา, นครูปมํ จิตฺตมิทํ ฐเปตฺวา;

โยเธถ มารํ ปญฺญาวุเธน, ชิตญฺจ รกฺเข อนิเวสโน สิยาฯ

[41]

อจิรํ วตยํ กาโย, ปถวิํ อธิเสสฺสติ;

ฉุทฺโธ อเปตวิญฺญาโณ, นิรตฺถํว กลิงฺครํฯ

[42]

ทิโส ทิสํ ยํ ตํ กยิรา, เวรี วา ปน เวรินํ;

มิจฺฉาปณิหิตํ จิตฺตํ, ปาปิโย [ปาปิยํ (?)] นํ ตโต กเรฯ

[43]

น ตํ มาตา ปิตา กยิรา, อญฺเญ วาปิ จ ญาตกา;

สมฺมาปณิหิตํ จิตฺตํ, เสยฺยโส นํ ตโต กเรฯ

จิตฺตวคฺโค ตติโย นิฏฺฐิโตฯ

4. ปุปฺผวคฺโค

[44]

โก อิมํ [โกมํ (ก.)] ปถวิํ วิเจสฺสติ [วิเชสฺสติ (สี. สฺยา. ปี.)], ยมโลกญฺจ อิมํ สเทวกํ;

โก ธมฺมปทํ สุเทสิตํ, กุสโล ปุปฺผมิว ปเจสฺสติ [ปุปฺผมิวปฺปเจสฺสติ (ก.)]

[45]

เสโข ปถวิํ วิเจสฺสติ, ยมโลกญฺจ อิมํ สเทวกํ;

เสโข ธมฺมปทํ สุเทสิตํ, กุสโล ปุปฺผมิว ปเจสฺสติฯ

[46]