โย จ วสฺสสตํ ชีเว, อปสฺสํ อุทยพฺพยํ;
เอกาหํ ชีวิตํ เสยฺโย, ปสฺสโต อุทยพฺพยํฯ
[114]
โย จ วสฺสสตํ ชีเว, อปสฺสํ อมตํ ปทํ;
เอกาหํ ชีวิตํ เสยฺโย, ปสฺสโต อมตํ ปทํฯ
[115]
โย จ วสฺสสตํ ชีเว, อปสฺสํ ธมฺมมุตฺตมํ;
เอกาหํ ชีวิตํ เสยฺโย, ปสฺสโต ธมฺมมุตฺตมํฯ
สหสฺสวคฺโค อฏฺฐโม นิฏฺฐิโตฯ
9. ปาปวคฺโค
[116]
อภิตฺถเรถ กลฺยาเณ, ปาปา จิตฺตํ นิวารเย;
ทนฺธญฺหิ กโรโต ปุญฺญํ, ปาปสฺมิํ รมตี มโนฯ
[117]
ปาปญฺเจ ปุริโส กยิรา, น นํ [น ตํ (สี. ปี.)] กยิรา ปุนปฺปุนํ;
น ตมฺหิ ฉนฺทํ กยิราถ, ทุกฺโข ปาปสฺส อุจฺจโยฯ
[118]
ปุญฺญญฺเจ ปุริโส กยิรา, กยิรา นํ [กยิราเถตํ (สี. สฺยา.), กยิราเถนํ (ปี.)] ปุนปฺปุนํ;
ตมฺหิ ฉนฺทํ กยิราถ, สุโข ปุญฺญสฺส อุจฺจโยฯ
[119]
ปาโปปิ ปสฺสติ ภทฺรํ, ยาว ปาปํ น ปจฺจติ;
ยทา จ ปจฺจติ ปาปํ, อถ ปาโป ปาปานิ [อถ ปาปานิ (?)] ปสฺสติฯ
[120]
ภทฺโรปิ ปสฺสติ ปาปํ, ยาว ภทฺรํ น ปจฺจติ;
ยทา จ ปจฺจติ ภทฺรํ, อถ ภทฺโร ภทฺรานิ [อถ ภทฺรานิ (?)] ปสฺสติฯ
[121]
มาวมญฺเญถ [มาปฺปมญฺเญถ (สี. สฺยา. ปี.)] ปาปสฺส, น มนฺตํ [น มํ ตํ (สี. ปี.), น มตฺตํ (สฺยา.)] อาคมิสฺสติ;
อุทพินฺทุนิปาเตน, อุทกุมฺโภปิ ปูรติ;
พาโล ปูรติ [ปูรติ พาโล (สี. ก.), อาปูรติ พาโล (สฺยา.)] ปาปสฺส, โถกํ โถกมฺปิ [โถก โถกมฺปิ (สี. ปี.)] อาจินํฯ
[122]
มาวมญฺเญถ ปุญฺญสฺส, น มนฺตํ อาคมิสฺสติ;
อุทพินฺทุนิปาเตน, อุทกุมฺโภปิ ปูรติ;
ธีโร ปูรติ ปุญฺญสฺส, โถกํ โถกมฺปิ อาจินํฯ
[123]
วาณิโชว ภยํ มคฺคํ, อปฺปสตฺโถ มหทฺธโน;
วิสํ ชีวิตุกาโมว, ปาปานิ ปริวชฺชเยฯ
[124]
ปาณิมฺหิ เจ วโณ นาสฺส, หเรยฺย ปาณินา วิสํ;
นาพฺพณํ วิสมนฺเวติ, นตฺถิ ปาปํ อกุพฺพโตฯ
[125]
โย อปฺปทุฏฺฐสฺส นรสฺส ทุสฺสติ, สุทฺธสฺส โปสสฺส อนงฺคณสฺส;
ตเมว พาลํ ปจฺเจติ ปาปํ, สุขุโม รโช ปฏิวาตํว ขิตฺโตฯ
[126]
คพฺภเมเก อุปฺปชฺชนฺติ, นิรยํ ปาปกมฺมิโน;
สคฺคํ สุคติโน ยนฺติ, ปรินิพฺพนฺติ อนาสวาฯ
[127]
น อนฺตลิกฺเข น สมุทฺทมชฺเฌ, น ปพฺพตานํ วิวรํ ปวิสฺส [ปวิสํ (สฺยา.)];
น วิชฺชตี [น วิชฺชติ (ก. สี. ปี. ก.)] โส ชคติปฺปเทโส, ยตฺถฏฺฐิโต [ยตฺรฏฺฐิโต (สฺยา.)] มุจฺเจยฺย ปาปกมฺมาฯ
[128]
น อนฺตลิกฺเข น สมุทฺทมชฺเฌ, น ปพฺพตานํ วิวรํ ปวิสฺส;
น วิชฺชตี โส ชคติปฺปเทโส, ยตฺถฏฺฐิตํ [ยตฺรฏฺฐิตํ (สฺยา.)] นปฺปสเหยฺย มจฺจุฯ
ปาปวคฺโค นวโม นิฏฺฐิโตฯ
10. ทณฺฑวคฺโค
[129]
สพฺเพ ตสนฺติ ทณฺฑสฺส, สพฺเพ ภายนฺติ มจฺจุโน;
อตฺตานํ อุปมํ กตฺวา, น หเนยฺย น ฆาตเยฯ
[130]
