กณฺหํ ธมฺมํ วิปฺปหาย, สุกฺกํ ภาเวถ ปณฺฑิโต;
โอกา อโนกมาคมฺม, วิเวเก ยตฺถ ทูรมํฯ
[88]
ตตฺราภิรติมิจฺเฉยฺย, หิตฺวา กาเม อกิญฺจโน;
ปริโยทเปยฺย [ปริโยทาเปยฺย (?)] อตฺตานํ, จิตฺตกฺเลเสหิ ปณฺฑิโตฯ
[89]
เยสํ สมฺโพธิยงฺเคสุ, สมฺมา จิตฺตํ สุภาวิตํ;
อาทานปฏินิสฺสคฺเค, อนุปาทาย เย รตา;
ขีณาสวา ชุติมนฺโต, เต โลเก ปรินิพฺพุตาฯ
ปณฺฑิตวคฺโค ฉฏฺโฐ นิฏฺฐิโตฯ
7. อรหนฺตวคฺโค
[90]
คตทฺธิโน วิโสกสฺส, วิปฺปมุตฺตสฺส สพฺพธิ;
สพฺพคนฺถปฺปหีนสฺส, ปริฬาโห น วิชฺชติฯ
[91]
อุยฺยุญฺชนฺติ สตีมนฺโต, น นิเกเต รมนฺติ เต;
หํสาว ปลฺลลํ หิตฺวา, โอกโมกํ ชหนฺติ เตฯ
[92]
เยสํ สนฺนิจโย นตฺถิ, เย ปริญฺญาตโภชนา;
สุญฺญโต อนิมิตฺโต จ, วิโมกฺโข เยสํ โคจโร;
อากาเส ว สกุนฺตานํ [สกุณานํ (ก.)], คติ เตสํ ทุรนฺนยาฯ
[93]
ยสฺสาสวา ปริกฺขีณา, อาหาเร จ อนิสฺสิโต;
สุญฺญโต อนิมิตฺโต จ, วิโมกฺโข ยสฺส โคจโร;
อากาเส ว สกุนฺตานํ, ปทํ ตสฺส ทุรนฺนยํฯ
[94]
ยสฺสินฺทฺริยานิ สมถงฺคตานิ [สมถํ คตานิ (สี. ปี.)], อสฺสา ยถา สารถินา สุทนฺตา;
ปหีนมานสฺส อนาสวสฺส, เทวาปิ ตสฺส ปิหยนฺติ ตาทิโนฯ
[95]
ปถวิสโม โน วิรุชฺฌติ, อินฺทขิลุปโม [อินฺทขีลูปโม (สี. สฺยา. ก.)] ตาทิ สุพฺพโต;
รหโทว อเปตกทฺทโม, สํสารา น ภวนฺติ ตาทิโนฯ
[96]
สนฺตํ ตสฺส มนํ โหติ, สนฺตา วาจา จ กมฺม จ;
สมฺมทญฺญา วิมุตฺตสฺส, อุปสนฺตสฺส ตาทิโนฯ
[97]
อสฺสทฺโธ อกตญฺญู จ, สนฺธิจฺเฉโท จ โย นโร;
หตาวกาโส วนฺตาโส, ส เว อุตฺตมโปริโสฯ
[98]
คาเม วา ยทิ วารญฺเญ, นินฺเน วา ยทิ วา ถเล;
ยตฺถ อรหนฺโต วิหรนฺติ, ตํ ภูมิรามเณยฺยกํฯ
[99]
รมณียานิ อรญฺญานิ, ยตฺถ น รมตี ชโน;
วีตราคา รมิสฺสนฺติ, น เต กามคเวสิโนฯ
อรหนฺตวคฺโค สตฺตโม นิฏฺฐิโตฯ
8. สหสฺสวคฺโค
[100]
สหสฺสมปิ เจ วาจา, อนตฺถปทสํหิตา;
เอกํ อตฺถปทํ เสยฺโย, ยํ สุตฺวา อุปสมฺมติฯ
[101]
สหสฺสมปิ เจ คาถา, อนตฺถปทสํหิตา;
เอกํ คาถาปทํ เสยฺโย, ยํ สุตฺวา อุปสมฺมติฯ
[102]
โย จ คาถา สตํ ภาเส, อนตฺถปทสํหิตา [อนตฺถปทสญฺหิตํ (ก.) วิเสสนํ เหตํ คาถาติปทสฺส];
เอกํ ธมฺมปทํ เสยฺโย, ยํ สุตฺวา อุปสมฺมติฯ
[103]
โย สหสฺสํ สหสฺเสน, สงฺคาเม มานุเส ชิเน;
เอกญฺจ เชยฺยมตฺตานํ [อตฺตานํ (สี. ปี.)], ส เว สงฺคามชุตฺตโมฯ
[104]
อตฺตา หเว ชิตํ เสยฺโย, ยา จายํ อิตรา ปชา;
อตฺตทนฺตสฺส โปสสฺส, นิจฺจํ สญฺญตจาริโนฯ
[105]
เนว เทโว น คนฺธพฺโพ, น มาโร สห พฺรหฺมุนา;
ชิตํ อปชิตํ กยิรา, ตถารูปสฺส ชนฺตุโนฯ
[106]
