เจติยมฺหิ จ สงฺเฆ วา, ปุคฺคเล อติถีสุ วา;
มาตริ ปิตริ จาปิ [วาปิ (สฺยา. กํ.)], อโถ เชฏฺฐมฺหิ ภาตริฯ
[8]
เอโส นิธิ สุนิหิโต, อเชยฺโย อนุคามิโก;
ปหาย คมนีเยสุ, เอตํ อาทาย คจฺฉติฯ
[9]
อสาธารณมญฺเญสํ, อโจราหรโณ นิธิ;
กยิราถ ธีโร ปุญฺญานิ, โย นิธิ อนุคามิโกฯ
[10]
เอส เทวมนุสฺสานํ, สพฺพกามทโท นิธิ;
ยํ ยเทวาภิปตฺเถนฺติ, สพฺพเมเตน ลพฺภติฯ
[11]
สุวณฺณตา สุสรตา, สุสณฺฐานา สุรูปตา [สุสณฺฐานสุรูปตา (สี.), สุสณฺฐานํ สุรูปตา (สฺยา. กํ.)];
อาธิปจฺจปริวาโร, สพฺพเมเตน ลพฺภติฯ
[12]
ปเทสรชฺชํ อิสฺสริยํ, จกฺกวตฺติสุขํ ปิยํ;
เทวรชฺชมฺปิ ทิพฺเพสุ, สพฺพเมเตน ลพฺภติฯ
[13]
มานุสฺสิกา จ สมฺปตฺติ, เทวโลเก จ ยา รติ;
ยา จ นิพฺพานสมฺปตฺติ, สพฺพเมเตน ลพฺภติฯ
[14]
มิตฺตสมฺปทมาคมฺม, โยนิโสว [โยนิโส เว (สี.), โยนิโส เจ (สฺยา.), โยนิโส จ (?)] ปยุญฺชโต;
วิชฺชา วิมุตฺติ วสีภาโว, สพฺพเมเตน ลพฺภติฯ
[15]
ปฏิสมฺภิทา วิโมกฺขา จ, ยา จ สาวกปารมี;
ปจฺเจกโพธิ พุทฺธภูมิ, สพฺพเมเตน ลพฺภติฯ
[16]
เอวํ มหตฺถิกา เอสา, ยทิทํ ปุญฺญสมฺปทา;
ตสฺมา ธีรา ปสํสนฺติ, ปณฺฑิตา กตปุญฺญตนฺติฯ
นิธิกณฺฑสุตฺตํ นิฏฺฐิตํฯ
9. เมตฺตสุตฺตํ
[1]
กรณียมตฺถกุสเลน , ยนฺตสนฺตํ ปทํ อภิสเมจฺจ;
สกฺโก อุชู จ สุหุชู [สูชู (สี.)] จ, สุวโจ จสฺส มุทุ อนติมานีฯ
[2]
สนฺตุสฺสโก จ สุภโร จ, อปฺปกิจฺโจ จ สลฺลหุกวุตฺติ;
สนฺตินฺทฺริโย จ นิปโก จ, อปฺปคพฺโภ กุเลสฺวนนุคิทฺโธฯ
[3]
น จ ขุทฺทมาจเร กิญฺจิ, เยน วิญฺญู ปเร อุปวเทยฺยุํ;
สุขิโนว เขมิโน โหนฺตุ, สพฺพสตฺตา [สพฺเพ สตฺตา (สี. สฺยา.)] ภวนฺตุ สุขิตตฺตาฯ
[4]
เย เกจิ ปาณภูตตฺถิ, ตสา วา ถาวรา วนวเสสา;
ทีฆา วา เยว มหนฺตา [มหนฺต (?)], มชฺฌิมา รสฺสกา อณุกถูลาฯ
[5]
ทิฏฺฐา วา เยว อทิฏฺฐา [อทิฏฺฐ (?)], เย ว [เย จ (สี. สฺยา. กํ. ปี.)] ทูเร วสนฺติ อวิทูเร;
ภูตา ว [วา (สฺยา. กํ. ปี. ก.)] สมฺภเวสี ว [วา (สี. สฺยา. กํ. ปี.)], สพฺพสตฺตา ภวนฺตุ สุขิตตฺตาฯ
[6]
น ปโร ปรํ นิกุพฺเพถ, นาติมญฺเญถ กตฺถจิ น กญฺจิ [นํ กญฺจิ (สี. ปี.), นํ กิญฺจิ (สฺยา.), น กิญฺจิ (ก.)];
พฺยาโรสนา ปฏิฆสญฺญา, นาญฺญมญฺญสฺส ทุกฺขมิจฺเฉยฺยฯ
[7]
มาตา ยถา นิยํ ปุตฺตมายุสา เอกปุตฺตมนุรกฺเข;
เอวมฺปิ สพฺพภูเตสุ, มานสํ ภาวเย อปริมาณํฯ
[8]
เมตฺตญฺจ สพฺพโลกสฺมิ, มานสํ ภาวเย อปริมาณํ;
อุทฺธํ อโธ จ ติริยญฺจ, อสมฺพาธํ อเวรมสปตฺตํฯ
[9]
ติฏฺฐํ จรํ นิสินฺโน ว [วา (สี. สฺยา. กํ. ปี.)], สยาโน ยาวตาสฺส วิตมิทฺโธ [วิคตมิทฺโธ (พหูสุ)];
เอตํ สติํ อธิฏฺเฐยฺย, พฺรหฺมเมตํ วิหารมิธมาหุฯ
[10]
ทิฏฺฐิญฺจ อนุปคฺคมฺม, สีลวา ทสฺสเนน สมฺปนฺโน;
กาเมสุ วินย [วิเนยฺย (สี.)] เคธํ, น หิ ชาตุคฺคพฺภเสยฺย ปุน เรตีติฯ
เมตฺตสุตฺตํ นิฏฺฐิตํฯ
ขุทฺทกปาฐปาฬิ นิฏฺฐิตาฯ