เมนู

‘‘อจฺฉริยํ, โภ โคตม, อพฺภุตํ, โภ โคตม! ยาวญฺจิทํ, โภ โคตม, อลเมว ทานานิ ทาตุํ, อลํ สทฺธานิ กาตุํ, ยตฺร หิ นาม ทายโกปิ อนิปฺผโล’’ติฯ ‘‘เอวเมตํ, พฺราหฺมณ [เอวเมตํ พฺราหฺมณ เอวเมตํ พฺราหฺมณ (สี. สฺยา.)], ทายโกปิ หิ, พฺราหฺมณ, อนิปฺผโล’’ติฯ

‘‘อภิกฺกนฺตํ, โภ โคตม, อภิกฺกนฺตํ, โภ โคตม…เป.… อุปาสกํ มํ ภวํ โคตโม ธาเรตุ อชฺชตคฺเค ปาณุเปตํ สรณํ คต’’นฺติฯ เอกาทสมํฯ

ชาณุสฺโสณิวคฺโค [ยมกวคฺโค (ก.)] ทุติโยฯ

(18) 3. สาธุวคฺโค

1. สาธุสุตฺตํ

[178] [อ. นิ. 10.134] ‘‘สาธุญฺจ โว, ภิกฺขเว, เทเสสฺสามิ อสาธุญฺจฯ ตํ สุณาถ, สาธุกํ มนสิ กโรถ; ภาสิสฺสามี’’ติฯ ‘‘เอวํ, ภนฺเต’’ติ โข เต ภิกฺขู ภควโต ปจฺจสฺโสสุํฯ ภควา เอตทโวจ –

‘‘กตมญฺจ, ภิกฺขเว, อสาธุ? ปาณาติปาโต, อทินฺนาทานํ, กาเมสุมิจฺฉาจาโร, มุสาวาโท, ปิสุณา วาจา, ผรุสา วาจา, สมฺผปฺปลาโป, อภิชฺฌา, พฺยาปาโท, มิจฺฉาทิฏฺฐิ – อิทํ วุจฺจติ, ภิกฺขเว, อสาธุฯ

‘‘กตมญฺจ, ภิกฺขเว, สาธุ? ปาณาติปาตา เวรมณี, อทินฺนาทานา เวรมณี, กาเมสุมิจฺฉาจารา เวรมณี, มุสาวาทา เวรมณี, ปิสุณาย วาจาย เวรมณี, ผรุสาย วาจาย เวรมณี, สมฺผปฺปลาปา เวรมณี, อนภิชฺฌา, อพฺยาปาโท, สมฺมาทิฏฺฐิ – อิทํ วุจฺจติ, ภิกฺขเว, สาธู’’ติฯ ปฐมํฯ

2. อริยธมฺมสุตฺตํ

[179] ‘‘อริยธมฺมญฺจ โว, ภิกฺขเว, เทเสสฺสามิ อนริยธมฺมญฺจฯ ตํ สุณาถ…เป.… กตโม จ, ภิกฺขเว, อนริโย ธมฺโม? ปาณาติปาโต…เป.… มิจฺฉาทิฏฺฐิ – อยํ วุจฺจติ, ภิกฺขเว, อนริโย ธมฺโมฯ

‘‘กตโม จ, ภิกฺขเว, อริโย ธมฺโม? ปาณาติปาตา เวรมณี…เป.… สมฺมาทิฏฺฐิ – อยํ วุจฺจติ, ภิกฺขเว, อริโย ธมฺโม’’ติฯ ทุติยํฯ

3. กุสลสุตฺตํ

[180] ‘‘กุสลญฺจ โว, ภิกฺขเว, เทเสสฺสามิ อกุสลญฺจฯ ตํ สุณาถ…เป.… กตมญฺจ, ภิกฺขเว, อกุสลํ? ปาณาติปาโต…เป.… มิจฺฉาทิฏฺฐิ – อิทํ วุจฺจติ, ภิกฺขเว, อกุสลํฯ

‘‘กตมญฺจ , ภิกฺขเว, กุสลํ? ปาณาติปาตา เวรมณี…เป.… สมฺมาทิฏฺฐิ – อิทํ วุจฺจติ, ภิกฺขเว, กุสล’’นฺติฯ ตติยํฯ

4. อตฺถสุตฺตํ

[181] ‘‘อตฺถญฺจ โว, ภิกฺขเว, เทเสสฺสามิ อนตฺถญฺจฯ ตํ สุณาถ…เป.… กตโม จ, ภิกฺขเว, อนตฺโถ? ปาณาติปาโต…เป.… มิจฺฉาทิฏฺฐิ – อยํ วุจฺจติ, ภิกฺขเว, อนตฺโถฯ

‘‘กตโม จ, ภิกฺขเว, อตฺโถ? ปาณาติปาตา เวรมณี…เป.… สมฺมาทิฏฺฐิ – อยํ วุจฺจติ, ภิกฺขเว, อตฺโถ’’ติฯ จตุตฺถํฯ

5. ธมฺมสุตฺตํ

[182] ‘‘ธมฺมญฺจ โว, ภิกฺขเว, เทเสสฺสามิ อธมฺมญฺจฯ ตํ สุณาถ…เป.… กตโม จ, ภิกฺขเว, อธมฺโม? ปาณาติปาโต…เป.… มิจฺฉาทิฏฺฐิ – อยํ วุจฺจติ, ภิกฺขเว, อธมฺโมฯ

‘‘กตโม จ, ภิกฺขเว, ธมฺโม? ปาณาติปาตา เวรมณี…เป.… สมฺมาทิฏฺฐิ – อยํ วุจฺจติ, ภิกฺขเว, ธมฺโม’’ติฯ ปญฺจมํฯ

6. อาสวสุตฺตํ

[183] ‘‘สาสวญฺจ โว, ภิกฺขเว, ธมฺมํ เทเสสฺสามิ อนาสวญฺจฯ ตํ สุณาถ…เป.… กตโม จ, ภิกฺขเว, สาสโว ธมฺโม? ปาณาติปาโต…เป.… มิจฺฉาทิฏฺฐิ – อยํ วุจฺจติ, ภิกฺขเว, สาสโว ธมฺโมฯ

‘‘กตโม จ, ภิกฺขเว, อนาสโว ธมฺโม? ปาณาติปาตา เวรมณี…เป.… สมฺมาทิฏฺฐิ – อยํ วุจฺจติ, ภิกฺขเว, อนาสโว ธมฺโม’’ติฯ ฉฏฺฐํฯ