เมนู

(14) 4. สาธุวคฺโค

1. สาธุสุตฺตํ

[134] [อ. นิ. 10.178] ‘‘สาธุญฺจ โว, ภิกฺขเว, เทเสสฺสามิ อสาธุญฺจฯ ตํ สุณาถ, สาธุกํ มนสิ กโรถ; ภาสิสฺสามี’’ติฯ ‘‘เอวํ, ภนฺเต’’ติ โข เต ภิกฺขู ภควโต ปจฺจสฺโสสุํฯ ภควา เอตทโวจ –

‘‘กตมญฺจ, ภิกฺขเว, อสาธุ? มิจฺฉาทิฏฺฐิ, มิจฺฉาสงฺกปฺโป, มิจฺฉาวาจา, มิจฺฉากมฺมนฺโต, มิจฺฉาอาชีโว, มิจฺฉาวายาโม, มิจฺฉาสติ, มิจฺฉาสมาธิ, มิจฺฉาญาณํ, มิจฺฉาวิมุตฺติ – อิทํ วุจฺจติ, ภิกฺขเว, อสาธุฯ กตมญฺจ, ภิกฺขเว, สาธุ? สมฺมาทิฏฺฐิ , สมฺมาสงฺกปฺโป, สมฺมาวาจา สมฺมากมฺมนฺโต, สมฺมาอาชีโว, สมฺมาวายาโม, สมฺมาสติ, สมฺมาสมาธิ, สมฺมาญาณํ, สมฺมาวิมุตฺติ – อิทํ วุจฺจติ, ภิกฺขเว, สาธู’’ติฯ ปฐมํฯ

2. อริยธมฺมสุตฺตํ

[135] ‘‘อริยธมฺมญฺจ โว, ภิกฺขเว, เทเสสฺสามิ อนริยธมฺมญฺจฯ ตํ สุณาถ…เป.… กตโม จ, ภิกฺขเว, อนริโย ธมฺโม? มิจฺฉาทิฏฺฐิ…เป.… มิจฺฉาวิมุตฺติ – อยํ วุจฺจติ, ภิกฺขเว, อนริโย ธมฺโมฯ กตโม จ, ภิกฺขเว, อริโย ธมฺโม? สมฺมาทิฏฺฐิ…เป.… สมฺมาวิมุตฺติ – อยํ วุจฺจติ, ภิกฺขเว, อริโย ธมฺโม’’ติฯ ทุติยํฯ

3. อกุสลสุตฺตํ

[136] ‘‘อกุสลญฺจ โว, ภิกฺขเว, เทเสสฺสามิ กุสลญฺจฯ ตํ สุณาถ …เป.… กตมญฺจ, ภิกฺขเว, อกุสลํ? มิจฺฉาทิฏฺฐิ…เป.… มิจฺฉาวิมุตฺติ – อิทํ วุจฺจติ, ภิกฺขเว , อกุสลํฯ กตมญฺจ, ภิกฺขเว, กุสลํ? สมฺมาทิฏฺฐิ…เป.… สมฺมาวิมุตฺติ – อิทํ วุจฺจติ, ภิกฺขเว, กุสล’’นฺติฯ ตติยํฯ

4. อตฺถสุตฺตํ

[137] ‘‘อตฺถญฺจ โว, ภิกฺขเว, เทเสสฺสามิ อนตฺถญฺจฯ ตํ สุณาถ…เป.… กตโม จ, ภิกฺขเว, อนตฺโถ? มิจฺฉาทิฏฺฐิ …เป.… มิจฺฉาวิมุตฺติ – อยํ วุจฺจติ, ภิกฺขเว, อนตฺโถฯ กตโม จ, ภิกฺขเว, อตฺโถ? สมฺมาทิฏฺฐิ…เป.… สมฺมาวิมุตฺติ – อยํ วุจฺจติ, ภิกฺขเว, อตฺโถ’’ติฯ จตุตฺถํฯ