10. อุทฺธจฺจสุตฺตํ

[116] ‘‘ตโยเม , ภิกฺขเว, ธมฺมาฯ กตเม ตโย? อุทฺธจฺจํ, อสํวโร, ปมาโทฯ อิเม โข, ภิกฺขเว, ตโย ธมฺมาฯ อิเมสํ โข, ภิกฺขเว, ติณฺณํ ธมฺมานํ ปหานาย ตโย ธมฺมา ภาเวตพฺพาฯ กตเม ตโย? อุทฺธจฺจสฺส ปหานาย สมโถ ภาเวตพฺโพ, อสํวรสฺส ปหานาย สํวโร ภาเวตพฺโพ, ปมาทสฺส ปหานาย อปฺปมาโท ภาเวตพฺโพฯ อิเมสํ โข, ภิกฺขเว, ติณฺณํ ธมฺมานํ ปหานาย อิเม ตโย ธมฺมา ภาเวตพฺพา’’ติฯ ทสมํฯ

ติกวคฺโค เอกาทสโมฯ [ปฐโม (สฺยา.)]

ตสฺสุทฺทานํ –

ราคทุจฺจริตวิตกฺก, สญฺญา ธาตูติ วุจฺจติ;

อสฺสาทอรติตุฏฺฐิ, ทุเว จ อุทฺธจฺเจน วคฺโคติฯ

12. สามญฺญวคฺโค

1. กายานุปสฺสีสุตฺตํ

[117] ‘‘ฉ , ภิกฺขเว, ธมฺเม อปฺปหาย อภพฺโพ กาเย กายานุปสฺสี วิหริตุํฯ กตเม ฉ? กมฺมารามตํ, ภสฺสารามตํ, นิทฺทารามตํ, สงฺคณิการามตํ, อินฺทฺริเยสุ อคุตฺตทฺวารตํ, โภชเน อมตฺตญฺญุตํฯ อิเม โข, ภิกฺขเว, ฉ ธมฺเม อปฺปหาย อภพฺโพ กาเย กายานุปสฺสี วิหริตุํฯ

‘‘ฉ , ภิกฺขเว, ธมฺเม ปหาย ภพฺโพ กาเย กายานุปสฺสี วิหริตุํฯ กตเม ฉ? กมฺมารามตํ, ภสฺสารามตํ, นิทฺทารามตํ, สงฺคณิการามตํ, อินฺทฺริเยสุ อคุตฺตทฺวารตํ, โภชเน อมตฺตญฺญุตํ – อิเม โข, ภิกฺขเว, ฉ ธมฺเม ปหาย ภพฺโพ กาเย กายานุปสฺสี วิหริตุ’’นฺติฯ ปฐมํฯ

2. ธมฺมานุปสฺสีสุตฺตํ

[118] ‘‘ฉ, ภิกฺขเว, ธมฺเม อปฺปหาย อภพฺโพ อชฺฌตฺตํ กาเย…เป.… พหิทฺธา กาเย…เป.… อชฺฌตฺตพหิทฺธา กาเย…เป.… อชฺฌตฺตํ เวทนาสุ…เป.… พหิทฺธา เวทนาสุ…เป.… อชฺฌตฺตพหิทฺธา เวทนาสุ…เป.… อชฺฌตฺตํ จิตฺเต…เป.… พหิทฺธา จิตฺเต…เป.… อชฺฌตฺตพหิทฺธา จิตฺเต…เป.… อชฺฌตฺตํ ธมฺเมสุ…เป.… พหิทฺธา ธมฺเมสุ…เป.… อชฺฌตฺตพหิทฺธา ธมฺเมสุ ธมฺมานุปสฺสี วิหริตุํฯ กตเม ฉ? กมฺมารามตํ, ภสฺสารามตํ, นิทฺทารามตํ, สงฺคณิการามตํ, อินฺทฺริเยสุ อคุตฺตทฺวารตํ , โภชเน อมตฺตญฺญุตํฯ อิเม โข, ภิกฺขเว, ฉ ธมฺเม ปหาย ภพฺโพ อชฺฌตฺตพหิทฺธา ธมฺเมสุ ธมฺมานุปสฺสี วิหริตุ’’นฺติฯ ทุติยํฯ

3. ตปุสฺสสุตฺตํ

[119] ‘‘ฉหิ , ภิกฺขเว, ธมฺเมหิ สมนฺนาคโต ตปุสฺโส [ตปสฺโส (ปี.) อ. นิ. 1.248] คหปติ ตถาคเต นิฏฺฐงฺคโต อมตทฺทโส อมตํ สจฺฉิกตฺวา อิริยติฯ กตเมหิ ฉหิ? พุทฺเธ อเวจฺจปฺปสาเทน, ธมฺเม อเวจฺจปฺปสาเทน, สงฺเฆ อเวจฺจปฺปสาเทน, อริเยน สีเลน, อริเยน ญาเณน, อริยาย วิมุตฺติยาฯ อิเมหิ โข, ภิกฺขเว, ฉหิ ธมฺเมหิ สมนฺนาคโต ตปุสฺโส คหปติ ตถาคเต นิฏฺฐงฺคโต อมตทฺทโส อมตํ สจฺฉิกตฺวา อิริยตี’’ติฯ ตติยํฯ

4-23. ภลฺลิกาทิสุตฺตานิ

[120-139] ‘‘ฉหิ, ภิกฺขเว, ธมฺเมหิ สมนฺนาคโต ภลฺลิโก คหปติ…เป.… สุทตฺโต คหปติ อนาถปิณฺฑิโก… จิตฺโต คหปติ มจฺฉิกาสณฺฑิโก… หตฺถโก อาฬวโก… มหานาโม สกฺโก… อุคฺโค คหปติ เวสาลิโก… อุคฺคโต คหปติ… สูรมฺพฏฺโฐ [สูโร อมฺพฏฺโฐ (ก.)] … ชีวโก โกมารภจฺโจ… นกุลปิตา คหปติ… ตวกณฺณิโก คหปติ… ปูรโณ คหปติ… อิสิทตฺโต คหปติ… สนฺธาโน [สนฺตาโน (ก.)] คหปติ… วิจโย [วิชโย (สี. สฺยา. ปี.)] คหปติ… วิชยมาหิโก [วชฺชิยมหิโต (สี. สฺยา. ปี.)] คหปติ… เมณฺฑโก คหปติ … วาเสฏฺโฐ อุปาสโก… อริฏฺโฐ อุปาสโก… สารคฺโค [สาทตฺโต (สฺยา.)] อุปาสโก ตถาคเต นิฏฺฐงฺคโต อมตทฺทโส อมตํ สจฺฉิกตฺวา อิริยติฯ กตเมหิ ฉหิ? พุทฺเธ อเวจฺจปฺปสาเทน, ธมฺเม อเวจฺจปฺปสาเทน, สงฺเฆ อเวจฺจปฺปสาเทน, อริเยน สีเลน, อริเยน ญาเณน, อริยาย วิมุตฺติยาฯ อิเมหิ โข, ภิกฺขเว, ฉหิ ธมฺเมหิ สมนฺนาคโต สารคฺโค อุปาสโก ตถาคเต นิฏฺฐงฺคโต อมตทฺทโส อมตํ สจฺฉิกตฺวา อิริยตี’’ติฯ เตวีสติมํฯ

สามญฺญวคฺโค ทฺวาทสโมฯ