4. โสสานิกสุตฺตํ

[184] ‘‘ปญฺจิเม , ภิกฺขเว, โสสานิกาฯ กตเม ปญฺจ? มนฺทตฺตา โมมูหตฺตา โสสานิโก โหติ…เป.… อิทมตฺถิตํเยว นิสฺสาย โสสานิโก โหติฯ อิเม โข, ภิกฺขเว, ปญฺจ โสสานิกา’’ติฯ จตุตฺถํฯ

5. อพฺโภกาสิกสุตฺตํ

[185] ‘‘ปญฺจิเม, ภิกฺขเว, อพฺโภกาสิกา…เป.…ฯ ปญฺจมํฯ

6. เนสชฺชิกสุตฺตํ

[186] ‘‘ปญฺจิเม, ภิกฺขเว, เนสชฺชิกา…เป.…ฯ ฉฏฺฐํฯ

7. ยถาสนฺถติกสุตฺตํ

[187] ‘‘ปญฺจิเม, ภิกฺขเว, ยถาสนฺถติกา…เป.…ฯ สตฺตมํฯ

8. เอกาสนิกสุตฺตํ

[188] ‘‘ปญฺจิเม, ภิกฺขเว, เอกาสนิกา…เป.…ฯ อฏฺฐมํฯ

9. ขลุปจฺฉาภตฺติกสุตฺตํ

[189] ‘‘ปญฺจิเม , ภิกฺขเว, ขลุปจฺฉาภตฺติกา…เป.…ฯ นวมํฯ

10. ปตฺตปิณฺฑิกสุตฺตํ

[190] ‘‘ปญฺจิเม, ภิกฺขเว, ปตฺตปิณฺฑิกาฯ กตเม ปญฺจ? มนฺทตฺตา โมมูหตฺตา ปตฺตปิณฺฑิโก โหติ, ปาปิจฺโฉ อิจฺฉาปกโต ปตฺตปิณฺฑิโก โหติ, อุมฺมาทา จิตฺตกฺเขปา ปตฺตปิณฺฑิโก โหติ, ‘วณฺณิตํ พุทฺเธหิ พุทฺธสาวเกหี’ติ ปตฺตปิณฺฑิโก โหติ, อปฺปิจฺฉตํเยว นิสฺสาย สนฺตุฏฺฐิํเยว นิสฺสาย สลฺเลขํเยว นิสฺสาย ปวิเวกํเยว นิสฺสาย อิทมตฺถิตํเยว นิสฺสาย ปตฺตปิณฺฑิโก โหติฯ อิเม โข, ภิกฺขเว, ปญฺจ ปตฺตปิณฺฑิกาฯ อิเมสํ โข, ภิกฺขเว, ปญฺจนฺนํ ปตฺตปิณฺฑิกานํ ยฺวายํ ปตฺตปิณฺฑิโก อปฺปิจฺฉตํเยว นิสฺสาย สนฺตุฏฺฐิํเยว นิสฺสาย สลฺเลขํเยว นิสฺสาย ปวิเวกํเยว นิสฺสาย อิทมตฺถิตํเยว นิสฺสาย ปตฺตปิณฺฑิโก โหติ, อยํ อิเมสํ ปญฺจนฺนํ ปตฺตปิณฺฑิกานํ อคฺโค จ เสฏฺโฐ จ โมกฺโข จ อุตฺตโม จ ปวโร จฯ

‘‘เสยฺยถาปิ, ภิกฺขเว, ควา ขีรํ, ขีรมฺหา ทธิ, ทธิมฺหา นวนีตํ, นวนีตมฺหา สปฺปิ, สปฺปิมฺหา สปฺปิมณฺโฑ, สปฺปิมณฺโฑ ตตฺถ อคฺคมกฺขายติ; เอวเมวํ โข, ภิกฺขเว, อิเมสํ ปญฺจนฺนํ ปตฺตปิณฺฑิกานํ ยฺวายํ ปตฺตปิณฺฑิโก อปฺปิจฺฉตํเยว นิสฺสาย สนฺตุฏฺฐิํเยว นิสฺสาย สลฺเลขํเยว นิสฺสาย ปวิเวกํเยว นิสฺสาย อิทมตฺถิตํเยว นิสฺสาย ปตฺตปิณฺฑิโก โหติ, อยํ อิเมสํ ปญฺจนฺนํ ปตฺตปิณฺฑิกานํ อคฺโค จ เสฏฺโฐ จ โมกฺโข จ อุตฺตโม จ ปวโร จา’’ติฯ ทสมํฯ

อรญฺญวคฺโค จตุตฺโถฯ

ตสฺสุทฺทานํ –

อรญฺญํ จีวรํ รุกฺข, สุสานํ อพฺโภกาสิกํ;

เนสชฺชํ สนฺถตํ เอกาสนิกํ, ขลุปจฺฉาปิณฺฑิเกน จาติฯ

(20) 5. พฺราหฺมณวคฺโค

1. โสณสุตฺตํ

[191] ‘‘ปญฺจิเม , ภิกฺขเว, โปราณา พฺราหฺมณธมฺมา เอตรหิ สุนเขสุ สนฺทิสฺสนฺติ, โน พฺราหฺมเณสุฯ กตเม ปญฺจ? ปุพฺเพ สุทํ [ปุพฺพสฺสุทํ (ก.)], ภิกฺขเว, พฺราหฺมณา พฺราหฺมณิํเยว คจฺฉนฺติ, โน อพฺราหฺมณิํฯ เอตรหิ, ภิกฺขเว, พฺราหฺมณา พฺราหฺมณิมฺปิ คจฺฉนฺติ, อพฺราหฺมณิมฺปิ คจฺฉนฺติฯ เอตรหิ, ภิกฺขเว, สุนขา สุนขิํเยว คจฺฉนฺติ, โน อสุนขิํฯ อยํ, ภิกฺขเว, ปฐโม โปราโณ พฺราหฺมณธมฺโม เอตรหิ สุนเขสุ สนฺทิสฺสติ, โน พฺราหฺมเณสุฯ

‘‘ปุพฺเพ สุทํ, ภิกฺขเว, พฺราหฺมณา พฺราหฺมณิํ อุตุนิํเยว คจฺฉนฺติ, โน อนุตุนิํฯ