ตโต เตสํ วิปาเกน, กมฺมานํ วิปุลุตฺตมํ;
ลาภํ ลภามิ สพฺพตฺถ, วเน คาเม ชเล ถเลฯ
[40]
เรวตํ ทสฺสนตฺถาย, ยทา ยาติ วินายโก;
ติํสภิกฺขุสหสฺเสหิ, สห โลกคฺคนายโกฯ
[41]
ตทา เทโว ปนีเตหิ [ปณีเตหิ อิติสพฺพตฺถ], มมตฺถาย มหามติ;
ปจฺจเยหิ มหาวีโร, สสงฺโฆ โลกนายโกฯ
[42]
อุปฏฺฐิโต มยา พุทฺโธ, คนฺตฺวา เรวตมทฺทส;
ตโต เชตวนํ คนฺตฺวา, เอตทคฺเค ฐเปสิมํฯ
[43]
ลาภีนํ สีวลิ อคฺโค, มม สิสฺเสสุ ภิกฺขโว;
สพฺเพโลกหิโต สตฺถา, กิตฺตยี ปริสาสุมํฯ
[44]
กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[45]
สฺวาคตํ วต เม อาสิ, พุทฺธเสฏฺฐสฺส สนฺติกํ;
ติสฺโส วิชฺชา อนุปฺปตฺโต, กตํ พุทฺธสฺส สาสนํฯ
[46]
ปฏิสมฺภิทา จตสฺโสปิ, วิโมกฺขา ปิจ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนนฺติฯ
อิตฺถํ สุทํ อายสฺมา สีวลิตฺเถโร อิมา คาถาโย อภาสิตฺถาติฯ
[47]
สุตฺวาน เอตํ จริตํ มหพฺภุตํ,
ปุญฺญานุภาวญฺจ สิริํ สิรีมตํ;
หิตฺวา กุสีตํ กุสลํ กโรถ,
กามาตฺถ กามํ ภวโภคนิพฺพุติํฯ
สีวลิตฺเถรสฺส วตฺถุํ ทสมํฯ
ยกฺขวญฺจิตวคฺโค ตติโยฯ
มหาเสนวคฺโค
31. มหาเสนรญฺโญ วตฺถุมฺหิ อยมานุปุพฺพีกถา