นโม ตสฺส ภควโต อรหโต สมฺมาสมฺพุทฺธสฺสฯ

รสวาหินี

ปณามาทิกถา

[1]

สตฺถุปฺปสตฺถจรณํ สรณํ ชนานํ,

พฺรหฺมาทิโมฬิ มณิรํสิ สมาวหนฺตํ,

ปงฺเกรุหาภมุทุโกมลจารุวณฺณํ;

วนฺทามิ จกฺกวรลกฺขณมาทธานํฯ

[2]

สิทฺธํ ชิเนน จิรกาลมตนฺทิเตน,

ยํ ภาวโก สมธิคจฺฉติ เขมมคฺคํ;

ยํ กปฺปรุกฺข รุจิทาน มณิว ภาติ,

ตํ ธมฺมมคฺค มสมํ ปณมามิ นิจฺจํฯ

[3]

สนฺตินฺทฺริยํ สุคตสูนุวรํ วิสุทฺธํ,

ยํ ทกฺขิเณยฺยมตทํ สุจิปุญฺญเขตฺตํ;

ตาเณสินํ สรณมุชฺฌิตสพฺพทุกฺขํ,

วนฺทามิ สงฺฆ มนฆํ สิรสา มหคฺฆํฯ

[4]

ยมฺปตฺตเมตฺถ รตนตฺตยโถมเนน,

ปุญฺเญน เตน ทุริตํ สกลํ ปณุชฺช,

วกฺขามหํ สุมธุรํ รสวาหินินฺตํ,

โภ โภ สุณนฺตุ สุชนา ภิมุทาวหา สาฯ

[5]

ตตฺถตตฺถูปปนฺนานิ, วตฺถูนิ อรหา ปุเร;

อภาสุํ ทีปภาสาย, ฐเปสุํ ตํ ปุราตนาฯ

[6]

มหาวิหาเร ตงฺคุตฺต, วงฺกปริเวณวาสิโก;

รฏฺฐปาโลติ นาเมน, สีลาจาร คุณากโรฯ

[7]

หิตาย ปริวตฺเตสิ, ปชานํ ปาฬิภาสโต;

ปุนรุตฺตาทิโทเสหิ, ตมาสิ สพฺพมากุลํ;

อนากุลํ กริสฺสามิ, ตํ สุณาถ สมาหิตาฯ

[8]

วิตราคา ปุเร โวจุํ, ยสฺมา ตสฺมา หิ ภาสิตํ;

เอตมาทรณียญฺหิ, สาธุ สาธูหิ สพฺพทาติฯ

ชมฺพุทีปุปฺปตฺติ วตฺถูนิฯ

ธมฺมโสณฺฑกวคฺโค

1. ธมฺมโสณฺฑกสฺส วตฺถุมฺหิ อยมานุปุพฺพีกถา