‘‘สามิโก โหติ ทุสฺสีโล, กทริโย ปริภาสโก;
ภริยา สีลวตี โหติ, วทญฺญู วีตมจฺฉรา;
สาปิ เทวี สํวสติ, ฉเวน ปตินา สหฯ
‘‘สามิโก สีลวา โหติ, วทญฺญู วีตมจฺฉโร;
ภริยา โหติ ทุสฺสีลา, กทริยา ปริภาสิกา;
สาปิ ฉวา สํวสติ, เทเวน ปตินา สหฯ
‘‘อุโภ สทฺธา วทญฺญู จ, สญฺญตา ธมฺมชีวิโน;
เต โหนฺติ ชานิปตโย, อญฺญมญฺญํ ปิยํวทาฯ
‘‘อตฺถาสํ ปจุรา โหนฺติ, ผาสุกํ อุปชายติ;
อมิตฺตา ทุมฺมนา โหนฺติ, อุภินฺนํ สมสีลินํฯ
‘‘อิธ ธมฺมํ จริตฺวาน, สมสีลพฺพตา อุโภ;
นนฺทิโน เทวโลกสฺมิํ, โมทนฺติ กามกามิโน’’ติฯ จตุตฺถํ;
5. ปฐมสมชีวีสุตฺตํ
[55] เอวํ เม สุตํ – เอกํ สมยํ ภควา ภคฺเคสุ วิหรติ สุสุมารคิเร [สุํสุมารคิเร (สี. สฺยา. กํ. ปี.)] เภสกฬาวเน [เภสกลาวเน (สี. ปี. ก.)] มิคทาเยฯ อถ โข ภควา ปุพฺพณฺหสมยํ นิวาเสตฺวา ปตฺตจีวรมาทาย เยน นกุลปิตุโน คหปติสฺส นิเวสนํ เตนุปสงฺกมิ; อุปสงฺกมิตฺวา ปญฺญตฺเต อาสเน นิสีทิฯ อถ โข นกุลปิตา จ คหปติ นกุลมาตา จ คหปตานี เยน ภควา เตนุปสงฺกมิํสุ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิํสุฯ เอกมนฺตํ นิสินฺโน โข นกุลปิตา คหปติ ภควนฺตํ เอตทโวจ –
‘‘ยโต เม, ภนฺเต, นกุลมาตา คหปตานี ทหรสฺเสว ทหรา อานีตา, นาภิชานามิ นกุลมาตรํ คหปตานิํ มนสาปิ อติจริตา, กุโต ปน กาเยน! อิจฺเฉยฺยาม มยํ, ภนฺเต, ทิฏฺเฐ เจว ธมฺเม อญฺญมญฺญํ ปสฺสิตุํ อภิสมฺปรายญฺจ อญฺญมญฺญํ ปสฺสิตุ’’นฺติฯ