7. พหุการสุตฺตํ
[249] ‘‘จตฺตาโรเม , ภิกฺขเว, ธมฺมา มนุสฺสภูตสฺส พหุการา โหนฺติฯ กตเม จตฺตาโร? สปฺปุริสสํเสโว, สทฺธมฺมสวนํ, โยนิโสมนสิกาโร, ธมฺมานุธมฺมปฺปฏิปตฺติ – อิเม โข, ภิกฺขเว, จตฺตาโร ธมฺมา มนุสฺสภูตสฺส พหุการา โหนฺตี’’ติฯ สตฺตมํฯ
8. ปฐมโวหารสุตฺตํ
[250] ‘‘จตฺตาโรเม, ภิกฺขเว, อนริยโวหาราฯ กตเม จตฺตาโร? อทิฏฺเฐ ทิฏฺฐวาทิตา, อสุเต สุตวาทิตา, อมุเต มุตวาทิตา, อวิญฺญาเต วิญฺญาตวาทิตา – อิเม โข, ภิกฺขเว, จตฺตาโร อนริยโวหารา’’ติฯ อฏฺฐมํฯ
9. ทุติยโวหารสุตฺตํ
[251] ‘‘จตฺตาโรเม , ภิกฺขเว, อริยโวหาราฯ กตเม จตฺตาโร? อทิฏฺเฐ อทิฏฺฐวาทิตา, อสุเต อสุตวาทิตา, อมุเต อมุตวาทิตา, อวิญฺญาเต อวิญฺญาตวาทิตา – อิเม โข, ภิกฺขเว, จตฺตาโร อริยโวหารา’’ติฯ นวมํฯ
10. ตติยโวหารสุตฺตํ
[252] ‘‘จตฺตาโรเม, ภิกฺขเว, อนริยโวหาราฯ กตเม จตฺตาโร? ทิฏฺเฐ อทิฏฺฐวาทิตา, สุเต อสุตวาทิตา, มุเต อมุตวาทิตา, วิญฺญาเต อวิญฺญาตวาทิตา – อิเม โข, ภิกฺขเว, จตฺตาโร อนริยโวหารา’’ติฯ ทสมํฯ
11. จตุตฺถโวหารสุตฺตํ
[253] ‘‘จตฺตาโรเม, ภิกฺขเว, อริยโวหาราฯ กตเม จตฺตาโร? ทิฏฺเฐ ทิฏฺฐวาทิตา, สุเต สุตวาทิตา, มุเต มุตวาทิตา, วิญฺญาเต วิญฺญาตวาทิตา – อิเม โข, ภิกฺขเว, จตฺตาโร อริยโวหารา’’ติฯ เอกาทสมํฯ
อาปตฺติภยวคฺโค ปญฺจโมฯ
ตสฺสุทฺทานํ –
เภทอาปตฺติ สิกฺขา จ, เสยฺยา ถูปารเหน จ;
ปญฺญาวุทฺธิ พหุการา, โวหารา จตุโร ฐิตาติฯ
ปญฺจมปณฺณาสกํ สมตฺตํฯ
(26) 6. อภิญฺญาวคฺโค
1. อภิญฺญาสุตฺตํ
[254] ‘‘จตฺตาโรเม , ภิกฺขเว, ธมฺมาฯ กตเม จตฺตาโร? อตฺถิ, ภิกฺขเว, ธมฺมา อภิญฺญา ปริญฺเญยฺยา; อตฺถิ, ภิกฺขเว , ธมฺมา อภิญฺญา ปหาตพฺพา; อตฺถิ, ภิกฺขเว, ธมฺมา อภิญฺญา ภาเวตพฺพา; อตฺถิ, ภิกฺขเว, ธมฺมา อภิญฺญา สจฺฉิกาตพฺพาฯ
‘‘กตเม จ, ภิกฺขเว, ธมฺมา อภิญฺญา ปริญฺเญยฺยา? ปญฺจุปาทานกฺขนฺธา [ปญฺจุปาทานกฺขนฺธาติสฺส วจนียํ (ก.)] – อิเม วุจฺจนฺติ, ภิกฺขเว , ธมฺมา อภิญฺญา ปริญฺเญยฺยาฯ
‘‘กตเม จ, ภิกฺขเว, ธมฺมา อภิญฺญา ปหาตพฺพา? อวิชฺชา จ ภวตณฺหา จ – อิเม วุจฺจนฺติ, ภิกฺขเว, ธมฺมา อภิญฺญา ปหาตพฺพาฯ
‘‘กตเม จ, ภิกฺขเว, ธมฺมา อภิญฺญา ภาเวตพฺพา? สมโถ จ วิปสฺสนา จ – อิเม วุจฺจนฺติ, ภิกฺขเว, ธมฺมา อภิญฺญา ภาเวตพฺพาฯ
‘‘กตเม จ, ภิกฺขเว, ธมฺมา อภิญฺญา สจฺฉิกาตพฺพา? วิชฺชา จ วิมุตฺติ จ – อิเม วุจฺจนฺติ, ภิกฺขเว, ธมฺมา อภิญฺญา สจฺฉิกาตพฺพาฯ อิเม โข, ภิกฺขเว, จตฺตาโร ธมฺมา’’ติฯ ปฐมํฯ
2. ปริเยสนาสุตฺตํ
[255] ‘‘จตสฺโส อิมา, ภิกฺขเว, อนริยปริเยสนาฯ กตมา จตสฺโส? อิธ, ภิกฺขเว, เอกจฺโจ อตฺตนา ชราธมฺโม สมาโน ชราธมฺมํเยว ปริเยสติ; อตฺตนา พฺยาธิธมฺโม สมาโน พฺยาธิธมฺมํเยว ปริเยสติ; อตฺตนา มรณธมฺโม สมาโน มรณธมฺมํเยว ปริเยสติ; อตฺตนา สํกิเลสธมฺโม สมาโน สํกิเลสธมฺมํเยว ปริเยสติฯ อิมา โข, ภิกฺขเว, จตสฺโส อนริยปริเยสนาฯ
‘‘จตสฺโส อิมา, ภิกฺขเว, อริยปริเยสนาฯ