เมนู

10. ทุสฺสีลสุตฺตํ

[220] ‘‘จตูหิ , ภิกฺขเว, ธมฺเมหิ สมนฺนาคโต ยถาภตํ นิกฺขิตฺโต เอวํ นิรเยฯ กตเมหิ จตูหิ? อสฺสทฺโธ โหติ, ทุสฺสีโล โหติ, กุสีโต โหติ, ทุปฺปญฺโญ โหติ – อิเมหิ โข, ภิกฺขเว, จตูหิ ธมฺเมหิ สมนฺนาคโต ยถาภตํ นิกฺขิตฺโต เอวํ นิรเยฯ

‘‘จตูหิ, ภิกฺขเว, ธมฺเมหิ สมนฺนาคโต ยถาภตํ นิกฺขิตฺโต เอวํ สคฺเคฯ กตเมหิ จตูหิ ? สทฺโธ โหติ, สีลวา โหติ, อารทฺธวีริโย โหติ, ปญฺญวา โหติ – อิเมหิ โข, ภิกฺขเว, จตูหิ ธมฺเมหิ สมนฺนาคโต ยถาภตํ นิกฺขิตฺโต เอวํ สคฺเค’’ติฯ ทสมํฯ

ปริสาวคฺโค [โสภนวคฺโค (สี. สฺยา. กํ. ปี.)] ทุติโยฯ

ตสฺสุทฺทานํ –

ปริสา ทิฏฺฐิ อกตญฺญุตา, ปาณาติปาตาปิ ทฺเว มคฺคา;

ทฺเว โวหารปถา วุตฺตา, อหิริกํ ทุปฺปญฺเญน จาติฯ

(23) 3. ทุจฺจริตวคฺโค

1. ทุจฺจริตสุตฺตํ

[221] ‘‘จตฺตาริมานิ , ภิกฺขเว, วจีทุจฺจริตานิฯ กตมานิ จตฺตาริ? มุสาวาโท, ปิสุณา วาจา, ผรุสา วาจา, สมฺผปฺปลาโป – อิมานิ โข, ภิกฺขเว, จตฺตาริ วจีทุจฺจริตานิฯ จตฺตาริมานิ, ภิกฺขเว, วจีสุจริตานิฯ กตมานิ จตฺตาริ? สจฺจวาจา, อปิสุณา วาจา, สณฺหา วาจา, มนฺตวาจา [มนฺตา วาจา (สี. สฺยา. กํ. ปี.)] – อิมานิ โข, ภิกฺขเว, จตฺตาริ วจีสุจริตานี’’ติฯ ปฐมํฯ