4. โอภาสสุตฺตํ
[144] ‘‘จตฺตาโรเม , ภิกฺขเว, โอภาสาฯ กตเม จตฺตาโร? จนฺโทภาโส, สูริโยภาโส, อคฺโคภาโส, ปญฺโญภาโส – อิเม โข, ภิกฺขเว, จตฺตาโร โอภาสาฯ เอตทคฺคํ, ภิกฺขเว, อิเมสํ จตุนฺนํ โอภาสานํ ยทิทํ ปญฺโญภาโส’’ติฯ จตุตฺถํฯ
5. ปชฺโชตสุตฺตํ
[145] ‘‘จตฺตาโรเม , ภิกฺขเว, ปชฺโชตาฯ กตเม จตฺตาโร? จนฺทปชฺโชโต, สูริยปชฺโชโต, อคฺคิปชฺโชโต, ปญฺญาปชฺโชโต – อิเม โข, ภิกฺขเว, จตฺตาโร ปชฺโชตาฯ เอตทคฺคํ, ภิกฺขเว, อิเมสํ จตุนฺนํ ปชฺโชตานํ ยทิทํ ปญฺญาปชฺโชโต’’ติฯ ปญฺจมํฯ
6. ปฐมกาลสุตฺตํ
[146] ‘‘จตฺตาโรเม, ภิกฺขเว, กาลาฯ กตเม จตฺตาโร? กาเลน ธมฺมสฺสวนํ, กาเลน ธมฺมสากจฺฉา, กาเลน สมฺมสนา [กาเลน สมโถ (สี. สฺยา. กํ. ปี.)], กาเลน วิปสฺสนา – อิเม โข, ภิกฺขเว, จตฺตาโร กาลา’’ติฯ ฉฏฺฐํฯ
7. ทุติยกาลสุตฺตํ
[147] ‘‘จตฺตาโรเม, ภิกฺขเว, กาลา สมฺมา ภาวิยมานา สมฺมา อนุปริวตฺติยมานา อนุปุพฺเพน อาสวานํ ขยํ ปาเปนฺติฯ กตเม จตฺตาโร? กาเลน ธมฺมสฺสวนํ, กาเลน ธมฺมสากจฺฉา, กาเลน สมฺมสนา, กาเลน วิปสฺสนา – อิเม โข, ภิกฺขเว, จตฺตาโร กาลา สมฺมา ภาวิยมานา สมฺมา อนุปริวตฺติยมานา อนุปุพฺเพน อาสวานํ ขยํ ปาเปนฺติฯ
‘‘เสยฺยถาปิ, ภิกฺขเว, อุปริปพฺพเต ถุลฺลผุสิตเก เทเว วสฺสนฺเต ตํ อุทกํ ยถานินฺนํ ปวตฺตมานํ ปพฺพตกนฺทรปทรสาขา ปริปูเรติ; ปพฺพตกนฺทรปทรสาขา ปริปูรา กุโสพฺเภ ปริปูเรนฺติ; กุโสพฺภา ปริปูรา มหาโสพฺเภ ปริปูเรนฺติ; มหาโสพฺภา ปริปูรา กุนฺนทิโย ปริปูเรนฺติ; กุนฺนทิโย ปริปูรา มหานทิโย ปริปูเรนฺติ; มหานทิโย ปริปูรา สมุทฺทํ [สมุทฺทํ สาครํ (สี. ปี. ก.), สมุทฺทสาครํ (สฺยา. กํ.)] ปริปูเรนฺติฯ เอวเมวํ โข, ภิกฺขเว, อิเม จตฺตาโร กาลา สมฺมา ภาวิยมานา สมฺมา อนุปริวตฺติยมานา อนุปุพฺเพน อาสวานํ ขยํ ปาเปนฺตี’’ติฯ สตฺตมํฯ
8. ทุจฺจริตสุตฺตํ
[148] ‘‘จตฺตาริมานิ , ภิกฺขเว, วจีทุจฺจริตานิฯ กตมานิ จตฺตาริ? มุสาวาโท, ปิสุณา วาจา, ผรุสา วาจา, สมฺผปฺปลาโป – อิมานิ โข, ภิกฺขเว, จตฺตาริ วจีทุจฺจริตานี’’ติฯ อฏฺฐมํฯ
9. สุจริตสุตฺตํ
[149] ‘‘จตฺตาริมานิ, ภิกฺขเว, วจีสุจริตานิฯ กตมานิ จตฺตาริ? สจฺจวาจา, อปิสุณา วาจา, สณฺหา วาจา, มนฺตภาสา – อิมานิ โข, ภิกฺขเว, จตฺตาริ วจีสุจริตานี’’ติฯ นวมํฯ
10. สารสุตฺตํ
[150] ‘‘จตฺตาโรเม, ภิกฺขเว, สาราฯ กตเม จตฺตาโร? สีลสาโร, สมาธิสาโร, ปญฺญาสาโร, วิมุตฺติสาโร – อิเม โข, ภิกฺขเว, จตฺตาโร สารา’’ติฯ ทสมํฯ
อาภาวคฺโค ปญฺจโมฯ
ตสฺสุทฺทานํ –
อาภา ปภา จ อาโลกา, โอภาสา เจว ปชฺโชตา;
ทฺเว กาลา จริตา ทฺเว จ, โหนฺติ สาเรน เต ทสาติฯ
ตติยปณฺณาสกํ สมตฺตํฯ
4. จตุตฺถปณฺณาสกํ