10. วาทีสุตฺตํ

[140] ‘‘จตฺตาโรเม , ภิกฺขเว, วาทีฯ กตเม จตฺตาโร? อตฺถิ , ภิกฺขเว, วาที อตฺถโต ปริยาทานํ คจฺฉติ, โน พฺยญฺชนโต; อตฺถิ, ภิกฺขเว, วาที พฺยญฺชนโต ปริยาทานํ คจฺฉติ, โน อตฺถโต; อตฺถิ, ภิกฺขเว, วาที อตฺถโต จ พฺยญฺชนโต จ ปริยาทานํ คจฺฉติ; อตฺถิ, ภิกฺขเว, วาที เนวตฺถโต โน พฺยญฺชนโต ปริยาทานํ คจฺฉติฯ อิเม โข, ภิกฺขเว, จตฺตาโร วาทีฯ อฏฺฐานเมตํ, ภิกฺขเว, อนวกาโส ยํ จตูหิ ปฏิสมฺภิทาหิ สมนฺนาคโต [สมนฺนาคโต ภิกฺขุ (สี. สฺยา. กํ.)] อตฺถโต วา พฺยญฺชนโต วา ปริยาทานํ คจฺเฉยฺยา’’ติฯ ทสมํฯ

ปุคฺคลวคฺโค จตุตฺโถฯ

ตสฺสุทฺทานํ –

สํโยชนํ ปฏิภาโน, อุคฺฆฏิตญฺญุ อุฏฺฐานํ;

สาวชฺโช ทฺเว จ สีลานิ, นิกฏฺฐ ธมฺม วาที จาติฯ

(15) 5. อาภาวคฺโค

1. อาภาสุตฺตํ

[141] ‘‘จตสฺโส อิมา, ภิกฺขเว, อาภาฯ กตมา จตสฺโส? จนฺทาภา, สูริยาภา, อคฺคาภา, ปญฺญาภา – อิมา โข, ภิกฺขเว, จตสฺโส อาภาฯ เอตทคฺคํ, ภิกฺขเว, อิมาสํ จตุนฺนํ [จตสฺสนฺนํ (สฺยา. กํ.) สทฺทนีติปทมาลา ปสฺสิตพฺพา] อาภานํ ยทิทํ ปญฺญาภา’’ติฯ ปฐมํฯ

2. ปภาสุตฺตํ

[142] ‘‘จตสฺโส อิมา, ภิกฺขเว, ปภาฯ กตมา จตสฺโส? จนฺทปฺปภา , สูริยปฺปภา, อคฺคิปฺปภา, ปญฺญาปภา – อิมา โข, ภิกฺขเว, จตสฺโส ปภาฯ เอตทคฺคํ, ภิกฺขเว, อิมาสํ จตุนฺนํ ปภานํ ยทิทํ ปญฺญาปภา’’ติฯ ทุติยํฯ

3. อาโลกสุตฺตํ

[143] ‘‘จตฺตาโรเม, ภิกฺขเว, อาโลกาฯ กตเม จตฺตาโร? จนฺทาโลโก, สูริยาโลโก, อคฺคาโลโก, ปญฺญาโลโก – อิเม โข, ภิกฺขเว, จตฺตาโร อาโลกาฯ เอตทคฺคํ, ภิกฺขเว, อิเมสํ จตุนฺนํ อาโลกานํ ยทิทํ ปญฺญาโลโก’’ติฯ ตติยํฯ

4. โอภาสสุตฺตํ

[144] ‘‘จตฺตาโรเม , ภิกฺขเว, โอภาสาฯ กตเม จตฺตาโร? จนฺโทภาโส, สูริโยภาโส, อคฺโคภาโส, ปญฺโญภาโส – อิเม โข, ภิกฺขเว, จตฺตาโร โอภาสาฯ เอตทคฺคํ, ภิกฺขเว, อิเมสํ จตุนฺนํ โอภาสานํ ยทิทํ ปญฺโญภาโส’’ติฯ จตุตฺถํฯ

5. ปชฺโชตสุตฺตํ

[145] ‘‘จตฺตาโรเม , ภิกฺขเว, ปชฺโชตาฯ กตเม จตฺตาโร? จนฺทปชฺโชโต, สูริยปชฺโชโต, อคฺคิปชฺโชโต, ปญฺญาปชฺโชโต – อิเม โข, ภิกฺขเว, จตฺตาโร ปชฺโชตาฯ เอตทคฺคํ, ภิกฺขเว, อิเมสํ จตุนฺนํ ปชฺโชตานํ ยทิทํ ปญฺญาปชฺโชโต’’ติฯ ปญฺจมํฯ

6. ปฐมกาลสุตฺตํ

[146] ‘‘จตฺตาโรเม, ภิกฺขเว, กาลาฯ กตเม จตฺตาโร? กาเลน ธมฺมสฺสวนํ, กาเลน ธมฺมสากจฺฉา, กาเลน สมฺมสนา [กาเลน สมโถ (สี. สฺยา. กํ. ปี.)], กาเลน วิปสฺสนา – อิเม โข, ภิกฺขเว, จตฺตาโร กาลา’’ติฯ ฉฏฺฐํฯ

7. ทุติยกาลสุตฺตํ

[147] ‘‘จตฺตาโรเม, ภิกฺขเว, กาลา สมฺมา ภาวิยมานา สมฺมา อนุปริวตฺติยมานา อนุปุพฺเพน อาสวานํ ขยํ ปาเปนฺติฯ กตเม จตฺตาโร? กาเลน ธมฺมสฺสวนํ, กาเลน ธมฺมสากจฺฉา, กาเลน สมฺมสนา, กาเลน วิปสฺสนา – อิเม โข, ภิกฺขเว, จตฺตาโร กาลา สมฺมา ภาวิยมานา สมฺมา อนุปริวตฺติยมานา อนุปุพฺเพน อาสวานํ ขยํ ปาเปนฺติฯ