กายปจฺจเวกฺขณา
[1]
นาทิกาล วิปริต, ชน ภูตตฺถ ทสฺสิโน;
ทาตุเม กนฺติกสฺสาทํ, สตฺถุ ปาโท ติมานิโตฯ
[2]
สีเส ปิลนฺทิยา โมที, สมฺพุทฺธ จรณ มฺพุชํ;
สาธุ ตุฏฺฐิกรํ พฺรูมิ, สุกาย ปจฺจเวกฺขณํฯ
[3]
โยนิโส มนสีกตฺวา, นาทา วิรุทฺธ มญฺญิตํ;
สาธโว ต มุทิกฺขนฺตุ, มยาปิ มนฺทพุทฺธิโนฯ
[4]
อิจฺฉิตพฺพาน มายตฺตา, เตสญฺจ จยภาวโต;
ตทากาเรน วตฺติตา, กาโย เชคุจฺฉ ปุญฺชโกฯ
[5]
ปุนปฺปุนํว โอกฺกม, ญาณ มนฺโต ปเวสิย;
พาหิรํว อนาลมฺพ, อิกฺขณา ปจฺจเวกฺขณาฯ
[6]
มํสจฺฉนฺน ฏฺฐิรูเปว, มโนช วายุ จาลิเต;
นารี คตาติ ยาจินฺตา, เนว สาปจฺจเวกฺขณาฯ
[7]
สญฺญาทิฏฺฐิจ จิตฺตญฺจ, วิปลฺลาสา อิเมตโย;
ต ทากาเรน วตฺตนฺติ, อวิชฺโช ตฺถริตา ภุสํฯ
[8]
อาสา วิปริเต เยสํ,
วิปลฺลาสาติ เตมตา;
อาสา อาสิสนา วุตฺตา,
ตณฺหาเยว สภาวโตฯ
[9]
อสุเภว สุภมิติ, อนิจฺเจเอว นิจฺจโต;
ทุกฺเขเยว สุขํวาติ, อนตฺตนิว อตฺตโตฯ
[10]
สญฺญาณํ ทสฺสนํ จินฺตา,
ทฺวาทสา การโต ตโย;
ทิฏฺฐิสา จาทิ มคฺเคน,
เสสา เสเสหิ วชฺฌิตาฯ
[11]
ตณฺหา ตสฺสิ มเมตนฺติ, มาโน มญฺญิ อหนฺติจ;
ยสฺสิ ทิฏฺฐิจ อตฺตาติ, ปปญฺจา นามิเม ตโยฯ
[12]
ปปญฺจนฺติ สํสารํ, ตสฺมา ปปญฺจนามกา;
ภวยนฺเต ปโยเชนฺตา, โมกฺขํ นาทํสุ เต จิรํฯ
[13]
ภวปงฺเก นิ มุชฺชนฺตา, ปปญฺจานํ วสานุคา;
จิรสฺสํ ทุกฺขิตา โหนฺติ, อารา นิพฺพานโต ติวฯ
[14]
นเม นาหํ นอตฺตาติ, เอเตหิ วิวทํ กเร;
ภณฺฑนฺตา วิวทนฺตา เต, นิพฺพานโต อทูริโนฯ
[15]
วิปลฺลาเส ปปญฺเจจ, ทฺเวปิเอเต ปหาตเว;
โสปจฺจเวกฺขิตพฺเพ วํ, กาโย เชคุจฺฉปุญฺชโกฯ
[16]
เกสา โลมา นขาทนฺตา,
ตณฺหายาปิจ โคจรา;
ตสฺมา เต ทฏฺฐุกาเมน,
ตณฺหา นิวาริตา สทาฯ
[17]
ลคฺคิกา ฉวิยํเยว, ตณฺหา พาหิรโคจรา;
ตสฺมา เอตฺถ ตโจวาห, สมฺพุทฺโธ น พหิจฺฉวิํฯ
[18]
เอสา ตจปริยนฺต, ปเทนาปิ นิวาริตา;
อโต ฉวิ มนาลมฺพ, ตจสีว มเนกเรฯ
[19]
ชิคุจฺฉิตานิ ฉาเทติ, อฏฺฐิ มํส ตจาทินิ;
ญาเณน ฉินฺทิ ตพฺพาจ, ตสฺมา ฉวีติ วุจฺจติฯ
[20]
ฉวิํ เฉตฺวา ตจํ ปสฺเส,
ตํ เฉตฺวา มํสกาทโย;
คพฺเภวตฺถูนิ ทีเปน,
ยถา ปญฺญาปทีปิโกฯ
[21]
เชคุจฺโฉ ฉวิยา กาโย,
อสุโภว สุภายเต;
นิจฺฉวา ตจมตฺเตน,
กถํ สุภายเต อยํฯ
[22]
นฺหารุพนฺโธ ฏฺฐิสงฺฆาโต, มํสโลหิ ต ลิมฺปิโต;
ฉวิยาว วิโมเหติ, ตจจฺฉนฺโน อิมํ ปชํฯ
[23]
วณฺณ สณฺฐาน โตเจว,
คนฺโธ กาสา สเยหิจ;
เชคุจฺฉา ปฏิกุลฺยาจ,
เกสานาม น เมปิยาฯ
[24]
เอเกกํ มนสีกตฺวา, นเย นิจฺเจว มาทินา;
ภาเวตพฺพา สมารมฺภ, ยถาปญฺญายเต ตถาฯ
[25]
ปูริตํ มตฺถลุงฺคสฺส, สีสฏฺฐิปิ ชิคุจฺฉิตํ;
มุข นาสกฺขิ กณฺณาทิ, ฉิทฺทา วฉิทฺท ทุทฺทสํฯ
[26]
ปูติ วายุ วิจริต, กุจฺฉิฏฺฐนฺตานิ โลหิตํ;
ปิตฺตํ เสมฺหญฺจ ปปฺผาสํ, หทยํ ยกนมฺปิ ธีฯ
[27]
อนฺน ปานํ มนุญฺญมฺปิ, เขฬ ตินฺต มโธปริ;
ทนฺเตหิ ปิสิตํ สฺวาน, วมถูว ชิคุจฺฉิตํฯ
[28]
ยาวตายุ อโธเตวา, มาสเย คิลิตํ ฐิตํ;
กิมิกูล สมากิณฺเณ, ตหิเมวา สิตาสิตํฯ
[29]
เอตํ อุทริยํ นาม, ตมฺหา ปกฺกาสยํ คตํ;
ทินจฺจเย กรีสนฺตํ, สา สยํ ตํทฺวยมฺปิ ธีฯ
[30]
ปกาเสตฺวา ปเวเสติ, อนฺนปานํ มหารหํ;
ปฏิจฺฉนฺโน นิหรติ, ตเมว นฺโต ฐิตํ ชโนฯ
[31]
ปเวเส ตํ ปริวโต,
นิหเรโก รโห ลิโน;
มนุญฺญํว ปวีสนฺเต,
นิกฺขมนฺเต ชิคุจฺฉิตํฯ
[32]
เชคุจฺฉ ปฏิกุลฺยานิ, มํสนฺหารุ ตจฏฺฐินิ;
นปิยานิ น ตุฏฺฐานิ, เนวอิตฺถี นปูปิโสฯ
[33]
หตฺถ ปาท มุขาทีนิ,
นตฺถญฺญานิ ชิคุจฺฉิตา;
ตตฺถา กุมาริกา กญฺญา,
โมเหน อตฺถิสญฺญิตาฯ
[34]
ปจฺเจกํ วินิภุตฺเตส, เกส โลม นขาทิสุ;
นตฺถิกญฺญา กุมารีวา, สมฺปิณฺฑิเตสุ สา กุโตฯ
[35]
อากาโสเยว กายางฺโขฺย,
ตจาทิ ปริวาริโต;
ตถาสีสํ มุขํหตฺโถ,
ปาโทรุ กฏิอาทโยฯ
[36]
ถมฺภาทีสฺวิว เคโหติ,
ปิณฺฑิเต สฺเวสุ สมฺมุติ;
กาโยติ อิตฺถิโปโสติ,
สํมุฬฺโห ตายรชฺชติฯ
[37]
สนฺตํ จินฺเตยฺย นาสนฺตํ, สนฺตํ จินฺตยโต สุขํ;
อสนฺตํ อนุจินฺเตนฺโต, นานาทุกฺเขหิ ตปฺปติฯ
[38]
ชวตฺยา วิชฺชมาเนว, นาวิชฺชา วิชฺชมานเก;
ตสฺมาตํนามโก โมโห, ตณฺหาปิจ ตทนฺวิตาฯ
[39]
ปุํกาโยวาถีกาโยวา , มลาสุจิชิคุจฺฉิโต;
ตสฺสมํ นตฺถิคารยฺหํ, ยฺวามลมฺปิ มลํกเรฯ
[40]
นตฺถิ กายสโมเวรี,
มหานตฺถกโร จีรํ;
นตฺถิ กายสโม วญฺโจ,
อสุโภว สุภายเตฯ
[41]
ถีปุํ สปรกาโยติ, ปสฺสติปิ นปสฺสติ;
เชคุจฺฉ ปฏิกุลฺโยติ, สมฺมา ปสฺสติ ปสฺสติฯ
[42]
สุโภสุโภติ มญฺญนฺตา,
ธีติ ธีติ ชิเนริเต;
โลกาโลกา นธีเยสํ,
ภวา ภวา วจาริโนฯ
[43]
ภิยฺโยภิยฺโยว ราคคฺคิ,
สุโภสุโภติปสฺสโต;
มนฺโทมนฺโทว โสอคฺคิ,
ธีวธีววิปสฺสโตฯ
[44]
พหุสฺสุโตปิ พาโลว, อสุเภ สุภมญฺญโก;
อสุโภติ วิปสฺสนฺโต, อปฺปสฺสุโตปิปณฺฑิโตฯ
[45]
โยจ สิปฺปานิ ชาเนยฺย, สตานิ สหสฺสานิปิ;
กาเยกชานนํ เสยฺโย, ยญฺเจ อญฺญ วิชานํนํฯ
[46]
กายเมกมฺปิ นญฺญามิ, พุทฺธาลทฺธนโย อปิ;
สุตาจ ปณฺฑิตาตฺยมฺหา, ยุตฺโตเยวา ติลชฺชิตุํฯ
[47]
สุภโตเยว มญฺญามิ, เอวํ ชิคุจฺฉิตมฺปินํ;
มญฺจ เญ ปณฺฑิโต ตฺยาหุ, อลเมวาติลชฺชิตุํฯ
[48]
กาเย อสุภสญฺญํโย, นลภามิ กทาจิปิ;
สุลทฺธ สุคโต วาโท, สฺวารโหวาติลชฺชิตุํฯ
[49]
กาเยน สํสรนฺโตปิ, ตทาการํ ยถาตถํ;
ภเวภเว อชานนฺโต, มมายิตฺวาว ตํ จชิํฯ
[50]
กาเยน สํสรนฺโตปิ, นญฺญา กาย ชิคุจฺจตํ;
นิจฺจุปาทา มมายนฺโต, ปิยายิตฺวาว ตํ จชิํฯ
[51]
กุภารํ สารสญฺญาย, ปิยายิตฺวาว หิํสกํ;
อนนฺตทุกฺข มาปาทิํ, วิปลฺลาโส ภเวภเวฯ
[52]
มหาชานีย ปตฺโตติ, สํเวเชตฺวา สกํมนํ;
ทิโรกต ชิโนวาโท, อนิวตฺติต วีริโยฯ
[53]
อทิฏฺฐปุพฺพ เมตสฺส, ตถาการํว ปสฺสตุ;
กิจฺจ มญฺญ มุเปกฺขาย, สํสาร ภย ภีรุโกฯ
[54]
ยญฺหิกิจฺจํ อปวิฏฺฐํ, อกิจฺจํ ปน กยิรา;
อุนฺนฬานํ ปมตฺตานํ, เตสํ วฑฺฒนฺติ อาสวาฯ
[55]
เยสญฺจ สุสมารทฺธา, นิจฺจํ กายคตา สติ;
อกิจฺจํ เต นเสวนฺติ, กิจฺเจ สาตต การิโน;
สตานํ สมฺปชานานํ, อตฺถํ คจฺฉนฺติ อาสวาติฯ
[56]
โถเมนฺตา โสณฺณํ กาโยร,
มุขกฺขิ ตฺยาทินา อิมํ;
รตฺเต มุฏฺเฐ กโรนฺเตเต,
อญฺเญชเน สยํวิยฯ
[57]
กายโสภฺย ปกาเสตา,
วาจา เว มารเทสนา;
ตทโสภฺย ปกาเสตา,
วาจา สมฺมุทฺธ เทสนาฯ
[58]
อสุโภติ ชินุทฺทิฏฺฐํ, กายํ สุโภติ คาหิโน;
สํมุฬฺหาเต น มุจฺจนฺติ, ภวา พุทฺธ วิโรธิโนฯ
[59]
อสุโภติ ชินุทฺทิฏฺฐํ, กายํ ตเถว คาหิโน;
ปณฺฑิตา เตว มุจฺจนฺติ, ภวา พุทฺธมตานุคาฯ
[60]
โสเธนฺเตลงฺกโรนฺเตว , มลาสวนฺติกายโต;
อลํ กายวิโสเธน, พาโลว ตํ ครุํ กโรฯ
[61]
โคเปนฺเตว อโรคาย,
กาโย โรเคนสํวเส;
คายคุตฺตํ มุธาเยว,
จิตฺตคุตฺตํว สาตฺถกํฯ
[62]
จนฺทนาทิ วิลิตฺโตปิ,
มุตฺโตมณิ วิภูสิโต;
ตํสภาโวว โสกาโย,
วิสฺสวนฺโต ตโตตโตฯ
[63]
ปติเตจ อปติเต,
วิเสโส นตฺถิ กิญฺจิปิ;
กาโย เจมนุญฺโญ ตมฺหา,
ปติโตปิ ตถาสิยาฯ
[64]
กาโย มนุสฺสชาตีนํ, ติรจฺฉาน ตฺตภาวโต;
เชคุจฺฉิต ตโรโหติ, ทุพฺพิโสโธจ ทุพฺภโรฯ
[65]
ยถาชาเตน กาเยน, สกฺกา วิหริตุํ นจ;
ปจฺจหํ โสธนีโยจ, โธวน มชฺชนาทิภิฯ
[66]
รตฺตํ ปาตุํ ฉวิํ เฉตฺวา, สกฺกา ฑํสาทโยปินํ;
เฉตฺวา มํส ฏฺฐิกาทีนิ, ธีโร นาลมฺพิตุํ กถํฯ
[67]
ลคฺคนฺติ ฉวิมตฺเต เย, มกฺขิกา เสทปา ยถา;
ถีปุํ มุขาทิ สญฺญาย, เต ปมุฬฺหา มหาตปาฯ
[68]
จารี อโคจเร กาเม, ลคฺคาเลเป กปีริว;
พหูหิ ปีฬิตา รีหิ, มรนฺติ อติทุกฺขิโนฯ
[69]
ราคาริํ ทุชฺชยํ เชยฺยุํ, ชยภุมฺมาสุเภ จรา;
สีตานิสฺสิต ลฏุกี, เสนกํว มหพฺพลํฯ
[70]
กายธิ คฺโคจโร เวโส,
ชยภูพุทฺธ ทุตฺติยา;
เอตฺเถว โคจรา โหนฺตุ,
มาโภ กาเม ชยตฺถิกาฯ
[71]
กายา สุภํ วิปสฺสนฺตุ, ทิพฺพ กฺขินาปฺย ปสฺสิยํ;
อายติํ มคฺคลาภาย, ตํ ทสฺสนํ ภวิสฺสติฯ
[72]
ธีจกฺขุนาว ธิกฺกายํ, ปสฺเส น มํสจกฺขุนา;
อุมฺมิลิตฺวาว ธีจกฺขุํ, วิเวกฏฺโฐ อุทิกฺขตุฯ
[73]
ปญฺจงฺคานิ ยถา กุมฺโม, จกฺขาทีนิ นิคูหเย;
เวรี ลภตุ โมกาสํ, ปญฺจทฺวารา อรกฺขิตาฯ
[74]
จกฺขุรูเปน สํวาสา, ราคปุตฺตํ วิชายติ;
มหานตฺถกโร โสจ, สํวาสํ เตน วารเยฯ
[75]
รูปาทีสุสญฺชนฺตีติ, สตฺตา อิตฺถฺยาทิ สญฺญาย;
นตฺเวว ขนฺธสญฺญาย, ตํสญฺญิหิ วิราคิโนฯ
[76]
สกาเยปรกาเยจ ,
อาสํ ฉินฺเทยฺย ปณฺฑิโต;
อาสํ เฉตฺวา สุขํเสติ,
อาสาย ทุกฺขิตา ปชาฯ
[77]
ทสฺสเน สวเน กาย,
สํสคฺเค เมถุเนปิจ;
นิราโส สุขิโต โหติ,
อนิราโสติทุกฺขิโตฯ
[78]
พหีว โสธิตํ ยสฺส, น วนฺโต เชคุจฺฉ ปุญฺชกํ;
ตํกายํ อสุตํชาน, ตนุราโค สิยาตฺตนิฯ
[79]
กาเยวิราค มิจฺฉนฺโต, นุปสฺเสยฺย ตทนฺตรํ;
อนฺโตทสฺสี อตปฺปนฺโต, ลเภ สํสารโมจนํฯ
[80]
สตฺตา สตฺตา พหิฏฺเฐวา, สารํสารํ มมายิโน;
สนฺโตสนฺโต วิปสฺสนฺโต, นวานวายติํภเวฯ
[81]
อลํ อลํ กตฺวา กายํ, มลามลาสวนฺติโต;
โสภํ โสภํ นเย ฐานํ, มนํ มนํ ปฺยลํ กตํฯ
[82]
สํสคฺคชาตสฺส ภวนฺติ สฺเนหา,
สฺเนหานฺวยํ ทุกฺข มิทํ ปโหติ;
อาทินวํ สฺเนหชํเปกฺข มาโน,
เอโก จเรขคฺค วิสาณ กปฺโปฯ
[83]
ขิฏฺฏา รติ โหติ สหาย มชฺเฌ,
ปุตฺเตสุจ วิปุลํ โหติ เปมํ;
ปิยวิปฺปโยคํ วิชิคุจฺฉมาโน,
เอโก จเร ขคฺควิสาณ กปฺโปฯ
[84]
วํโส วิสาโลยถา วิสตฺโต,
ปุตฺเตสุ ทาเรสุจ ยาอเปกฺขา;
วํสกฬิโรว อสชฺชมาโน,
เอโก จเร ขคฺควิสาณ กปฺโปฯ
[85]
กามํ กามย มานสฺส, ตสฺสเจตํ สมิชฺฌติ;
อทฺธา ปีติมโน โหติ, มจฺโจ ลทฺธา ยทิจฺฉติฯ
[86]
ตสฺสเจ กามยานสฺส, ฉนฺทชาตสฺส ชนฺตุโน;
เตกามา ปริหายนฺติ, สลฺลวิทฺโธว รุปฺปติฯ
[87]
โยกาเม ปริวชฺเชติ, สปฺปสฺเสว ปทา สิโร;
โสมํ วิสตฺติกํ โลเก, สโต สมติวตฺตติฯ
[88]
เขตฺตํ วตฺถุํ ตฬากํวา, ควสฺสํ ทาสโปริสํ;
ถิโย พนฺธู ปุถุกาเม, โยนโร อนุคิชฺฌติฯ
[89]
อพลา นํ พลียนฺติ, มทฺทนฺเตนํ ปริสฺสยา;
ตโตนํ ทุกฺขมนฺเวติ, นาวํ ภินฺน มิโวทกํฯ
[90]
ตสฺมาชนฺตุ สทาสโต, กามานิ ปริวชฺชเย;
เต ปหาย ตเร โอฆํ, นาวํ สิตฺวาว ปารคูฯ
[91]
กามโต ชายเต โสโก,
กามโต ชายเต ภยํ;
กามโต วิปฺปมุตฺตสฺส,
นตฺถิ โสโก กุโต ภยํฯ
[92]
สุภานุปสฺสิํ วิหรนฺตํ, อินฺทฺริเยสุ อสํวุตํ;
โภชนมฺหิ อมตฺตญฺญุํ, กุสิตํ หีน วีริยํ;
ตํเว ปสหติ มาโร, วาโต รุกฺขํว ทุพฺพลํฯ
[93]
อสุภานุปสฺสิํ วิหรนฺตํ, อินฺทฺริเยสุ สุสํวุตํ;
โภชนมฺหิจ มตฺตญฺญุํ, สทฺธํ อารทฺธ วีริยํ;
ตํเว นปฺปสหติ มาโร, วาโต เสลํว ปพฺพตํฯ
[94]
ยถา อคารํ ทุจฺฉนฺนํ, วุฏฺฐิ สมติ วิชฺฌติ;
เอวํ อภาวิตํ จิตฺตํ, ราโค สมติวิชฺฌติฯ
[95]
ตเทวํ ปจฺจเวกฺขนฺติ, เย เต ราคคฺคิทุพฺพลา;
ปติฏฺฐํ สาสเน ลทฺธา, นุกฺกณฺฐา นลสา รตาฯ
[96]
พุทฺธาวาทํ ลภิตฺวาปิ, นาหํสกฺกา นโวมฺหิติ;
โทสํ ตณฺหํ อนาเสนฺโต, ปริปกฺโก กทาภเว;
ปุญฺญกมฺมํ อกโรนฺโต, ปรวชฺชํ อขมนฺโตฯ
[97]
กาย สงฺขาริกา ตณฺหา, นีจานีจกราจ สา;
จิตฺตสงฺขาริกา สทฺธา, อุจฺจา อุจฺจกราจ สาฯ
[98]
ทสฺสนีเย รตา ตณฺหา, สทฺธาสฺวาจารภตฺติกา;
วิกิณฺณจาริกา ตณฺหา, สทฺธา วิสทจารินีฯ
[99]
มโนกิเลสิกา ตณฺหา, สานุคานนฺต ทุกฺขทา;
จิตฺตปฺปสาทิกา สทฺธา, อตฺตานุค สุขาวหาฯ
[100]
ตณฺหา สทฺธาน มิจฺเจวํ, วิเสสํ ชาน ตตฺวโต;
ญตฺวา ตณฺหํ วินาเสยฺย, สทฺธํภาเวยฺย เจตสิฯ
[101]
อุจฺฉุกํ ยนฺตปตฺตมฺปิ, สญฺจุณฺณิตมฺปิ จนฺทนํ;
มธุรํว สุคนฺธํว, เมตฺติว หิํสิโตปิ สํฯ
[102]
อตฺตจฺเฉทมฺปิ วาเสติ, สุคนฺเธนิว จนฺทนํ;
สนฺโต เมตฺตาสุคนฺเธน, อตฺตหิํสมฺปิ วาสเยฯ
[103]
กทาจิปิ น ทุคฺคนฺธิ, สุกฺขํ จุณฺณมฺปิ จนฺทนํ;
ตเถว ทุกฺขปตฺโตปิ, น สนฺโต ปาปการโกฯ
[104]
ขเม วชฺชํ กเรยฺยตฺถํ, พุทฺธขนฺติ มนุสฺสรํ;
เมตฺตาตินฺเตน เวรีปิ, นุปนาโห สิยตฺตนิฯ
[105]
นคจฺฉติ ต มกฺโกโส, มเมวา นตฺถการโก;
อิติ ญตฺวาว สปฺปญฺโญ, เนว กฺโกเสยฺย กิญฺจนํฯ
[106]
อกฺโกโส มํ นอาคจฺเฉ,
ตสฺเสวา นตฺถการโก;
อิติ ญตฺวา ติติกฺเขยฺย,
น ปจฺจกฺโกสนํ กเรฯ
[107]
อกฺโกสก นยํ คณฺหิ,
ปจฺจกฺโกโส น โส วโร;
พุโธ ตํ นานุคาเหยฺย,
มา โสว ปาปิโย ภเวฯ
[108]
ตณฺหาวิชฺชาจ มูลาทฺเว, สํสารวิสปาทเป;
สพฺภตฺติ สทฺธมฺมสฺสุตํ, ทฺเวเยว มธุรา ผลาฯ
[109]
โสเธ จิตฺต มุปกฺกมฺม, สุทฺธํ อุปกฺกเมน ตํ;
วเห สุขํ อสงฺเขยฺยํ, ทุกฺขํ อโสธิตํ มลิฯ
[110]
โสธิตํ สุคติํเนติ, ทุคฺคติํว อโสธิตํ;
จิตฺตํ โสเธตุ มาลิมฺเป, ราคโทส มเลหิ ตํฯ
[111]
โทเสชา นาสิตา เยน,
สาสเนวตฺถิ โสนโย;
นตฺถญฺญตฺถ ตมาทาย,
พุโธ นาเสตุ ตํทฺวยํฯ
[112]
รนกุนวาสิ กตาวาเส, ทคุํเจตี ปุรตฺถิเม;
วสตา อคฺคธมฺเมน, เถเรน รจิโต อยนฺติฯ