4. เมตฺตาภาวนานิทฺเทส
[1]
เมตฺตา ภาวน มิจฺฉมฺปิ, สุณ พุทฺธวโจ ยิทํ;
โทส นิคฺคหณตฺถาย, โทโส เมตฺตายเวริหิฯ
[2]
อกฺโกจฺฉิมํ อวธิมํ, อชินิมํ อหาสิเม;
เยจ ตํ อุปนยฺหนฺติ, เวรํ เตสํ นสมฺมติฯ
[3]
อกฺโกจฺฉิมํ อวธิมํ, อชินิมํ อหาสิเม;
เยจตํ นุปนยฺหนฺติ, เวรํ เตสํ อุปสมฺมติฯ
[4]
นหิเวเรน เวรานิ, สมฺมนฺติธ กุทาจน;
อเวเรนจ สมฺมนฺติ, เอสธมฺโม สนนฺตโนฯ
[5]
ปเรจ นวิชานนฺติ, มย เมตฺถ ยมามเส;
เยจ ตตฺถ วิชานนฺติ, ตโต สมฺมนฺติ เมธคาฯ
[6]
กุทฺโธ อตฺถํ นชานาติ, กุทฺโธ ธมฺมํ นปสฺสติ;
สทา อนฺธตมํ โหติ, ยํโกโธ สหเตนรํฯ
[7]
อุภินฺน มตฺถํ จรติ, อตฺตโนจ ปรสฺสจ;
ปรํ สํกุปฺปิตํ ญตฺวา, โย สโต อุปสมฺมติฯ
[8]
ตสฺเสว เตน ปาปิยฺโย, โย กุทฺธํ ปฏิกุชฺฌติ;
กุทฺธํ อปฏิกุชฺฌนฺโต, สงฺคามํ เชติ ทุชฺชยํฯ
[9]
ขนฺตี ปรมํ ตโป ติติกฺขา,
นิพฺพานํ ปรมํ วทนฺติ พุทฺธา;
นหิ ปพฺพชิโต ปรูปฆาตี,
นสมโณ โหติ ปรํ วิเหฐยนฺโตฯ
[10]
อโกเธน ชิเน โกธํ, อสาธุํ สาธุนา ชิเน;
ชิเน กทริยํ ทาเนน, สจฺเจนา ลิกวาทินํฯ
[11]
โย เว อุปฺปติตํ โกธํ, รถํ ภนฺตํว วารเย;
ต มหํ สารถี พฺรูมิ, รสฺมิคฺคาโห อิตโรชโนฯ
[12]
ปุริสสฺส หิ ชาตสฺส, กุธารี ชายเต มุเข;
ยาย ฉินฺทติ อตฺตานํ, พาโล ทุพฺภาสิตํภณํฯ
[13]
เสโล ยถา เอกคฺฆโน, วาเตน นสมีรติ;
เอวํ นินฺทา ปสํสาสุ, นสมิญฺชนฺติ ปณฺฑิตาฯ
[14]
สมานภาคํ กฺรุพฺเพถ, คาเม อกฺกุฏฺฐ วนฺทิตํ;
มโนปโทสํ รกฺเขยฺย, สนฺโต อนุณฺณโต สิยาฯ
[15]
นปโร ปรํ นิกุปฺเปถ, นาติมญฺเญถ กตฺถจิ นกิญฺจิ;
พฺยาโรสนา ปฏิฆสญฺญา, นญฺญมญฺญสฺส ทุกฺข มิจฺเฉยฺยฯ
[16]
มาตา ยถา นิยํ ปุตฺต,
มายุสา เอกปุตฺต มนุรกฺเข;
เอวมฺปิ สพฺพ ภูเตสุ,
มานสํ ภาวเย อปริมาณํฯ
[17]
สุตฺวาน ทุสิโต พหุํ วาจํ,
สมณานํวา ปุถุชนานํ;
ผรุเสน หิ น ปฏิวชฺชา,
น หิ สนฺโต ปฏิเสนิํ กโรนฺติฯ
[18]
สจฺจํ ภเณ นกุชฺเฌยฺย, ทชฺชา อปฺปมฺปิ ยาจิโต;
เอเตหิ ตีหิ ฐาเนหิ, คจฺเฉ เทวาน สนฺติเกฯ
[19]
น ปเรสํ วิโลมานิ, น ปเรสํ กตากตํ;
อตฺตโนว อเวกฺเขยฺย, กตานิ อกตานิจฯ
[20]
สุ ทสํ วชฺชมญฺเญสํ, อตฺตโน ปน ทุทฺทสํ;
ปเรสญฺหิ โส วชฺชานิ, โอผุนาติ ยถา ภุสํ;
อตฺตโน ปน ฉาเทติ, กลิํว กิตวา สฏฺโฐฯ
[21]
นิธีนํว ปวตฺตานํ, ยํ ปสฺเส วชฺชทสฺสินํ;
นิคฺคยฺหวาทิํ เมธาวิํ, ตาทิสํ ปณฺฑิตํ ภเชฯ
[22]
ตาทิสํ ภชมานสฺส,
เสยฺโยโหติ นปาปิโย;
อิติ วุตฺตํ มุนินฺเทน,
ติโลกคฺเคน สตฺถุนาฯ
[23]
เมตฺตา คนฺเธน วาเสนฺโต,
โทสํ ทูเรกเร พุโธ;
ทูราสนฺเนสุ สพฺเพสุ,
อตฺตโน เวริเกสุปิฯ
[24]
หเน โทสู ปนาหานิ, อนตฺถ การกานิ หิ;
เตสฺว สนฺเตสุ สพฺเพสุ, เมตฺตาโหติ สุนิมฺมลาฯ
[25]
สตํ ทุชฺชน วากฺเยหิ, นมโน ยาติ วิกฺริยํ;
นหิตาปยิตุํ สกฺกา, คงฺคานทิํ ติณุกฺกยาฯ
[26]
นหิ นินฺทา ปสํสาหิ, สตํ มโนวิการตา;
น กทาจิปิ กมฺเปยฺย, วาเตหิ เสลปพฺพโตฯ
[27]
นทิยํ ขุทฺทกา นาวา, วิจีหิ อุนฺนโตนตา;
มหานาวา นกมฺปนฺติ, มหนฺตีหิ วิจีหิปิฯ
[28]
โลเก ปสํส นินฺทาหิ, ทุชฺชโนวุนฺนโตนโต;
สนฺโตปญฺโญ นจลติ, มหานินฺทา ถุตีหิปิฯ
[29]
เสโลเสโล นิเลเหว,
วณฺณาวณฺณา อสสฺสตา;
ลาภาลาภา สุขาทุกฺขา,
ยสายสา นกมฺปติฯ
[30]
ขมาธคฺค กเรตสฺส, ทุชฺชโน กิํ กริสฺสติ;
อติเณ ปติโต อคฺคิ, สยเมว ปสมฺภติฯ
[31]
สยเมว สกตฺตานํ, มจฺจุพฺภเยน ตจฺฉตุ;
มาญฺเญ ตจฺฉตุ โทเสน, กิมตฺถํ อญฺญตจฺฉนํฯ
[32]
มาญฺเญ ตจฺฉ ตุโทเสน, นเสยฺโย อญฺญตจฺฉนํ;
มาญฺโญ ตํ อหิพฺยคฺเฆว, โทมนสฺเสน ภายตุฯ
[33]
นิสฺสาย ครุกาตพฺพํ, พหูนํ ปาปโมจนํ;
อจาปลฺเลน สนฺเตน, ครุกาตพฺพตํ วเชฯ
[34]
นิสฺสาย ครุกาตพฺพํ, พหูนํ ปุญฺญวฑฺฒนํ;
ครุกาตพฺพตํ คจฺเฉ, ธีติยา สีล คุตฺติยาฯ
[35]
สนฺตํ หิ สีลวํ ธีติํ, หิโรตฺตปฺเปน ภายติ;
ทุชฺชนํ โทมนสฺเสน, อหิพฺยคฺเฆว ภายติฯ
[36]
นผรุสาย วาจาย, อญฺเญ ทเมยฺย ปณฺฑิโต;
อตฺตานํว ทเมตฺวาน, อญฺเญ สณฺเหน โอวเทฯ
[37]
จิตฺเต สณฺเห อสณฺหาปิ, นวาจาผรุสา ภเว;
ตสฺมา โอวา ทนาทีสุ, รกฺเขยฺย ถทฺธจิตฺตโตฯ
[38]
อตฺตาน โมวทตฺถาย, สิกฺเขยฺย พุทฺธภาสิตํ;
ปรมฺปิ อนุกมฺปาย, อิจฺฉนฺโต อนุสาสเยฯ
[39]
อญฺญํ นนิคฺคเห กิญฺจิ, สุเตน ปฏิปตฺติยา;
อตฺตนิคฺคหณํ เสยฺโย, นุนฺนเมยฺย ชิโนรโสฯ
[40]
นาวีกเรยฺย โทสํวา, โลภํ มานํ สกํมลํ;
มาญฺเญ มญฺญนฺตุ ตํ ทิสฺวา, จิรปฺปพฺพ ชิโต นุติฯ
[41]
กกเจน ตฺตเฉเทนฺเต, เวริเกปินโทสเย;
อิจฺโจวาทํ มุนินฺทสฺส, สมฺปฏิจฺฉ ชิโนรโสฯ
[42]
เวรี อจฺจุปนาหีปิ, รูเปว ทุกฺขการโก;
น ตฺว ตพฺพิสเย นาเม, ทุกฺขํ มากริ เจตสิฯ
[43]
เวรี ติพนฺธ เวโรปิ, อิเหว ทุกฺขการโก;
ภวนฺตรํ นอนฺเวติ, สกมฺมุนา คโต หิโสฯ
[44]
โทโสตุ อิห ปีเฬตฺวา,
ทุกฺขาวโห ภเวภเว;
มหานตฺถ กรํ โทสํ,
กสฺมา วฑฺเฒติ เจตสิฯ
[45]
เมตฺตาสีตมฺพุเสเกน, ชิโนวาท มนุสฺสรํ;
มหา นตฺถ กรํ โทสํ, นิพฺพายตุ ส เจตสิฯ
[46]
ฉทฺทนฺโต ลุทฺทกํ ปาปํ, ภูริทตฺโตหิ ตุณฺฑิกํ;
ธมฺมปาโล ขมิ ตาตํ, กปินฺโท กนฺทโร ปตํฯ
[47]
อสงฺเขฺยยฺย ตฺตภาเวสุ, ปรวชฺชํ ติติกฺขโต;
นาถสฺส ปารมิํ ขนฺติํ, สรํ ธีโร ติติกฺขตุฯ
[48]
สาสเน จิรวาเสน, เอวํ นิทฺโทสกา อิติ;
ตุวํ ปฏิจฺจ มญฺญนฺตุ, สาสเน สปฺปโยชนํฯ
[49]
สาสเน จิร วาสาปิ, มาทิสาว อิเม อิติ;
ตมาคมฺม นมญฺญนฺตุ, สาสเน นิปฺปโยชนํฯ
[50]
ทฺเว อุเสตีติ โทโส โส, สปรํ ทยฺหเต ทฺวยํ;
ปหาตพฺโพ ส สพฺเพสุ, ปรตฺถ สตฺถ มิจฺฉตาฯ
[51]
ปรทินฺเนหิ โนอายุ, ติฏฺฐเต นาตฺตโน วสา;
ปรวชฺชํ ขเมตพฺพํ, นสาธุ อญฺญวิโรธิโตฯ
[52]
เชคุจฺฉ กฺโกส นินฺทานิ, พาโล คณฺหาติ อกฺขโม;
ขมนฺโตตุ นคณฺหาติ, ชานํ เชคุจฺฉิตานิติฯ
[53]
ปรทินฺนานิ วจฺจานิ, ปาภตนฺติ นโกจิปิ;
คณฺเหยฺเยวํ ทุรุตฺตานิ, อคณฺหนฺโต ขเม สโตฯ
[54]
นทิ กลฺโลล วิจิโย, ตีรํ ปตฺวา สมนฺติธ;
สพฺเพ อุปฺปติตา โทสา, ขนฺติปตฺวา สมนฺติ เตฯ
[55]
โทสุมฺมตฺตก วาจาย, นุมฺมตฺโต กิํกริสฺสติ;
ภเว ยฺยุมฺมตฺตโก โสว, ตาทิสํ วจนํ ภณํฯ
[56]
โกธโน อกฺขโม อญฺญ, ทุฏฺฐสญฺญี ภยาลุโก;
คามมชฺเฌ อฬกฺโกว, ตถา มาโหหิ ตํ ชหฯ
[57]
เมตฺตาลุโก ขมาสีโล,
สพฺพฏฺฐาเนสุนิพฺภโย;
ปรตฺถ สตฺถ มิจฺฉนฺโต,
ขนฺติ เมตฺตญฺจ ภาวเยฯ
[58]
ปรกฺโกสานิ นินฺทานิ, ตํว ปจฺเจนฺติ นาญฺญคู;
ขิตฺตํปํสุว วาตุทฺธํ, ครุกํ กิํ ขมายเตฯ
[59]
อกฺโกสนฺโตจ นินฺทีจ, ปีฬิโต สก กมฺมุนา;
อิธ เปจฺจจ นีเจยฺโย, นํนยํ คณฺหิ อกฺขโมฯ
[60]
อกฺโกโส มํ นอาคจฺฉิ,
ตสฺเสวา นตฺถการโก;
อิติ ญตฺวาว สปฺปญฺโญ,
อกฺโกสํ น ครุํ กเรฯ
[61]
วิการาปตฺติ มิจฺฉนฺโต, เวรี พหุ มุปกฺกมิ;
มามิตฺตวส มนฺเวหิ, นิพฺพิกาโร ตุวํภวฯ
[62]
เมตฺตมฺพุนา สทฺโทโสจ, ปรโทโสจ สมฺมติ;
เมตฺตาเสเกน สพฺเพสุ, สพฺพโตคฺคิํ นิปารเยฯ
[63]
สโทส ปรโทสคฺคิํ, สพฺพโต ทิสโต ฏฺฐิตํ;
เมตฺตา โตเยน วาเรยฺย, สิยา นิพฺพุติ สพฺพธิฯ
[64]
นคเม อตฺตโน อคฺคิํ, ปรคฺคิํวาปิ นาคเม;
เมตฺตมฺพุนาว นิพฺพาตุ, สปรคฺคิ ทฺวยํ ภุสํฯ
[65]
คุณี คุณี นนฺทินฺทาย, ปสํสาย คุณี คุณี;
นินฺทํนินฺทํ นกุปฺเปยฺย, นสาทิเย ถุติํ ถุติํฯ
[66]
คุณํ นินฺทาย นาเสตุํ, นสกฺกา โกจิ กุสฺสโก;
วฑฺเฒตุํวา ปสํสาย, ครุํกเร น ตํทฺวยํฯ
[67]
โทสพฺภา มล สญฺฉนฺโน, เมตฺตาจนฺโท น โรจติ;
ตํมุตฺตสฺส ตุ เอตสฺส, อติสฺสย ปภาวโตฯ
[68]
สุ สุตฺต พุทฺธ สุปินา, ทฺเวปิยา คุตฺติ นากฺกโม;
สมาธิ สุมุขา มุฬฺหา, พฺรหฺมา ตฺเยกา ทส คฺคุณาฯ
[69]
สีตํ กโรตุ เมตฺตาย, จกฺขุํ ลาเภตุ ปญฺญาย;
มากาสินิปฺปเภ จญฺเญ, จนฺโท โหหิ คเตคเตฯ
[70]
ทูราสนฺเนสุ สพฺเพสุ, เมตฺตํ เปเสตุ ปาภตํ;
ธมฺมํ เทเสตุ ปตฺตานํ, จนฺโท โหหิ คเตคเตฯ
[71]
สมฺปตฺตานํ มลํ โธว, สีตํกเร สทาทโย;
อุจฺจนีเจ นวิเสเส, ชลสฺสโม คเตคเตฯ
[72]
อสอสฺสเตสุ ผุฏฺเฐสุ, โลกธมฺเมสุ อฏฺฐสุ;
ปติฏฺโฐ นิพฺพิกาโร ตฺวํ, ปถวีสทิโส ภวฯ
[73]
นากาสิ กลหํ สิลา, สทา เกนจิ นิจฺจลา;
เมตฺตายนฺโต ขมายนฺโต, มหาสิลํ คุรุํกเรฯ
[74]
สิลาว สีลวา โหตุ, ทุรุตฺตานิ ติติกฺขตุ;
ปจฺจุตฺเต โทสสํวฑฺโฒ, อนุตฺโตว ปสมฺภติฯ
[75]
สพฺเพ อหํว อิจฺฉนฺติ, สตฺตา สุขนฺติ ญาตุน;
ภาเวยฺย กมโต เมตฺตํ, ปิย มชฺฌตฺต เวริเกฯ
[76]
สพฺเพ ตสนฺติ ทณฺฑสฺส, สพฺเพ ภายนฺติ มจฺจุโน;
อตฺตานํ อุปมํ กตฺวา, นหเนยฺย นฆาตเยฯ
[77]
สุข กามานิ ภูตานิ,
โยทณฺเฑน วิหิํสติ;
อตฺตโน สุข เมสาโน,
เปจฺจ โส นลเภสุขํฯ
[78]
อเวรา พฺยาปชฺชา นีโฆ, สุขี จสฺสํ อหํว เม;
หิตกามา ตถา อสฺสุ, มชฺฌตฺตา เวริโนปิจฯ
[79]
มาตโร ภาตโร ญาตี, ทายโก ปาสกาปิจ;
สุขีโหนฺตูติ ภาเวยฺย, จเช เตสุจ ลคฺคนํฯ
[80]
โทโส เมตฺตาย ทูราริ, ตณฺหา อาสนฺน เวริกา;
ตณฺหํ ปิเยสุ วาเรยฺย, โทสํ เวรีสุ เมตฺติโกฯ
[81]
เอกุทฺเทเส กกมฺมาจ, สิสฺสา อาจริยา สุขี;
โหนฺตุ สพฺรหฺมจารีจ, เตจ ญฺโญญฺญ หิตาวหาฯ
[82]
ราชาโนจ อมจฺจาจ, คาเม อิสฺสริยา สุขี;
ภวนฺตุ เทวตาโยจ, เตหิ สุรกฺขิโต สุโขฯ
[83]
มยํ เยน สุคุตฺตาว,
สุขิตา รฏฺฐวาสิโน;
สุขี กลฺล ตฺถุ โสราชา,
เตชวนฺโต จิรายุโกฯ
[84]
รฏฺฐ ปิณฺเฑน ชีวาม, รฏฺฐวาสี สุขนฺตุติ;
ภาเวยฺเยวํ อโมฆํว, รฏฺฐปิณฺฑํ สุภุญฺชติฯ
[85]
อาปายิกา พหู สนฺติ, มาตาปิตาทิ ปุพฺพกา;
เตจญฺเญจ สุขีนีฆา, สฺสฺว พฺยาปชฺชา อเวริโนฯ
[86]
สตฺตา ภูตาจ ปาณาจ, ปุคฺคลา อตฺตภาวิกา;
ถี ปู ริยา นริยาจ, เทวานรา นิปาติกาฯ
[87]
อเวรา โหนฺตุ พฺยาปชฺชา, อนีฆาจ สุขี อิเม;
อตฺตานํ ปริหารนฺตุ, จตุธา อิติ ภาวเยฯ
[88]
ปุรตฺถิมาย ทิสาย, สพฺเพสตฺตา อเวริโน;
อพฺยาปชฺชา สุขีนีฆา, โหนฺตูติ ตาว ภาวเยฯ
[89]
ปุรตฺถิมาย ทิสาย, สพฺเพปาณาติอาทินา;
ทฺวาทสกฺขตฺตุํ ภาเวยฺย, เสสาสุปิ อยํนโยฯ
[90]
จตุทฺทิสา นุทิสา โธ, อุทฺธํ สตฺตาจ ปาณิโน;
ภูตาจ ปุคฺคลา อตฺต, ภาวี สพฺเพ ถิ ปูริสาฯ
[91]
อริยา อริยา เทวา, นราจ วินิปาติกา;
อเวรา พฺยาปชฺชา นีฆา, สุขตฺตาจ ภวนฺตุ เตฯ
[92]
จตุทฺทิสา นุทิสา โธ, อุทฺธนฺติ ทสเกทิสิ;
ทฺวาทเส เต ปริจฺฉิชฺช, ภาเวยฺย ปุคฺคเล พุโธฯ
[93]
เมตฺตา วสฺเสน เตเมตุ, ปชฺชุนฺโตวิย สพฺพธิ;
มากิญฺจิ ปริวชฺเชหิ, เอวํ เมตฺตา สุภาวิตาฯ
[94]
ปญฺจา โนธิ สตฺโตธิสา, สิยุํ ทฺวาทสปุคฺคลา;
นฺตุ จตูเหสุ ภาเวตฺวา, อฏฺฐตาลีสกา สิยุํฯ
[95]
ทสเกทิสิ ตาเมตฺตา, จตุสฺสต อสีติโย;
อฏฺฐตาลีสาหิ ปญฺจ, สตา ฏฺฐวีส สาธิกาฯ
[96]
ทุกฺขิเต กรุณํ พฺรูเห, มุทิตํ สุขิเต ชเน;
เมตฺตาเจว อุเปกฺขาจ, อุโภ อุโภสุ ภาวิตาฯ
[97]
พฺรหฺมวาสีติ วตฺตพฺโพ, เตสฺวญฺญตร วาสิโต;
คนฺธภูเตสุ โส โลเก, พฺรหฺมาวิย วิโรจติฯ
อปฺปมาทาวห ปกิณฺณกนิทฺเทส
[1]
สํวิชฺชนฺติ ธ โลกสฺมิํ,
พหู ชีวิตกปฺปนา;
คเหตฺวา ปตฺต มุญฺโฉ โย,
ชีวิกานํ ส ลามโกฯ
[2]
สุกุลาจ ตทุปคา, กามโภคา นเปกฺขิโน;
น ภยฏฺฏา น อิณฏฺฏา, เนว อาชีว การณาฯ
[3]