สีล-นิทฺเทส [291] ปมาทํ ภยโต ทิสฺวา, อ-ปฺปมาทญฺจ เขมโต; ภาเวถ อฏฺฐงฺคิกํ มคฺคํ, เอสา พุทฺธานุสาสนีฯ [292] หีเนน พฺรหฺม-จริเยน, ขตฺติเย อุปปชฺชติ; มชฺฌิเมน จ เทวตฺตํ, อุตฺตเมน วิ-สุชฺฌติฯ ก. นคเร พนฺธุมติยา, พนฺธุมา นาม ขตฺติโย; ทิวเส ปุณฺณมาย โส, อุปคจฺฉิ อุโปสถํฯ ข. อหํ เตน สมเยน, คุมฺภ-ทาสี อหํ ตหิํ; ทิสฺวา ส-ราชกํ เสนํ, เอวาหํ จินฺตยิํ ตทาฯ ค. ราชาปิ รชฺชํ ฉฏฺเฏตฺวา, อุปคจฺฉิ อุโปสถํ; ส-ผลํ นูน ตํ กมฺมํ, ชน-กาโย ปโมทิโตฯ ฆ. โยนิโส ปจฺจเวกฺขิตฺวา, ทุคฺคจฺจญฺจ ทลิทฺทตํ; มานสํ สมฺปหํสิตฺวา, อุปคจฺฉิมุ โปสถํฯ ง. อหํ อุโปสถํ กตฺวา, สมฺมา-สมฺพุทฺธสาสเน; เตน กมฺเมน สุ-กเตน, ตาวติํสํ อคจฺฉหํฯ จ. ตตฺถ เม สุ-กตํ พฺยมฺหํ, อุพฺภ-โยชนมุคฺคตํ; กูฏาคาร-วรูเปตํ, มหาสนสุ-ภูสิตํฯ ฉ. อจฺฉรา สต-สหสฺสา, อุปติฏฺฐนฺติ มํ สทา; อญฺเญ เทเว อติกฺกมฺม, อติโรจามิ สพฺพทาฯ ช. จตุสฏฺฐิ-เทว-ราชูนํ , มเหสิตฺตมการยิํ; เตสฏฺฐิ-จกฺกวตฺตินํ, มเหสิตฺตมการยิํฯ ฌ. สุวณฺณ-วณา หุตฺวาน, ภเวสุ สํสรามหํ; สพฺพตฺถ ปวรา โหมิ, อุโปสถสฺสิทํ ผลํฯ ญ. หตฺถิ-ยานํ อสฺส-ยานํ, รถ-ยานญฺจ สิวิกํ; ลภามิ สพฺพเมตมฺปิ, อุโปสถสฺสิทํ ผลํฯ ฏ. โสณฺณ-มยํ รูปิ-มยํ, อโถปิ ผลิกา-มยํ; โลหิตงฺค-มยญฺเจว, สพฺพํ ปฏิลภามหํฯ ฐ. โกเสยฺย-กมฺพลิยานิ , โขม-กปฺปาสิกานิ จ; มหคฺฆานิ จ วตฺถานิ, สพฺพํ ปฏิลภามหํฯ ฑ. อนฺนํ ปานํ ขาทนียํ, วตฺถํ เสนาสนานิ จ; สพฺพเมตํ ปฏิลเภ, อุโปสถสฺสิทํ ผลํฯ ฒ. วร-คนฺธญฺจ มาลญฺจ, จุณฺณกญฺฉ วิเลปนํ; สพฺพเมตํ ปฏิลเภ, อุโปสถสฺสิทํ ผลํฯ ณ. กูฏาคารญฺจ ปาสาทํ, มณฺฑปํ หมฺมิยํ คุหํ; สพฺพเมตํ ปฏิลเภ, อุโปสถสฺสิทํ ผลํฯ ต. ชาติยา สตฺต-วสฺสาหํ, ปพฺพชิํ อน-คาริยํ; อฑฺฒ-มาเส อ-สปฺปตฺเต, อร หตฺตํ อปาปุณิํฯ ถ. กิเลสา ฌาปิตา มยฺหํ, ภวา สพฺเพ สมูหตา; สพฺพาสว-ปริกฺขีณา, นตฺถิ ทานิ ปุน-พฺภโวฯ ท. เอก-นวุติโต กปฺเป, ยํ กมฺมมกริํ ตทา; ทุคฺคติํ นาภิชานามิ, อุโปสถสฺสิทํ ผลํฯ ธ. สฺวาคตํ วต เม อาสิ, มม พุทฺธสฺส สนฺติเก; ติสฺโส วิชฺชา อนุ-ปตฺตา, กตํ พุทฺธสฺส สาสนํฯ น. ปฏิสมฺภิทา จตสฺโส, วิโมกาปิ จ อฏฺฐิเม; ฉฬาภิญฺญา สจฺฉิกตา, กตํ พุทฺธสฺส สาสนํฯ [293] ญาตีนญฺจ ปิโย โหติ, มิตฺเตสุ จ วิโรจติ; กายสฺส เภทา สุ-คติํ, อุปปชฺชติ สีลวาฯ [294] นิพฺพานํ ปตฺถยนฺเตน สมาทินฺนํ, ปญฺจ-สีลมฺปิ อธิ-สีลํ; ทส-สีลมฺปิ อธิ-สีลเมวฯ ก. นคเร จนฺทวติยา, ภฏโก อาสหํ ตทา; ปร-กมฺมายเน ยุตฺโต, ปพฺพชฺชํ น ลภามหํฯ ข. มหนฺธการ-ปิหิตา , ติวิธคฺคีหิ ฑยฺหเร; เกน นุโข อุปาเยน, วิ-สํยุตฺโต ภเว อหํฯ ค. เทยฺยธมฺโม จ เม นตฺถิ, ภฏโก ทุกฺขิโต อหํ; ยํ นูนาหํ ปญฺจ-สีลํ, รกฺเขยฺยํ ปริปูรยํฯ ฆ. อโนมทสฺสิสฺส มุนิโน, นิสโภ นาม สาวโก; ตมหํ อุปสงฺกมฺม, ปญฺจ-สิกฺขาปทคฺคหิํฯ ง. วสฺส-สต-สหสฺสานิ , อายุ วิชฺชติ ตาวเท; ตาวตา ปญฺจ-สีลานิ, ปริปุณฺณานิ โคปยิํฯ จ. มจฺจุ-กาลมฺหิ สมฺปตฺเต, เทวา อสฺสาสยนฺติ มํ; รโถ สหสฺส-ยุตฺโต เต, มาริสสฺส อุปฏฺฐิโตฯ ฉ. วตฺตนฺเต จริเม จิตฺเต, มม สีลํ อนุสฺสริํ; เตน กมฺเมน สุ-กเตน, ตาวติํสํ อคจฺฉหํฯ ช. ติํสขตฺตุญฺจ เทวินฺโท, เทว-รชฺชมการยิํ; ทิพฺพ-สุขํ อนุภวิํ, อจฺฉราหิ ปุรกฺขตฺโตฯ ฌ. ปญฺจ-สตฺตติขตฺตฺตุ-ญฺจ , จกฺกวตฺตี อโหสหํ; ปเทส-รชฺชํ วิปุลํ, คณนาโต อ-สงฺขยํฯ ญ. เทว-โลกา จวิตฺวาน, สุกฺก-มูเลน โจทิโต; ปุเร เวสาลิยํ ชาโต, มหา-กุเล สุ-อฑฺฒเกฯ ฏ. วสฺสูปนายิเก กาเล, ทิพฺพนฺเต ชิน-สาสเน; มาตา จ เม ปิตา เจว, ปญฺจ-สิกฺขาปทคฺคหุํฯ ฐ. สห สุตฺวานหํ สีลํ, มม สีลํ อนุสฺสริํ; เอกาสเน นิสีทิตฺวา, อรหตฺตมปาปุณิํฯ ฑ. ชาติยา ปญฺจ-วสฺเสน, อรหตฺตมปาปุณิํ; อุปสมฺปาทยิ พุทฺโธ, คุณมญฺญาย จกฺขุมาฯ ฒ. ปริปุณฺณานิ โคเปตฺวา, ปญฺจ-สิกฺขาปทานหํ; อ-ปริเมยฺยิโต กปฺเป, วินิปาตํ น คจฺฉหํฯ ณ. สฺวาหํ ยสมนุภวิํ, เตสํ สีลาน วาหสา; กปฺป-โกฏิปิ กิตฺเตนฺโต, กิตฺตเย เอก-เทสกํฯ ต. ปญฺจ-สีลานิ โคเปตฺวา, ตโย เหตู ลภามหํ; ทีฆายุโก มหา-โภโค, ติกฺข-ปญฺโญ ภวามหํฯ ถ. สํกิตฺเตนฺโต จ สพฺเพสํ, อธิ-มตฺตญฺจ โปริสํ; ภวาภเว สํสริตฺวา, เอเต ฐาเน ลภมหํฯ ท. อ-ปริเมยฺย-สีเลสุ , วตฺตนฺตา ชิน-สาวกา; ภเวสุ ยทิ รชฺเชยฺยุํ, วิปาโก กีทิโส ภเวฯ ธ. สุ-จิณฺณํ เม ปญฺจ-สีลํ, ภฏเกน ตปสฺสินา; เตน สีเลนหํ อชฺช, โมจยิํ สพฺพ-พนฺธนาฯ น. อ-ปริเมยฺยิโต กปฺเป, ปญฺจ-สีลานิ โคปยิํ; ทุคฺคติํ นาภิชานามิ, ปญฺจ-สีลานิทํ ผลํฯ ป. ปฏิสมฺภิทา จตสฺโส, วิโมกฺขาปิ จ อฏฺฐิเม; ฉฬาภิญฺญา สจฺฉิกตา, กตํ พุทฺธสฺส สาสนํฯ ก. ตํ นมสฺสนฺติ เต วิชฺชา, สพฺเพ ภูมา จ ขตฺติยา; จตฺตาโร จ มหา-ราชา, ติทสา จ ยสสฺสิโน; อถ โก นาม โส ยกฺโข, ยํ ตฺวํ สกฺก นมสฺสสิฯ ข. มํ นมสฺสนฺติ เต-วิชฺชา, สพฺเพ ภูมา จ ขตฺติยา; จตฺตาโร จ มหา-ราชา, ติทสา จ ยสสฺสิโนฯ ค. อหญฺจ สีล-สมฺปนฺเน, จิรรตฺต-สมาหิเต; สมฺมา ปพฺพชิเต วนฺเท, พฺรหฺม-จริย ปรายเนฯ ฆ. เย คหฏฺฐา ปุญฺญ-กรา, สีลวนฺโต อุปาสกา; ธมฺเมน ทารํ โปเสนฺติ, เต นมสฺสามิ มาตลิฯ ง. เสฏฺฐา หิ กิร โลกสฺมิํ, เย ตฺวํ สกฺก นมสฺสสิ; อหมฺปิ เต นมสฺสามิ, เย นมสฺสสิ วาสวฯ [1] ปาลิตตฺเถรนาเคน , วิสุทฺธารามวาสินา; สุติจฺฉิตานมตฺถาย, กตา นรทกฺขทีปนีฯ [2] ปุพฺพาจริย-สีหานํ , อาลมฺพิตฺวาน นิสฺสยํ; ปาลิโต นาม โย เถโร, อิมํ คนฺถ สุ-เลขนี; สุนฺทรเมว ปสฺสิตุํ, ยุญฺเชยฺยาถีธ สาธเวฯ ‘‘ฉปฺปทิกา’’ฯ [3] อิมํ คนฺถํ วาจุคฺคโต, สเจ ภวสิ มาณว; ปุณฺนมายํ ยถา จนฺโท, อติ-สุทฺโธ วิโรจติ; ตเถว ตฺวํ ปุณฺณ-มโน, วิโรจ สิริยา ธุวํฯ [4] สุ-นิฏฺฐิโต อยํ คนฺโถ, สกฺกราเช ทฌมฺผิเย; โปฏฺฐปาทมฺหิ สูรมฺหิ, กาลปกฺเข จตุทฺทสิํฯ [5] สญฺจิเตตํ มยา ปุญฺญํ, ตํ-กมฺเมน วเรน จ; จิรํ ติฏฺฐตุ สทฺธมฺโม, อ-เวรา โหนฺตุ ปาณิโนฯ [6] อิมํ คนฺถํ ปสฺสิตฺวาน, โหนฺตุ สพฺเพปิ ชนฺตุโน; สุขิตา ธมฺมิกา ญาณี, ธมฺมํ ปาเลตุ ปตฺถิโวฯ [7] นิพฺพานํ ปตฺถยนฺเตน, สีลํ รกฺขนฺตุ สชฺชนา; ญตฺวา ธมฺมํ สุขาวหํ, ปาปุณนฺตุ อนาสวํฯ [8] อฏฺฐ-กณฺฑ-มณฺฑิตาย , ทกฺขย อตฺถ-ทีปโก; นร-สาโร อยํ คนฺโถ, จิร-กาลํ ปติฏฺฐตุฯ [9] ยาวตา จนฺท-สูริยา, นาคจฺเฉยฺยุํ มหี-ตเล; ปโมทิตา อิมํ คนฺถํ, ทิสฺสนฺตุ นย-โกวิทาฯ [10] สมฺมา ฉนฺเทนิมํ คนฺถ, วาเจนฺตา ปริยาปุณา; ปสนฺเนนานายาเสน, ปตฺวา สุเขน โกวิทํฯ [11] จนฺทาทิจฺจาว อากาเส, พหุสฺสุเตหิ สมฺปทา; วิเสส-ปุคฺคลา หุตฺวา, ปปฺโปนฺตุ อมตํ ปทํฯ [12] อุกฺกฏฺฐ-ธมฺม-ทาเนน , ปาปุเณยฺยมนุตฺตรํ; ลิงฺค-สมฺปตฺติ-เมธาวี, ตกฺกี-ปญฺญา สุ-เปสลีฯ นรทกฺข โถมนา อาสีส |