สุชนกณฺฑ
[176]
สทฺธาสีลาทิธมฺเมหิ, สปฺปนฺโน เสฏฺฐมานุโส;
วุตฺโต พุทฺธาทิสนฺเตหิ, สาธุสปฺปุริโส อิติฯ
สทฺทาธนํ สีลธนํ, หิรีโอตฺตปฺปิยํ ธนํ;
สุตธนญฺจ จาโค จ, ปญฺญา เว สตฺตมํ ธนํฯ
ยสฺส เอเต ธนา อตฺถิ, อิตฺถิยา ปุริสสฺส วา;
อทลิทฺโทติ ตํ อาหุ, อโมฆํ ตสฺส ชีวิตํฯ
ตสฺมา สทฺธญฺจ สีลญฺจ, ปสาทํ ธมฺมทสฺสนํ;
อนุยุญฺเชถ เมธาวี, สรํ พุทฺธานสาสนํฯ
[177]
สพฺภิเรว สมาเสถ, สพฺภิ กุพฺเพถ สนฺถวํ;
สตํ สทฺธมฺมมญฺญาย, เสยฺโย โหติ น ปาปิโยฯ
[178]
จช ทุชฺชนสํสคฺคํ, ภช สาธุสมาคมํ;
กร ปุญฺญมโหรตฺตํ, สร นิจฺจมนิจฺจตํฯ
[179]
โย เว กตญฺญู กตเวที ธีโร,
กลฺยาณมิตฺโต ทฬฺหภตฺติ จ โหติ;
ทุกฺขิตสฺส สกฺกจฺจ กโรติ กิจฺจํ,
ตถาวิธํ สปฺปุริสํ วทนฺติฯ
[180]
มาตาเปตฺติภรํ ชนฺตุํ, กุเล เชฏฺฐาปจายินํ;
สณฺหํ สขิลสมฺภาสํ, เปสุเณยฺยปฺปหายินํฯ
[181]
มจฺเฉรวินเย ยุตฺตํ, สจฺจํ โกธาภิภุํ นรํ;
ตํ เว เทวา ตาวติํสา, อาหุ ‘‘สปฺปุริโส’’อิติฯ
[182]
กุลชาโต กุลปุตฺโต, กุลวํสสุรกฺขโต;
อตฺตนา ทุกฺขปฺปตฺโตปิ, หีนกมฺมํ น การเยฯ
[183]
อุเทยฺย ภาณุ ปจฺฉิเม, นเมยฺย เมรุอทฺทิปิ;
สีตลํ ยทิ นรคฺคิ, ปพฺพตคฺเค จ อุปฺปลํ;
วิกเส น วิปริตา, สาธุวาจา กุทาจนํฯ
[184]
สุขา รุกฺขสฺส ฉายาว, ตโต ญาติมาตาปิตุ;
ตโต อาเจรสฺส รญฺโญ, ตโต พุทฺธสฺสเนกธาฯ
[185]
ภมรา ปุปฺผมิจฺฉนฺติ, คุณมิจฺฉนฺติ สชฺชนา;
มกฺขิกา ปูติมิจฺฉนฺติ, โทสมิจฺฉนฺติ ทุชฺชนาฯ
[186]
มาตุหีโน ทุพฺภาโส หิ, ปิตุหีโน ทุกฺกิริโย;
อุโภ มาตุปิตุหีนา, ทุพฺภาสา จ ทุกฺกิริยาฯ
[187]
มาตุเสฏฺโฐ สุภาโส หิ, ปิตุเสฏฺโฐ สุกิริโย;
อุโภมาตุ ปิตุเสฏฺฐา, สุภาสา จ สุกิริยาฯ
[188]
สุนโข สุนขํ ทิสฺวา, ทนฺตํ ทสฺเสติ หิํสิตุํ;
ทุชฺชโน สุชนํ ทิสฺวา, โรสยํ หิํสมิจฺฉติฯ
[189]
น จ เวเคน กิจฺจานิ, กตฺตพฺพานิ กุทาจนํ;
สหสา การิตํ กมฺมํ, พาโล ปจฺฉานุตปฺปติฯ
[190]
โกธํ วธิตฺวา น กทาจิ โสจติ,
มกฺขปฺปหานํ อิสโย วณฺณยนฺติ;
สพฺเพสํ วุตฺตํ ผรุสํ ขเมถ,
เอตํ ขนฺติํ อุตฺตมมาหุ สนฺโตฯ
[191]
ทุกฺโข นิวาโส สมฺพาเธ, ฐาเน อสุจีสงฺกเต;
ตโต อริมฺหิ อปฺปิเย, ตโตปิ อกตญฺญุนาฯ
[192]
โอวเทยฺยา’นุสาเสยฺย , อสพฺภา จ นิวารเย;
สตญฺหิ โส ปิโย โหติ, อสตํ โหติอปฺปิโยฯ
[193]
อุตฺตมตฺตนิวาเตน, กกฺขฬํ มุทุนา ชเย;
นีจํ อปฺปกทาเนน, วายาเมน สมํ ชเยฯ
[194]
น วิสํ วิสมิจฺจาห, ธนํ สงฺฆสฺส อุจฺจเต;
วิสํ เอกํว หนติ, หนติ สงฺฆสฺส สพฺพํฯ
[195]
ธนมปฺปมฺปิ สาธูนํ, กูเป วาริว นิสฺสโย;
พหุํอปิ อสาธูนํ, น จ วาริว อณฺณเวฯ
[196]
อปตฺเถยฺยํ น ปตฺเถยฺย, อจินฺเตยฺยํ น จินฺตเย;
ธมฺมเมว สุจินฺเตยฺย, กาลํ โมฆํ น อิจฺฉเยฯ
[197]
อจินฺติตมฺปิ ภวติ, จินฺติตมฺปิ วินสฺสติ;
น หิ จินฺตามยา โภคา, อิตฺถิยา ปุริสสฺส วาฯ
[198]
อสนฺตสฺส ปิโย โหติ, สนฺเต น กุรุเต ปิยํ;
อสตํ ธมฺมํ โรเจติ, ตํ ปราภวโต มุขํฯ
[199]
คุณา กุพฺพนฺติ ทูตตฺตํ, ทูเรปิ วสตํ สตํ;
เกตเก คนฺธํ ฆายิตฺวา, คจฺฉนฺติ ภมรา สยํฯ
[200]
ปุพฺพชาติกตํ กมฺมํ, ตํ กมฺมมีติ กถฺยเต;
ตสฺมา ปุริสากาเรนํ, ยตํ กเร อตนฺทิโตฯ
[201]
มตฺติกปิณฺฑโต กตฺตา, กุรุเต ยํ ยทิจฺฉติ;
เอวมตฺตกตํ กมฺมํ, มาณโว ปฏิปชฺชเตฯ
[202]
อุฏฺฐาโยฏฺฐาย โพเธยฺยํ, มหพฺภย มุปฏฺฐิตํ;
มรณพฺยาธิโสกานํ, กิมชฺช นิปติสฺสติฯ
[203]
ปาณา ยถาตฺตโนภิฏฺฐา, ภูตานมปิ เต ตถา;
อตฺโตปเมน ภูเตสุ, ทยํ กุพฺพนฺติ สาธโวฯ
สพฺเพ ตสนฺติ ทณฺฑสฺส, สพฺเพ ภายนฺติ มจฺจุโน;
อตฺตานํ อุปมํ กตฺวา, น หเนยฺย น ฆาตเยฯ
[204]
พาโล วา ยทิ วา วุทฺโธ, ยุวา วา เคหมาคโต;
ตสฺส ปูชา วิธาตพฺพา, สพฺพสฺสาภฺยาคโต ครุฯ
[205]
อากิณฺโณปิ อสนฺเตหิ, อสํสฏฺโฐว ภทฺทโก;
พหุนา สนฺนชาเตน, คจฺเฉน อุพฺพตฺเตนิธฯ
พาลทุชฺชนกณฺฑ
[206]
กายทุจฺจริตาทีหิ , สมฺปนฺโน ปาปมานุโช;
พาโลติ โลกนาเถน, กิตฺติโต ธมฺมสามินาฯ
[207]
ทุจินฺติตจินฺตี เจว, ทุพฺภาสิตภาสีปิ จ;
ทุกฺกฏกมฺมการี จ, ปาปโก พาลมานุโชฯ
[208]