ฯ นโม ตสฺส ภควโต อรหโต สมฺมาสมฺพุทฺธสฺสฯ โลกนีติ 1. ปณฺฑิตกณฺโฑ นานาสตฺถสมุทฺธฏํ; มาคเธเนว สงฺเขปํ, วนฺทิตฺวา รตนตฺถยํฯ นีติโลเก ปุริสสฺส สาโร, มาตา ปิตา อาจริโยจ มิตฺโต; ตสฺมา หิ นีติํ ปุริโส วิชญฺญา, ญาณี มหา โหติ พหุสฺสุโตจฯ อลสสฺส กุโต สิปฺปํ, อสิปฺปสฺส กุโต ธนํ; อธนสฺส กุโต มิตฺตํ, อมิตฺตสฺส กุโต สุขํ; อปุญฺญสฺส กุโต วรํฯ สิปฺปา สมํ ธนํ นตฺถิ, สิปฺปํ โจรา นคณฺหเร; อิธ โลเก สิปฺปํ มิตฺตํ, ปรโลเก สุขาวหํฯ อปฺปกํ นาติมญฺเญยฺย, จิตฺเต สุตํ นิธาปเย; วมฺมิโกทกพินฺทูว, จิเรน ปริปูรติฯ ขุทฺโทติ นาติมญฺเญยฺย, วิชฺชํ วา สิปฺปเมว วา; เอกมฺปิ ปริโยทาตํ, ชีวิตกปฺปการณํฯ เสเล เสเล น มาณิกํ, คเช คเช น มุตฺติกํ; วเน วเน น จนฺทนํ, ฐาเน ฐาเน น ปณฺฑิตํฯ ปณฺฑิโต สุตสมฺปนฺโน, ยตฺถ อตฺถีติ เจ สุโต; |