[183] ราสิเภเท ตุ สพฺพตฺถ พหุวจนมฺปิฯ ยถา-ทฺเววีสติโย พุทฺธทนฺตาฯ ติสฺโส วีสติโย ทินฆฏิกาฯ เอวมญฺญตฺรฯ

เอเสโส เอตนฺติปฺปสิทฺธิ, โลกสฺส โหติ ยตฺถตฺเถสุฯ

ถีปุมนปุํสกานิตฺยุจฺจนฺเต, ตานิมานิ โลเกนาตฺถาฯ

อลิงฺค

[184] อลิงฺคา วุจฺจนฺเตฯ

กฺวจิ โต ปญฺจมฺยตฺเถฯ

ลิงฺคโต ปญฺจมฺยตฺเถ กฺวจิ โตปฺปจฺจโย โหติฯ

‘‘ตฺวาทโย วิภตฺติสญฺญาโย’’ติ โตปฺปภุติทานฺยนฺตานํ วิภตฺติสญฺญาฯ ตสฺมา ตทนฺตานมฺปิ วิภตฺยนฺตตฺตา ปทตฺตํ สิทฺธนฺติ น ปุน วิภตฺติฯ โจรสฺมา โจรโตฯ เอวํ ปิติโต, เอตฺถ ‘‘ปิตาทีน มสิมฺหิ’’ ตฺยตฺราสิมฺหิคฺคหเณน โตมฺหิ ปิตาทีนํ อุสฺส อิฯ

อิมสฺสิ ถนฺทานิหโตเธสุ จฯ

ถํอาทีสุ ปเรสุ อิมสฺส อิ โหติฯ อิโตฯ

‘‘สพฺพสฺเสตสฺสากาโร วา’’ติ โตเถสฺเวตสฺส อตฺตํ วา, อโต, เอตฺโตฯ ปกฺเข- ‘‘สรโลปา’’ทินา อการโลโปฯ

‘‘ตฺรโตเถสุ เจ’’ติ กิสฺส กุฯ กุโตฯ

‘‘กฺวจิ โต’’ติ สุตฺตทฺวิธากรเณน สตฺตมฺยตฺเถ จ โต โหติ, อาทิสฺมิํ, อาทิโตฯ

[185] ‘‘ตฺรถ สตฺตมิยา สพฺพนาเมหี’’ติ สตฺตมฺยตฺเถ ตฺรถปฺปจฺจยา โหนฺติฯ สพฺพสฺมิํ, สพฺพตฺร, สพฺพตฺถ, ทฺวิตฺตํฯ เอวํ อตฺร, อตฺถฯ เอตฺถ ‘‘ตฺเร นิจฺจ’’นฺติ ปุพฺเพ เอตสฺส อฯ กุตฺร, กุตฺถฯ

‘‘เสเสสุ เจ’’ติ กาเทเส-กตฺถฯ

[186] ‘‘กิสฺมา โว เจ’’ติ วปฺปจฺจโยฯ ‘‘กิสฺส ก เวเจ’’ติ โก, กการาการโลโปฯ กฺวฯ

[187] ‘‘หิํ หํ หิญฺจน’’นฺติ กสฺมา หิํ อาทิปจฺจยาฯ ‘‘กุ หิํ หํสุ เจ’’ติ กิสฺส กุฯ จกาเรน หิญฺจนํ ทาจนํสุ จฯ กุหิํ, กุหํ, กุหิญฺจนํฯ

[188] ‘‘ตมฺหา เจ’’ติ หิํหํฯ ตหิํ, ตหํฯ

[189] ‘‘ยโต หิํ’’ติ หิํฯ ยหิํฯ

[190] ‘‘อิมสฺมา หธา เจ’’ติ หธาฯ อิห, อิธฯ

[191] ‘‘สพฺพโต ธี’’ติ ธิฯ สพฺพธิฯ

[192] กาเลตฺยธิกาโรฯ

‘‘กิํสพฺพญฺเญกยกุหิ ทาทาจน’’นฺติ กิํ อาทิโต ทา, ทาจนํ จฯ กสฺมิํ กาเล กทา, กุทาจนํฯ

‘‘สพฺพสฺส โส ทามฺหิ วา’’ติ สพฺพสฺส โส วาฯ สทา, สพฺพทาฯ

[193] ‘‘ตมฺหา ทานิ เจ’’ติ ทานิ, ทา จฯ ตทานิ, ตทาฯ

[194] ยทาทินา อิมสทฺทา, สมานาปเรหิ จ ยถาสงฺขฺยํ ชฺช ชฺชุปฺปจฺจยา, อิม, สมานานํ อ, สา จฯ อชฺช, สชฺชุ, อปรชฺชุฯ

[195] ‘‘อิมสฺมา รหิธุนาทานิ เจ’’ติ รหฺยาทิปฺปจฺจยาฯ ‘‘เอต รหิมฺหี’’ติ อิมสฺส เอโตฯ เอตรหิฯ

‘‘อ ธุนามฺหิ เจ’’ติ อิมสฺส อฯ อธุนา, อิทานิฯ

[196] โลปํ อิตฺเววฯ

สพฺพาสมาวุโสปสคฺคนิปาตาทีหิ จฯ

เอเตหิ ปรา สพฺพา วิภตฺตี ลุปฺยนฺเตฯ ตฺวํ อาวุโส, ตุมฺเห อาวุโสฯ

อุปสคฺคนิปาต

[197] อุปสคฺคนิปาตา วุจฺจนฺเตฯ