เมนู

[147] สพฺพลิงฺคา – ตฏ ปุฏ ปตฺต มณฺฑล กลสา ทโย, นามีกตา, สพฺพนามานิ จฯ ยถา – ตโฏ, อีมฺหิ – ตฏี, ตฏมิจฺจาทิฯ

นามีกตา ยถา – เทวทตฺโต, อา – เทวทตฺตา เทวทตฺตมิจฺจาทิฯ

สพฺพนาม

[148] สพฺพ , กตร, กตม, อุภย, อิตร, อญฺญ, อญฺญตร, อญฺญตม, ปุพฺพ, ปร, อปร, ทกฺขิณ, อุตฺตร, เอก, ย, ต, เอต, อิม, อมุ, กิํ, ตุมฺห, อมฺห-อิติ สพฺพนามานิฯ

สพฺโพ พุทฺโธวฯ อยํ วิเสโสฯ

โยตฺเววฯ

สพฺพนามการเต ปฐโม

สพฺพาทีนมการโต ปโร ปฐโม โย เอตฺตํ ยาติ สพฺเพฯ

‘‘ตโย เนว จ สพฺพนาเมหี’’ติ นิเสธา สสฺมาสฺมินฺนํ อาย อา เอ น โหนฺติฯ สพฺพสฺสฯ

สพฺพโต นํ สํสานํ

สพฺพาทิโต นํอิจฺจสฺส สํสานํ โหนฺติฯ

อกาโร เออิตฺเววฯ

สพฺพนามานํ นมฺหิ จ

นมฺหิ สพฺพาทีนมการสฺส เอ โหติฯ สพฺเพสํ, สพฺเพสานํฯ

[149] อิตฺถิยํ อา, สพฺพา กญฺญาวฯ อยํ วิเสโสฯ วาตฺเววฯ

ฆปโต สฺมิํสานํ สํสา

ฆปสญฺญาโต สพฺพาทิโต สฺมิํสานํ สํสา วา โหนฺติฯ

‘‘สํสาสฺเวกวจเนสุ เจ’’ติ สาคโมฯ

โฆ รสฺสํ

เอกวจนสํสาสุ โฆ รสฺสํ ยาติฯ สพฺพสฺสา, สพฺพายฯ สพฺพาสํ, สพฺพาสานํฯ สพฺพสฺสํ, สพฺพายํฯ สพฺพาสุฯ

เนตาหิ สฺมิมายยา

ฆปญฺญาหิ สพฺพาทีหิ สฺมิโน อาย ยา น โหนฺติฯ

[150] นปุํสเก – สพฺพํฯ สพฺพานิฯ เอวํ ทุติยาฯ

สพฺพาทโย นปุํสเก ตติยาทีสุ สกสกปุมสมาฯ เอวํ ย - สทฺทนฺตาฯ

[151] ปุพฺพปราปเรหิ ตุ สฺมิโน ‘‘ยทนุปปนฺนา นิปาตนา สิชฺฌนฺตี’’ติ อนิตฺถิยํ เอ วาฯ ปุพฺเพ, ปุพฺพสฺมิํอิจฺจาทิฯ

เอกสทฺโท สงฺขฺยาตุลฺยญฺญาสหายตฺโถฯ ยทา สงฺขฺยตฺโถ, ตเทกวจโน, อญฺญตฺถ สพฺพวจโน จฯ

ยาทีนมาลปนํ นตฺถิฯ

[152] ต, สิฯ

สิมฺหิ สํ อนปุํสกสฺเสตฺเววฯ

เอตเตสํ โต

สิมฺหิ อนปุํสกานํ เอตตอิจฺเจเตสํ ตการสฺส ส โหติฯ โสฯ

ตสฺส วา นตฺตํ สพฺพตฺถ

ติลิงฺเคสุ สพฺพาทีนํ ตการสฺส โน วา โหติฯ เน, เตฯ เสสํ สพฺพสมํ, นตฺตํว วิเสโสฯ

[153] อิตฺถิยํ – สา, นา, นาโย, ตา, ตาโยอิจฺจาทิฯ

วาตฺเววฯ

ตโต สสฺส สฺสาย

ตาเอตาอิมาหิ สสฺส สฺสาโย วา โหติฯ

สํสาสฺเวกวจเนสุ อิอิตฺเววฯ

ตสฺสา วา

เอกวจนสํสาสุ ตาสทฺทสฺส อา อิตฺตํ วา ยาติฯ ติสฺสาย, ติสฺสา, ตสฺสา, ตายฯ ตาสํ, ตาสานํฯ ติสฺสํ, ตสฺสํ, ตายํฯ ตาสุฯ

[154] นปุํสเก – ตํอิจฺจาทิฯ

[155] เอโสฯ เสสํ สพฺพสมํฯ

[156] อิตฺถิยํ – เอสาฯ

สํสาสฺเวกวจเนสฺเวตฺเววฯ

เอติมาสมิ

เอกวจนสํสาสุ เอตาอิมานมนฺตสฺส อิ โหติฯ เอติสฺสาย, เอติสา, เอตายฯ เอตาสํ, เอตาสานํฯ เอติสฺสํ, เอตสฺสํ, เอตายํฯ เอตาสุฯ เสสํ สพฺพาวฯ

[157] นปุํสเก – เอตํ อิจฺจาทิฯ

[158] อิม, สิฯ

‘‘อนปุํสกสฺสายํ สิมฺหี’’ติ อิมสฺส อยํฯ สิโลโปฯ อยํ, อิเมฯ อิมํ, อิเมฯ

‘‘อนิมิ นามฺหิ เจ’’ติ อิมสฺส อโน, อิมิ จฯ อเนน, อิมินาฯ

‘‘สพฺพสฺสิมสฺเส วา’’ติ สุนํหิสุ เอวาฯ เอหิ, อิเมหิฯ วา สฺมาสสฺมิํสํสาสฺวตฺตนฺเตฺววฯ

อิมสทฺทสฺส จ

สสฺมาสฺมิํสํสาสุ อิมสฺส อตฺตํ วา โหติฯ อสฺส, อิมสฺสฯ เอสํ, เอสานํ, อิเมสํ, อิเมสานํฯ อสฺมา, อิมมฺหา, อิมสฺมาฯ เอหิ, อิเมหิฯ อสฺมิํ, อิมมฺหิ, อิมสฺมิํฯ เอสุ, อิเมสุฯ

อตฺตปกฺเข – ‘‘น ติเมหิ กตากาเรหี’’ติ สฺมาสฺมินฺนํ มฺหามฺหิ น สิชฺฌนฺเตฯ

[159] อิตฺถิยํ – อยํฯ เสสํ เอตาว, สํสาสฺวตฺตํว วิเสโสฯ

[160] นปุํสเก – สวิภตฺติสฺส วาตฺเววฯ

‘‘อิมสฺสิทมํสิสุ นปุํสเก’’ติ อิมสฺส อิทํ วาฯ อิทํ, อิมํ อิเม, อิมานิฯ เอวํ ทุติยาฯ

[161] อมุ , สิฯ

วา อนปุํสกสฺส สิมฺหิตฺเววฯ

‘‘อมุสฺส โม สํ’’ติ มสฺส โส วา, สิโลโปฯ อสุฯ

‘‘สพฺพโต โก’’ติ สพฺพนามโต กาคโมฯ ‘‘โส’’ติ โอ, อมุโก, ปกฺเข – อมุฯ อมู, อมุโยฯ

ปุพฺเพว โยนํ โวกาโร นฯ อมุํฯ อมู, อมุโยฯ เสสํ ภิกฺขูว สพฺพาทิการิยาญฺญตฺรฯ

[162] อิตฺถิยํ – อสุฯ เสสํ ยาคุสมํฯ วิเสโสยํ – อมุสฺสา, อมุยาฯ อมูสํ, อมูสานํฯ อมุสฺสํ, อมุยํฯ อมูสุฯ

[163] นปุํสเก – สวิภตฺติสฺส อํสิสุ นปุํสเกตฺเววฯ

‘‘อมุสฺสาทุํ’’ติ อทุํฯ อทุํฯ อมู, อมูนิฯ เอวํ ทุติยาฯ

[164] ‘‘เสเสสุ เจ’’ติ สพฺพตฺถ กิสฺส โกฯ โก, กา, กํ อิจฺจาทิฯ ลิงฺคตฺตเย สพฺพสโมฯ

[165] ตุมฺห , สิ, อมฺห, สิฯ

สวิภตฺติสฺส ตุมฺหมฺหานนฺตฺยธิกาโรฯ

ตฺวมหํ สิมฺหิ จ

สิมฺหิ สวิภตฺตีนํ ตุมฺหมฺหานํ ตฺวํ อหํ โหนฺติฯ จสทฺเทน ตุมฺหสฺส ตุวํ จฯ ตฺวํ, ตุวํ, อหํฯ โย – ตุมฺเหฯ

‘‘มยํ โยมฺหิ ปฐเม’’ติ อมฺหสฺส มยํ โหติฯ มยํฯ

[166] ‘‘ตํมมมฺหี’’ติ อมฺหิ ตํ มํ โหนฺติฯ

‘‘ตวํ มมญฺจ นวา’’ติ อมฺหิ ตวํ มมญฺจ นวาฯ

‘‘ตุมฺหสฺส ตุวํ ตฺวมมฺหี’’ติ ตุมฺหสฺส ตุวํ, ตฺวญฺจฯ ตํ, ตวํ, ตุวํ, ตฺวํ, มํ, มมํฯ

อากนฺเตฺววฯ

‘‘วา โยปฺปฐโม’’ติ ทุติยาโยสฺส อากํ วาฯ ตุมฺหากํ, ตุมฺเหฯ อมฺหากํ, อมฺเหฯ

[167] ‘‘นามฺหิ ตยา มยา’’ติ นามฺหิ ตยา มยา โหนฺติฯ ‘‘ตยาตยีนํ ตกาโร ตฺวตฺตํวา’’ติ ตสฺส ตฺโว วาฯ ตฺวยา, ตยา, มยาฯ ตุมฺเหหิ, อมฺเหหิฯ

[168] ‘‘ตว มม เส’’ติ เส ตว มม โหนฺติฯ

‘‘ตุยฺหํ มยฺหํ เจ’’ติ เส ตุยฺหํ มยฺหญฺจฯ

‘‘สสฺสํ’’ติ สสฺส อํ วาฯ

‘‘อมฺหสฺส มมํ สวิภตฺติสฺส เส’’ติ เส อมฺหสฺส มมํ จฯ ตว, ตุยฺหํ, ตุมฺหํ, มม, มยฺหํ, อมฺหํ, มมํฯ

‘‘ตุมฺหมฺเหหิ นมากํ’’ติ นํวจนสฺส อากํฯ ตุมฺหากํ, อมฺหากํฯ สฺมานาวฯ

[169] ‘‘ตุมฺหามฺหานํ ตยิ มยี’’ติ สฺมิมฺหิ ตยิ มยิ โหนฺติฯ ตฺเว กเต - ตฺวยิ, ตยิ, มยิ, ตุมฺเหสุ, อมฺเหสุฯ ลิงฺคตฺตเย สมํฯ

[170] นวาตฺเววฯ

ปทโต ทุติยา จตุตฺถี ฉฏฺฐีสุ โวโน

อตฺถชฺโชตกา วณฺณา ปทํ, ทุติยา จตุตฺถี ฉฏฺฐี พหุวจเนสุ ปเรสุ ปทสฺมา ปเรสํ สวิภตฺตีนํ ตุมฺหามฺหานํ โวโนการา นวา โหนฺติฯ

รกฺขตุ โว, ปสฺสตุ โน, ททาติ โว, ททาหิ โน, สทฺธา โว, สตฺถา โนฯ

นวาติ กิํ, เอโส อมฺหากํ สตฺถาฯ

[171] ปทโตตฺยธิกาโรฯ

‘‘เตเมกวจเนสุ เจ’’ติ จตุตฺถีฉฏฺเฐกวจเนสุ เต เม โหนฺติฯ ททามิ เต, ททาหิ เม, อิทํ เต, อยํ เมฯ

‘‘นอมฺหี’’ติ อมฺหิ นิเสโธฯ ปสฺเสถ ตํ, อชินิ มํฯ

‘‘วา ตติเย เจ’’ติ ตติเยกวจเน เต เม วา โหนฺติฯ กตํ เต ตยา วาฯ กตํ เม มยา วาฯ

‘‘พหุวจเนสุ โวโน’’ติ ตติยาพหุวจเนสุ โว โน โหนฺติฯ พหุวจเน ปฐเม โยมฺหิ จฯ กตํ โว, กตํ โน, คามํ โว คจฺเฉยฺยาถ, คามํ โน คจฺเฉยฺยามฯ

สงฺขฺยา

[172] สงฺขฺยา วุจฺจเตฯ

เอกสทฺโท สพฺพนาเมสุ วุตฺโตฯ